Read Phom Naga JOHAN 17 Bible Online

JOHAN 17 - Phom Naga bible

JOHAN 17

¹Jisui hathü shah epheikü büpai vangsho philei ngangei veitü eteke, “Opa, hepak ngoiteke, Anha-i nüng müknyinshekhanghen shingvaishi Anha müknyinshekhanghütuh.

²Nüngi büpa kü shuohpüthü peü kü yangnyuyem shuohhen shingvaishi nüngi hangkuthü peü shak kü büpa kü wong shuohteke.

³Jomi nüng, hingshangpü Kahvang hatü nüngi shompü Jisu Khrista nyinghen hayü yangnyuyem hih.

⁴Kahdoknyü kü nüngi ngei kü dükhen shuohpü dou dükei tempai ngei nüng müknyinshekhangtepih.

⁵Hanangkü shaang, Opa, kahdoknyü lingshekü nüng touei ngei kü nyupü müknyinshekhangi nüng touei ngei müknyinshekhanghütuh.”

⁶Kahdoknyü leipü nüngi ngei kü shuohpüthü kü ngei nüngei men nyinghütepih. Jomphongü nüngei, hatü ngei kü nüngi hathü shuoh, hatü jomi nüngei shah bangteke.

⁷Ngei kü shuohpü lemphü nüng leipü khih shei jomi shaang nyingteke;

⁸mehenangkü nüngi ngei kü shuohpü shahthü ngei jomphong kü shuohtepih, hatü jomi ha shah yahteke, hatü hingshangi ngeiyü nüng leipü peipü khih shei jomi nyingteke, hatü nüngi ngei shompü khih shei jomi hinglemteke.

⁹Ngei jomei men kü phopnyeih; ngei kahdoknyülei men kü nephopnyih, shejao nüngi ngei kü shuohpüthülei men kü phopnyeih; mehenangkü jomphongü nüngei.

¹⁰Ngeilei nyupü peü nüngei, hatü nüngi angpü peü ngelei, hatü ngei jomphong kü müknyinshekhangtepih.

¹¹Shaang ngei hajük kü kahdoknyülei nenyuhen, shejao jomphong payü kahdoknyülei nyüke, hatü ngei nüng touei peikünyeih. Daülangpü Opa, nüngi ngei kü shuohpüthü nüngei men kü yangei tuhtuh, shejüang ji hük vaipükei jomphongao hük leihen.

¹²Mechem ngei jom mü nyupa, nüngi ngei kü shuohpüthü nüngei men kü yangei tuhtepih. Ngei jomphong yomtepih, hatü laihingei epü jiühühen shingvaishi mahhen hük daümtükpü mü lenei hükao nemahtük.

¹³Shejao shaang ngei nüng touei peikünyeih, hatü jom kü ngelei mongong changhühen shingvaishi ngei kahdoknyülei hathü enyüpeih.

¹⁴Ngei jomphong kü nüngei shah shuohtepih, hatü kahdoknyüi jom kü jiühitteke; mehenangkü ngei kahdoknyülei nevaipükei jomphongao kahdoknyülei nevai.

¹⁵Jom kahdoknyü leipü yahlanghen nangkü ngei nephopnyih, shejao nemeipü kübü jom yanglanghen shingvaishi phopnyeih.

¹⁶Ngei kahdoknyülei nevaipü keiha jomphongü kahdoknyülei nevai.

¹⁷Shahhing kü jom daühütuh; nüngei shah-ü shahhing nyüke.

¹⁸Nüngi ngei kahdoknyülei shompükei ngei jomphong kahdoknyülei shomnyüpeih.

¹⁹Jomao shahhing kü daühühen shingvaishi jomei men kü ngei nyingi daütüknyeih.

²⁰Ngei jomei men kü mon nephopnyih, shejao jomei shah homei ngei kü hinglemhenthü shingvaishiyao phopnyüpeih,

²¹shejüang jom peü hük vaihen. Opa, nüng ngei kü hatü ngei nüng kü nyupükei jomphongao ji kü nyuhen, shejüang nüngi ngei shompü khih shei kahdoknyüi hinglemhen.

²²Nüngi ngei kü shuohpü müknyinshekhang ngei jomphong kü shuohtepih, shejüang ji hük vaipükei jomphongao hük leihen.

²³Ngei jom kü hatü nüng ngei kü nyüke; jomphong hük leiyei mongjemhen, shejüang nüngi ngei shompü khih, hatü nüngi ngei kü bampükei ngei jomphong kü bampü khih shei kahdoknyüi nyinghen.

²⁴Opa, nüngi ngei kü shuohpüthü ngei melei nyu, halei jomao nyuhen, hatü nüngi ngei kü shuohpü ngelei müknyinshekhang jomi eehen ngei nanyüpeih; mehenangkü nüngi ngei kü kahdoknyü chongnyiam lingshekü ngei kü bampeih.

²⁵Daülangpü Opa, kahdoknyüi nüng nenyingnyu, shejao ngei nüng nyingnyüpeih, hatü nüngi ngei shompü khih shei hathüi nyingnyüke.

²⁶Ngei nüngei men jomphong kü nyinghütepih, hatü ngei ha nyinghühen, shejüang mepa bampai nüngi ngei kü bam, ha bampü jom kü nyuhen, hatü ngei jom kü nyuhen.