Read Phom Naga JOHAN 18 Bible Online

JOHAN 18 - Phom Naga bible

JOHAN 18

¹Jisui hathü shah eyei kempheikü büpai büpalei nanglomthü mü Kidron Kahji homei pe hük nyupü shing hükei dai, hatü halei büpa hatü büpalei nanglomthü nyuteke.

²Shaang Judas, üpai Jisu luhahpa, büpai hapa shing nyingei nyu, mehenangkü Jisui düngei büpalei nanglomthü mü hatouei pongteihamteke.

³Hanangkü Judas-i büpa mü ngongpathü hatü Phariseethüi shompü Rom veshanthü hatü phopshem yompü veshanthü awdük, awnya, hatü lahhilaong notü müei pei.

⁴Hahepak kü Jisui büpa kü mehe vamhen ha peü nyingei she philei heih-ei jomphong kü, “Ammi üpa yemnya?” shei phe.

⁵Jomi, “Nazareth am Jisu” shei jangei e. Jisui jangei, “Büpayü ngei hih” shei e. Büpa luhahpü Judas-ü jomphong mü yaongshi nyu.

⁶Mechem Jisui jomphong kü, “Büpayü ngei hih” shei eshuohpa, jom ngaümphei lemei leitü kahdokei doei sha.

⁷Shao büpai jomphong kü, “Ammi üpa yemnya?” shei phe. Jomi büpa kü, “Nazareth am Jisu” shei e.

⁸Jisui jangei, “Büpayü ngei hih shei ngei am kü etepih. Hanangkü ammi ngei yemjema, hathü shennyak deitüktuh” shei e.

⁹Hapayü büpai, “Nüngi ngei kü shuohpü hükao nemahtük” shei epü jiühühen nangkü vamteke.

¹⁰Hahepak kü Simon Peterlei lakei yan hük nyu; büpai ha tukei ngongchongei aalei lakdahphi dhaong lüktük. Ha aapalei menü Malkhus nyu.

¹¹Jisui Peter kü, “Nüngei yanlu yanpishungei hülangtuh. Opa-i ngei kü shuohpü yungshong ngei neyinghen je?” shei e.

¹²Hanangkü veshanthü, jomei lakchongbüthü, hatü Jehoda am veshanthüi Jisu yepei shateke.

¹³Shongei jomi hapa bong ngongchong vaipü Kaiaphaslei chenyühalei chepa Anna touei müei dei.

¹⁴Jehoda am kü nanglakthü shingvaishi shennyak hük dihen meipeih shei shahnying epeyü hapa Kaiaphas nyuteke.

¹⁵Simon Peter hatü lebü nanglom Jisu phei mü. Hapa nanglomü ngongchong mü nyingteiyei nyupü nangkü büpa Jisu mü ngongchongei shem mongei shü,

¹⁶shejao Peter payü chingshelei peshaden touei yaongshi nyu. Hanangkü ngongchong mü nyingteipü lebü nanglom vamei peshaden yompü nyüha mü eteitü Peter-ao mongei müei shüteke.

¹⁷Hapa nyühai Peter kü, “Nüngao hapa shennyakei nanglom hük nevaipü je?” shei e. Büpai, “Ngei nevaipih” shei e.

¹⁸Shaang wohongpü nangkü aathü hatü veshanthüi aw jaktü hapa shinei yaongshi wohong meiyei nyu. Peter-ao jomphong mü yaongtü wohong meiyei nyu.

¹⁹Hahepak kü ngongchongi Jisu kü büpalei nanglomthü hatü büpai nyuhpü venpü nang shah pheteke.

²⁰Jisui jangei, “Ngei kahdoknyü kü ngaiheyei etepih; ngei düngei Jehoda am peü thaipü Sinagog hatü phopshemei nyuh-ei nyuhampeih. Ngei joei meheyao ne-eangpih.

²¹Ngei kü mehekei phenya? Ngei jom kü mehe e, ha danpüthü kü phetuh; ngei mehe e, ha jomi nyingei nyüke” shei e.

²²Mechem büpai ha epa, büpa yopailei yaongshi nyupü veshan hüki Jisulei dhe kü aptü, “Nüngi ngongchong kü hapakei shah leinyu je?” shei e.

²³Jisui jangei, “Ngei nejiüi epü vaijema nejiü shei etuh. Shejao ngei jiüpü ejü mehekei nüngi ngei kü apnya?” shei e.

²⁴Hahepak kü Anna-i shatükpü lakshing büpa Kaiaphas ngongchong touei shom.

²⁵Shaang Simon Peter-ü aw touei yaongshi wohong meiyei nyu. Jomi büpa kü, “Nüngao büpalei nanglomthü khongkü hük nevaipü je?” shei e. “Ngeiyü nevaipih” shei büpai nelah-aoki e.

²⁶Ngongchongei aa hük, Peteri dhaong lüktükpülei shem am hüki büpa kü, “Ngei nüngao büpa mü pemongei eephei nevaipü je?” shei e.

²⁷Shao Peteri ha nelahaok, hatü hahepak kü ou gateke.

²⁸Hahepak kü jomi Jisu Kaiaphas toueipü müei Pilatei ongshemei dei. Hapayü dhom hepak nyu. Jehoda am mübüthü ongshemei neshü; mehenangkü jomi Hompü Mo hahhen shingvaishi jom nyingi daütüktü nyuteke.

²⁹Hanangkü Pilati jom touei vamei, “Ammi hapa shennyak mepa homei nyonghünya?” shei e.

³⁰Jomi jangei, “Hapa shennyaki nepunglangmeyü hami büpa nüng kü lanei neshuohhen vaipeih” shei e.

³¹Pilati jomphong kü, “Amphongi büpa müei daiyei ammei shahkungnyü aimü shahphenhahtuh” shei e. Jehoda ami jangei, “Üpaao jühen ham kü wong shuoh-ei neshiüpih” shei e.

³²Hapayü mekeipü dipü lemi büpa dihen, ha Jisui huei epü jiühühen shingvaishi vamteke.

³³Hahepak kü Pilat ongshemei shao shüei Jisu kü nyükei büpa kü, “Nüngü Jehoda amei Ong je?” shei phe.

³⁴Jisui, “Hapayü nüngi deihtü phenyu hi nevaijü hanei ami ngei jung ephopa?” shei e.

³⁵Pilati jangei, “Ngeiyü Jehoda am hük nevai, vaila? Ammei jat hatü ngongpathüi nüng yepei ngei kü shuohpü khihma. Nüngi mehe dükshuohpa?” shei e.

³⁶Jisui jangei, “Ngelei ongchingü hapa kahdoknyülei nevai, hapa kahdoknyülei vailangmeyü Jehoda ami ngei yepei shuohpü kü neshuohhühen ngelei nanglomthüi hokhen vaipeih. Shejao ngelei ongchingü kahdoknyülei nevaipih” shei e.

³⁷Pilati büpa kü, “Shejema nüngü ong je?” shei phe. Jisui jangei, “Nüngiang ngeiyü ong hük khih shei enyüke. Ha tata kü ngei bühpeih, hatü ha tata kü ngei hapa shahhing denpü shuohhen nangkü ngei kahdoknyülei yiüpeih. Hapa shahhing kü nyupü peüi ngei epü bangnyeih” shei e.

³⁸“Shahhingü meheang?” shei Pilati phe. Büpai ha epheikü büpai shao Jehoda am touei vamei jomphong kü, “Büpa nyonghühen mü ngei meheyao nedangang.

³⁹Hompü Mo kü ngei am touei shennyak hük vephahen vanglem nyüke. Ngei am touei Jehoda amei Ongpa vephahen hiang?” shei phe.

⁴⁰Jomi lenei, “Hapa shennyak nevai, shejao Barabbas!” shei jangei e. Shaang Barabbas-ü gühpa hük nyuteke.