Read Phom Naga JOHAN 19 Bible Online

JOHAN 19 - Phom Naga bible

JOHAN 19

¹Hapheikü Pilati Jisu deiyei büpa kü bheiteke.

²Veshanthüi hühthangi athen hük lingtü büpalei shangjing kü thenhü, hatü manghmepü ow owhü.

³Jom nedoh-i büpa touei peiyei, “Jehoda amei Ongpa, yangnyu shoshoshi nyutuh!” shei e, hatü büpalei dhe kü apteke.

⁴Shao chem Pilat chingshelei vamei khong kü, “Veituh, büpa nyonghühen mü ngei meheyao nedangang shei am kü nyinghühen shingvaishi ngei büpa am touei ngaikünyeih” shei e.

⁵Hanangkü Jisu hüh athen thentü, manghmepü ow owtü vamteke. Pilati jomphong kü, “Veituh, shennyakü ha khih” shei e.

⁶Mechem ngongpathü hatü veshanthüi büpa eepa, jomi, “Büpa shophang kü aptuh! Büpa shophang kü aptuh!” shei len. Pilati jom kü, “Am nyingi büpa müei daiyei shophang kü aptuh, ngei büpa nyonghühen mü meheyao nedangang” shei e.

⁷Jehoda ami büpa kü jangei, “Hamei shahkung hük nyüpeih, hatü hapa shahkung aimü büpa dihen jiüteke; mehenangkü büpai büpayü Kahvang Ha hih shei epeih” shei eteke.

⁸Shaang mechem Pilati ha danpa, büpa nyeishi nyem.

⁹Büpai shao ongshemei shüei Jisu kü, “Nüng meleipüang?” shei phe. Shejao Jisui büpa kü shah nelei.

¹⁰Hanangkü Pilati büpa kü, “Nüngi ngei kü shah ne-ehen je? Nüng vehen nevaijü nüng shophang kü aphen wong ngei kü nyüpeih shei nüngi nenyingnyu je?” shei e.

¹¹Jisui jangei, “Shangphi leipai nüng kü neshuohlangmeyü nüng ngei shak kü wong nenyuhah shepeih; hanangkü üami ngei yepei nüng kü lanei shuohnya, jomi nyeipü mang thahteke” shei e.

¹²Hajük mü leitü Pilati Jisu vetükhen khe, shejao Jehoda ami lenei, “Nüngi hapa shennyak vetükjema, nüngü ongpalei küphü nevai. Üpai ong leihünya, büpayü ongpalei vepa” shei e.

¹³Mechem Pilati hathü shah danpa, büpai Jisu chingshelei müei anei, “Yaongdü” nevaijü Hebrew shah mü “Gabbatha” shei epü shingei shahphenpü uoshing kü uoteke.

¹⁴Shaang hapayü Hompü Mo shing Tempülempü nyih nyu, hatü ha haümhah hepak nyuteke. Büpai Jehoda am kü, “Ammei Ongpayü ha khih!” shei e.

¹⁵Jomi lenei, “Büpa jütuh! Büpa jütuh! Büpa shophang kü aptuh!” shei len. Pilati jomphong kü, “Ngei ammei Ongpa shophang kü aphühen je?” shei phe. Ngongpathüi jangei, “Kaisar mü lenei hamei ong neshiüpih” shei e.

¹⁶Hahepak kü büpai jomphong kü shophang kü aphen shingvaishi Jisu lanei shuoh. Hanangkü jomi Jisu lanei yah,

¹⁷hatü büpai laophülei shophang paitü “Shangvang” (Hebrew shah mü Golgotha) shei menpü shingei dai.

¹⁸Halei jomi büpa hatü büpa mü nyonghidah kü lebü nyi, büpa jiamei shei shophang kü ap.

¹⁹Pilati shah hük hapakei nyangtü ha shophang shangei tuh: “Nazareth am Jisu, Jehoda amei Ongpa.”

²⁰Jehoda am longshi shingi ha nyangpü ee; mehenangkü Jisu shophang kü appü shingü chingnyü yopailei nyu, hatü hapayü Hebrew, Latin hatü Greek shahthü mü nyang.

²¹Hahepak kü Jehoda am ngongpathüi Pilat kü, “Jehoda amei Ongpa” shei tenyang, shejao hapa shennyaki, “Ngeiyü Jehoda amei Ongpa” shei epeih shei eteke.

²²Pilati jomphong kü, “Ngei mehe nyangtük, nyangtük” shei e.

²³Veshanthüi Jisu shophang kü appheikü büpalei ashak ali anei shaaktü hükbaong hanei yah. Jomi büpalei bhagthuh-ao yah, hatü hapayü sho kübü la thahshi baong neshiüi dakpü bhagthuh nyuteke.

²⁴Hanangkü jomphong hüki hük mü, “Jeni hapayü teshaakshah; üpai danghen shangkü phongyomei veishah” shei e. Hapayü laihingei, “Jomi ngelei ashakviha hantei, hatü ngelei büm-ow nangkü phongyomteke” shei epü jiühühen nangkü ha vamteke. Hanangkü veshanthüi ha dükteke.

²⁵Hahepak kü Jisulei shophang yopailei yaongpeyü chenyü, chenyülei chenaü Klopaslei chenyüha Mary hatü Mary Magdalen hathü nyu.

²⁶Mechem Jisui chenyü hatü büpai bampü nanglom pinnyü touei yaongshi eepa, büpai chenyü kü, “Nyüha, anha kü veituh” shei e.

²⁷Hapheikü büpai hapa nanglom kü, “Anyü kü jungtuh” shei e. Hapa hepak kü-üng büpai jomei shemei pinnyü leilang.

²⁸Hapheikü mechem Jisui dou peü temteke shei nyingpa, (laihing kü eyei nyupü jiühühen shingvaishi) “Ngei yung leangke” shei e.

²⁹Hatouei dük hük kü yiüthi maei shihtü haüshi nyu. Hanangkü jomi phümphah yah-ei hyssop püthang kü jap, hatü ha yiüthi kü hüngtü anei ju kü jeeshuoh.

³⁰Mechem büpai ha yiü yah, büpai, “Ha temteke” shei e, hatü büpalei ngaüm thaungei büpalei laangha lüdai.

³¹Hapa nyih-ü Tempülempü nyih vaipü nangkü Jehoda ami Sabbath nyih shophangei mahng netuhhü; mehenangkü Sabbath-ü longi daülangpü nyih nyu. Hanangkü jomi Pilat kü shophang kü appüthülei la bhagei veitü mahng yahlanghen shingvaishi pheteke.

³²Hahepak kü veshanthü peiyei Jisu mü shophang kü appü shongpübalei la bhag, hatü hükpalei la-ao bhag.

³³Shejao mechem jomphong Jisu touei heihpa, büpa meishi didaipü eeyei jomi büpalei la nebhagtük.

³⁴Ha nangjei veshanthü khongkü hüki büpalei haampat kü phungi hüm, hatü iy hatü yung chemi vam.

³⁵(Üpa shennyaki ha vampü ee, denpü shuohteke, hatü büpalei denpeyü shahhing. Büpai shahhing enyeih shei büpai nying, hatü ammi hinglemhen shingvaishi ha jung denpü shuohnyüke).

³⁶Laihingei, “Büpalei vang hükao nebhagtük” shei epü jiühühen shingvaishi ha vamteke.

³⁷Shao lebü laiphong hanei kü, “Jomi üpa kü phungi hüm, jomi büpa eehen” shei enyüke.

³⁸Hathü vampheikü, Arimathea am Joseph, üpa Jehoda am kü nyempü nangkü joshi vaijao Jisulei nanglom nyuhampa, büpai Pilat kü Jisulei mahng yah-ei daihen nyemmongshuoh shei peiyei phe. Pilati büpa kü mongshuoh; hanangkü büpa peiyei mahng yah-ei dai.

³⁹Nikodemas, üpa shongei Jisu touei yanüng pei, büpa-ao vong meipü myrrh hatü aloe meli dok hapüan hükshing yah-ei pei.

⁴⁰Jomi Jisulei mahng yah-ei Jehoda am mahng vüteipü vanglem aimü nyemin ashak kü vongmei meli shihtü mahng kü ngeihteke.

⁴¹Shaang büpa shophang kü appü shingei pe hük nyu, hatü hapa pemongei mechemao üpaao mangvüpü mahngchong ja hük nyu.

⁴²Mehenangkü hapayü Jehoda am Tempülempü nyih vaipü nangkü, hatü mahngchongao yopailei nyupü nangkü jomi Jisu halei vüphong.