Read Phom Naga JOHAN 21 Bible Online

JOHAN 21 - Phom Naga bible

JOHAN 21

¹Ha douthü pheikü shao Jisui büpalei nanglomthü kü Tiberias Yungchingei vamei huteke, hatü büpa hapakei vamteke.

²Hatouei thaiyei nyupü khongkü Simon Peter, Thomas (üpa kü Didymas sheiyao nyük), Galilei nyupü Kana am Nathanael, Zebedeelei cheha nyi, hatü büpalei nanglom lebü nyi nyuteke.

³Simon Peteri hathü kü, “Ngei nyahyep lüdainyeih” shei e. Jomi büpa kü, “Hamao nüng mü daihen hih” shei e. Jom daiyei ai mongei shü, shejao ha ya jomi nyah hükao neyep.

⁴Vangngai meiyaki Jisu yungphaangei peiyei yaong, shejao nanglomthüi hapayü Jisu khih shei nenying.

⁵Jisui jomphong kü, “Küphüthü, amphongi nyah meheyao neyepangpü je?” shei phe. Jomphongi büpa kü, “Neyep” shei e.

⁶Büpai jomphong kü, “Hapa ai lakdah lemei shang shepeishuoh, hatü halei maani yephen hih” shei e. Hanangkü jomi shang shep, hatü hapa shüei neleiaok; mehenangkü halei nyah longi manei nyuteke.

⁷Jisui bampü nanglomi Peter kü, “Hapayü SHEMBÜPA khih!” shei e. Mechem Simon Peteri, “Hapayü SHEMBÜPA khih” shei epü danpa, büpai ashak hanei ngeihtü yungei laongdai; mehenangkü büpa bümkong nyuteke.

⁸Shejao lebü nanglomthüi ai touei heih-ei shang maei nyah shüei lei; mehenangkü jomphong phaang kübü longi taishi nenyu; meter kho hük shing mon yungei heih-ei nyu.

⁹Mechem jom yungphaangei leipa, jomi hatouei aw jaktü halei nyah hatü aan eeteke.

¹⁰Jisui jomphong kü, “Amphongi shaang yeppü nyah hanei deikei” shei e.

¹¹Hanangkü Simon Peteri ai mongei shütü shang yungphaangei shüei lei. Halei nyah longpü mon 153 thahshi nyu; nyah hajük manjao shang neshaakdai.

¹²Jisui jomphong kü, “Heih-ei cheü-a hahtuh” shei e. Shaang nanglomthü üpaiyao büpa kü, “Nüng üpaang?” shei nephe; mehenangkü jom peüi büpayü SHEMBÜPA khih shei nyingdai.

¹³Jisu heih-ei aan yah-ei jom peü kü shuoh, hatü büpai hapakei nyah-ao shuoh.

¹⁴Jisu dipü kübü yangei leipheikü hapai jempabü büpalei nanglomthü touei vamei huteke.

¹⁵Mechem jomphong hahyingei tempa, Jisui Simon Peter kü, “Johanei ha Simon, nüngi hathü mao nyeishi ngei kü bamnyüla?” shei e. Büpai büpa kü, “Hih, SHEMBÜPA; ngei nüng kü bamnyeih shei nüngi nying” shei e. Jisui büpa kü, “Ngelei mihathü haümtuh” shei e.

¹⁶Nyipabü büpai büpa kü, “Johanei ha Simon, nüngi ngei kü hingmei bamnyüla?” shei e. Büpai büpa kü, “Hih, SHEMBÜPA; ngei nüng kü bamnyeih shei nüngi nying” shei e. Jisui büpa kü, “Ngelei mithü jungtuh” shei e.

¹⁷Büpai jempabü büpa kü, “Johanei ha Simeon, nüngi ngei kü bamnyüla?” shei e. “Nüngi ngei kü bamnyüla?” shei büpai büpa kü jempa thahshi eshuohpü nangkü Peter mong yimei deih. Büpai büpa kü, “SHEMBÜPA, nüngi lemphü nyingei nyüke; ngei nüng kü bamnyeih shei nüngi nyingei nyüke” shei e. Jisui büpa kü, “Ngelei mithü haümtuh” shei e.

¹⁸“Ngei nüng kü hingmei mü enyeih, mechem nüng vaanwong hepak nyupa, nüngi laophü nyingi shüngshep sheptü nüng melei daihü halei daihampeih. Shejao mechem nüng viüdaihen, nüngi laophülei lak haonghen hatü mih-i nüng kü shünglok lokhen, hatü nüng nedaihüpülei müei daihen” shei e.

¹⁹(Büpai hapayü büpa mepakei dipai Kahvang müknyinshekhanghen ha huhen nangkü eteke). Hapheikü büpai büpa kü, “Ngei phei mükei” shei e.

²⁰Peteri yaakei veijü Jisui bampü nanglom jomphong phei müjaei ee; büpayü hahyingpü hepak kü Jisu touei dhenei uotü, “SHEMBÜPA, nüng luhahhenü üpaang?” shei phepeyü büpa nyuteke.

²¹Mechem Peteri büpa eepa, büpai Jisu kü, “SHEMBÜPA, büpa nang mekeiang?” shei e.

²²Jisui büpa kü, “Ngei yiüpü thahshi büpa yemmü tuhjao nüngi ha mehe vainüng? Ngei phei mükei” shei e.

²³Hanangkü hapa nanglom nedihenja shei jeihinaüthü khongkü shahjang yanteke. Shejao Jisui büpa nedipih shei büpa kü ne-e, shejao “Ngei yiüpü thahshi büpa yemmü tuhjao nüngi ha mehe vainüng?” shei mon eteke.

²⁴Hathü dou jung denpü shuohpü hatü nyangpeyü hapa nanglom hih, hatü büpalei denpeyü shahhing shei jeni nying.

²⁵Shejao Jisui dükpü lebü douthü longi nyüke; peü paoh nyangnüng elangmeyü hapa jung nyangpü laithüi hapa kahdoknyü kao nechapih shei ngei deihnyüke.