Read Phom Naga JOHAN 3 Bible Online

JOHAN 3 - Phom Naga bible

JOHAN 3

¹Shaang Pharisee am Nikodemas shei mentü Jehoda am mübü hük nyu.

²Büpai nyak kü Jisu touei peiyei büpa kü, “Nyuhbü, nüngü Kahvang leipü yiüpü nyuhbü shei nyingnyüke; mehenangkü Kahvang ne-ompheikü nüngi dükpü nyangeihepü douthü üpaiyao nedükaokpih” shei e.

³Jisui büpa kü, “Hingmei mü ngei nüng kü enyeih, nyipabü nebühpheikü üpaiyao vangsho ongching dangnüng neaokpih” shei e.

⁴Nikodemas-i büpa kü, “Shennyak hük viüdaipheikü mekei etü anghen? Shennyak hük shao nyüei vom mongei shütü anghen je?” shei e.

⁵Hingmei mü ngei nüng kü enyeih, shennyak hük yung hatü Laanghai nebühpheikü mekei etao vangsho ongchingei shününg neaok.

⁶Mehe phai-i büh, hayü phai, hatü mehe Laanghai büh, hayü laangha.

⁷“Nüng nyipabü angtuh” shei ngei epü kü nüng tethama.

⁸Vanglüki melemei lükhünya, halemei lüknyüke. Nüngi hapalei ngeü dannyüke, shejao nüngi ha melemeipü peinya, hatü melemei dainya, ha nüngi nenying. Hapa keiha Laangha kü angpü peü nyunyüpeih.

⁹Nikodemas-i, “Hathü mekei aokhen” shei büpa kü e.

¹⁰Jisui büpa kü, “Nüngü Israel amei nyuhbü hük khih; shejema nüngi hathü nenyingpü je?” shei e.

¹¹Ngei nüng kü hingmei enyeih, jeni nyingei nyupü jung jeni eteinyeih, jeni eepü jung jeni denpü shuohnyeih, shejao ammi hamei shahjangmei neyah.

¹²Ngei amphong kü kahdoknyü douthü jung ephüjü ha kü hingnelem, shejema ngei vangsho leipü douthü jung ephüjü mekei etü ammi hinglemhen?

¹³Vangsho leipü yiüpü Shennyak Ha mü lenei üpaiyao vangsholei ne-aong.

¹⁴Mosai jahpanei biü lungei anpü keiha Shennyak Hayao lungei anshihhen,

¹⁵hatü üami büpa kü hinglem yangnyuyem danghen.

¹⁶Mehenangkü Kahvangi kahdoknyü kü longi bampü nangkü büpai laophülei Halom shuoh; üami büpa kü hinglem nemahhen, shejao düngeipü yangnyuyem danghen.

¹⁷Mehenangkü Kahvangi kahdoknyülei laophülei Ha kahdoknyü nyonghühen shingvaishi nevai, shejao büpa homei kahdoknyü yanghen shingvaishi shompeih.

¹⁸Üpai büpa kü hinglemnya, nenyonghünyih; shejao üpai hingnelem, nyonghütükteke; mehenangkü hathüi Kahvang Halomei men kü hingnelem.

¹⁹Shahphenpü dou-ü ha: Vangngaiyü kahdoknyülei yiü, shejao hangkuthüi vangngai nangjei vangnyak küang bam; mehenangkü jomei douthü-ü mang nyuteke.

²⁰Mehenangkü mang dou dükpü peüi vangngai kü jiühitnyeih, hatü jomei mang douthü shakei vamjahen khih shei nyemei vangngailei nepeinyih.

²¹Shejao üami hingshangpü dou düknya, jomi mehe dük hayü Kahvang kü dükpeih shei huhen shingvaishi vangngailei peinyüke.

²²Hapheikü Jisu hatü büpalei nanglomthü Judea kahmük lemei dai, hatü büpa halei kanja jomphong mü nyu, hatü baptükshuoh.

²³Johanao Salim yopai-i Aenonlei baptükei nyu; mehenangkü halei yung changshi nyu, hatü nanglakthü nedoh-i pei hatü baptükshuoh.

²⁴Hahepak kü Johanü khoklatei mangshü-i nyu.

²⁵Shaang Johanei nanglomthü hatü Jehoda am hük aa kü daühenlanghen vanglem nangkü shah dakteiyei nyu.

²⁶Jomi Johan touei peiyei büpa kü, “Nyuhbü, nüng mü Jordan yungdangei nyupüba, üpa jung nüngi denpü shuohpa, büpaiyao baptüknyüke hatü peü büpa touei peinyüke” shei e.

²⁷Johani, “Vangsho leipü shuohpü nevaipheikü üpaiyao meheyao nedangaokpih” shei e.

²⁸“Ngeiyü Messiah nevai, shejao ngeiyü büpa shekü yeihshi shompeih” shei ngei epü ha kü amphong denbüthü nyüke.

²⁹Yiükü yiükyahbülei nyüke. Yiükyahbülei küphüpai danei büpalei ngeü bangnyüke, hatü mechem büpai yiükyahbülei ngeü danhenshang mongongnyüke. Hayü ngelei mongong hatü ha changhüteke.

³⁰Büpa longkhan longhen, ngei maan khan maanhen.

³¹Üpa shangphi leipü pei, büpa peü shak kü longpüba; üpa kahdoknyü leipü nyupa, büpayü kahdoknyülei hatü kahdoknyü douthü jung enyeih. Üpa vangsho leipü yiü, büpa peü shak kübü.

³²Büpai mehe ee, hatü dan, ha jung denpü shuohnyeih, shejao üpaiyao büpalei denpü neyahnyu.

³³Üami büpalei shah yah, Kahvangü shahhing shei denpü shuohnyüke.

³⁴Büpa üpa Kahvangi shom, büpai Kahvangei shah enyüke, mehenangkü büpai Laangha maei shuoh.

³⁵Pa-i Ha kü bampü nangkü lemphüli büpalei lak kü shuohteke.

³⁶Üami Ha kü hinglem, yangnyuyem nyüke, üami Ha kü hingnelem, yangnyuyem nedanghen shejao Kahvang mongshihpü heühen.