Read Phom Naga JOHAN 4 Bible Online

JOHAN 4 - Phom Naga bible

JOHAN 4

¹Mechem Phariseethüi Johan meyü Jisui nyeishi nanglomthü leihüei baptüknyükeja shei danpa,

²(Hingmei meyü Jisui üpa kao bapnetük, shejao büpalei nanglomthüi baptükteke),

³büpa Judea leipü shao Galilei leidai.

⁴Shejao büpa Samaria homei leihen mü nyuteke.

⁵Hanangkü büpai Samaria kü nyupü Sykhar chingei pei; hapayü cheha Joseph kü Jakobi shuohpü kahdok yopailei nyu.

⁶Hatouei Jakob yungkuk nyu, hatü yenlem kü nyiuei Jisu yungkuk touei uoshi nyu. Hayü haümhahphei hepak nyu.

⁷Mechem Samaria am nyüha hük yung shohen heihjapa, Jisui pinnyü kü, “Ngei kü yinghen yung yahshih” shei e.

⁸(Büpalei nanglomthü hahying shaknüng chingei aongdaitü nyu).

⁹Hapa Samaria am nyühai büpa kü, “Nüngü Jehoda am khih; mekei etü Samaria am nyüha hük kü yung yünya?” shei e. (Mehenangkü Jehoda ami Samaria am mü bhaong chaihamteke.)

¹⁰Jisui pinnyü kü, “Nüngi paoh Kahvangei thintho nyinglang meyü, ‘Ngei kü yinghen yung yahshih’ shei üpai nüng kü yünya, nüngi büpa kü vanyangyem yung yühah shepeih” shei e.

¹¹Hapa nyühai büpa kü, “Longpüba, nüngei yungshong neshiü, hatü yungkuk chüshi nyüke, nüngi meleipü ha vanyangyem yung dangnya?

¹²Nüngü hamei bü Jakob mao longpü je? Büpai ham kü ha yungkuk shuohpeih, hatü büpalei hapeüthü hatü yemhimakthüi ha yingnyüpeih” shei e.

¹³Jisui pinnyü kü, “Üami haleipü yung yingnya shao-üng yunglehen,

¹⁴shejao üami ngei shuohpü yung yinghenshang mechemao yung nelehen. Ngei shuohpü yungü jom kü yunglok leiyei vanyangyem touei bhaoei vamhen” shei e.

¹⁵Hapa nyühai büpa kü, “Longpüba ngei hajük kü mechemao yung nelehen, hatü hatouei yungsho neheihteinüng ngei kü ha yung yahshih” shei e.

¹⁶Jisui pinnyü kü, “Leituh, ambaha nyükei heihkei” shei e.

¹⁷“Ngei baha neshiüpih” shei hapa nyühai e. Jisui pinnyü kü, “Nüngi ngei baha neshiüpih shei epü jiüangke;

¹⁸nüng baha nga nyuhampü khih, hatü shaang nüng mü nyupeyü nüngei baha nevaiang. Nüngi epeyü jiüangke!” shei e.

¹⁹Hapa nyühai büpa kü, “Longpüba nüngü thibü hük khih shei ngei veiaoknyüke.

²⁰Hamei bühipathüi hapa kahshangei khümhampeih, shejao nanglakthüi khümhen shingü Jerusalem hih shei ammi enyüke” shei e.

²¹Jisui pinnyü kü e, “Nyüha, ngei kü hinglemtuh; nüngi Opa kü hapa kahshang nevaijü Jerusalemei nekhümhen hepak ngoikünyüke.

²²Am Samaria ami üpa kü khümnya nenyingi khümnyüke; hami üpa kü khümnya ha nyingnyeih; mehenangkü yemleipeyü Jehoda kübü nyüke.

²³Shejao mechem hingshangi khümpüthüi Opa kü laangha hatü shahhingi khümhen, ha hepak ngoikünyüke hatü hayü shaang khih; mehenangkü Opai hapakei büpa kü khümpüthü yemnyüpeih.

²⁴Kahvangü laangha, hatü büpa kü khümpüthüi laangha kü, hatü shahhing kü khümhen vongbong.”

²⁵Ha nyühai, “Messiah lappai, Khrista peikünyüke shei ngei nyingnyüke, hatü mechem büpa peihen, büpai ham kü lemphü ephahen” shei eteke.

²⁶Jisui pinnyü kü, “Ngei, üpai nüng mü shah eteinya, hayü büpa hih” shei e.

²⁷Hahepak kü büpalei nanglomthü nyokei lei. Büpa nyüha hük mü shah eteipü eeyei jom peüi thama, shejao üpaiyao büpa kü, “Nüng mehe napa?” nevaijü “Nüngi pinnyü mü mehekei shah eteinya?” shei nepheshuoh.

²⁸Hapa nyühai pinnyülei yungdük yakphongtü chingei nyokei aong. Pinnyüi nanglakthü kü,

²⁹“Ngei dükei nyupü lemphüli ephopü shennyak kü peiyei veituh. Hapayü Messiah vaila?” shei e.

³⁰Jomphong ching leipü büpa mü pongnüng yiü.

³¹Hahepak kü büpalei nanglomthüi büpa kü, “Nyuhbü, lemhük payü hahtuh” shei nyeanteke.

³²Shejao büpai jomphong kü, “Ammi nenyingpü ngei hahhen hahying nyüpeih” shei e.

³³Hanangkü nanglomthü hüki hük mü, “Hanei ami büpa kü hahhen lemhük shuohphei hiang yo?” shei etei.

³⁴Jisui jomphong kü, “Ngelei hahyingü ngei shompübai mongpü dükhen, hatü büpalei dou temhen ha hih.

³⁵Len ali mon angtü hahvet hepak ngoikahen shei ammi ne-enyu je? Shejao ngei am kü enyeih, shinei veituh, hatü hah vethen hah meandaipü kü veihümao.

³⁶Hah vetbüi nanglat dangnyeih, hatü yangnyu shingvaishi betjük thainyeih, shejüang li haibü hatü vetbü nyi chemi mongongnyeih.

³⁷‘Hüki hainyeih, hüki vetnyeih’ shei epü jiünyüke.

³⁸Ammi nelingpü kah leipü vethen ngei am shompeih; mih-i ha lingteke, hatü jomi dükpü kübü nanglei ammi dangteke” shei e.

³⁹Hapa nyühai, “Ngei dükei nyupü lemphüli büpai ephopeih” shei denpü shuohpü homei hapa ching leipü Samaria am longi büpa kü hinglem.

⁴⁰Hanangkü mechem Samaria am büpa touei peipa jomi büpa kü jom mü nyuhen e, hatü büpa jom mü nyih nyi themteke.

⁴¹Shao büpalei shah homei nyeishi hinglem.

⁴²Jomi ha nyüha kü, “Hami hajük keyü nüngi epü nangkü hinglemnyu nevaipih, shejao ham peüi laophü laophüi dantepih, hatü hingmei mü hapayü kahdoknyü Yangbü shei hami nyingteke” shei e.

⁴³Mechem nyih nyi peihpa, büpai hapa shing leipü Galilei dai,

⁴⁴(mehenangkü Jisui thibü hükei chingei thibü hük kü dhüm neshuohnyih shei eteke).

⁴⁵Mechem büpa Galil ngoipa, Galil ami büpa ombomei yah; mehenangkü Jerusalemei mo hepak kü büpai dükpü dou lemphü eeteke; mehenangkü jomphongao mo kü daiteke.

⁴⁶Hapheikü büpai Galilei nyupü Kana, büpai yungi yiü leihüpü chingei pei. Shaang halei ongpalei lakchongbü hükei ha Kapernaumei tüngei nyu.

⁴⁷Mechem büpai Jisu Judea leipü Galilei leiteke shei danpa, büpa peiyei Jisu kü yiüei cheha tüngpü meitükshih shei khümei e; mehenangkü büpa dihen mü nyu.

⁴⁸Hahepak kü Jisui büpa kü, “Ammi yashanyale nyangeihepü ne-eepheikü hingnelemnyu” shei e.

⁴⁹Hapa ongpalei lakchongbüi, “Longpüba, naü didaishekü yiükütuh” shei e.

⁵⁰Jisui, “Nüng leituh, anha meidaitü chongkahen hih” shei e. Hapa shennyaki Jisui epü shah kü hinglemei layaongei lei.

⁵¹Büpa leishingkü büpalei chongphobüthü büpa pongnüng aongpü heüei büpa kü naü meidaiteke shei e.

⁵²Hanangkü büpai hathü kü büpa meiyei pangpü hepak phe, hatü jomphongi büpa kü, “Menyih haümhahphei hük baji kü meidaipeih” shei e.

⁵³Chepai büpa kü Jisui, “Anha meidaitü chongkahen hih” shei eshuohpü hepak kü khih shei nying. Hanangkü büpa hatü shem am kemei hinglem.

⁵⁴Shaang hapayü Jisui Judea leipü Galilei leipheikü dükpü nyipabü nyangeihepü nyuteke.