Read Phom Naga JOHAN 8 Bible Online

JOHAN 8 - Phom Naga bible

JOHAN 8

¹Hahepak kü jom peü shemei leidai, shejao Jisu payü Olive Kahshangei aongdai.

²Dhom mü shao büpa phopshemei pei. Shennyakthü peü büpa touei pei, hatü büpai jomphong kü nyuhhen pang.

³Shahkung nyuhbüthü hatü Pharisee ami büpa touei mükbongjuyung dükei nyushi yeppü nyüha hük müei dei. Jomi pinnyü khong peü touei yaonghütü,

⁴jomi büpa kü, “Nyuhbü, hapa nyühayü mükbongjuyung dükei nyushi yeppeih.

⁵Shaang Mosa Shahkungi hapa keipü nyühayü yaongi shükei jütuh shei eyei nyüke. Nüngiyao mekei ehenang?” shei phe.

⁶Jomi hapayü büpa nyonghühen shah laphen yemei dokei peiteke. Jisui aümei shatü büpalei lakjaangi kahdok kü nyangteke.

⁷Mechem jomi nedoh-i büpa kü pheyei chongjapa, büpa lanei yaongtü jomphong kü, “Amphong khongkü üpa kü mang nenyu, büpai shongei pinnyü kü yaongi shüktuh” shei e.

⁸Hapheikü büpa aümei shatü kahdok kü nyang.

⁹Mechem jomi ha danpa, behethü mü pangtü hükchem hükchem lüdaikem; Jisu monha hapa nyüha mü yaongshi tuhphong.

¹⁰Jisui lanei yaongei pinnyü kü, “Nyüha, hathü melei daipa? Üpaiyao nüng nenyonghü yo?” shei e.

¹¹Pinnyüi, “Hih, longpüba” shei e. Jisui, “Ngeiyao nüng nenyonghünyih. Leituh, hatü shaang mü leitü ne-ei mang tethah” shei e.

¹²Shao Jisui jomphong kü, “Ngeiyü kahdoknyü vangngai. Üpai ngei phei münya, vangnyak kü nekamhen, shejao yangnyu vangngai danghen” shei e.

¹³Phariseethüi büpa kü chengei, “Nüngi nüng jung denpü shuohnyüke; nüngi denpü shuohpeyü nejiü” shei e.

¹⁴Jisui jangei, “Ngei ngei nang denpü shuohhahlangmao, ngelei denpeyü jiütei; mehenangkü ngei meleipü peipa hatü melei dainya ngei ha nying, shejao ngei meleipü pei hatü melei dainya, ha ammi nenying.

¹⁵Ammiyü shennyakei laphen aimü shahphennyüke, shejao ngei üpa kao shahnephennyih.

¹⁶Shejao ngei paoh shah phenlangmao ngelei shahphenü jiüshi nyüpeih; mehenangkü hayü ngei moni phennyu nevai, shejao ngei hatü ngei shompü Pa henji-i phennyüpeih.

¹⁷Ammei shahkungei pa nyi-i denpü shuohpeyü jiüpeih shei enyüke.

¹⁸Ngei ngei nangkü denpü shuohnyeih, hatü ngei shompü Pa-i ngei nangkü denpü shuohnyeih” shei e.

¹⁹Hahepak kü jomi büpa kü, “Ampa melei nyüpa?” shei phe. Jisui, “Ammi ngei nevaijü Opa nenying. Ammi ngei nyinglang meyü Opayao nyinghen vaipeih” shei e.

²⁰Jisui hathü shah phopshem mop jaoshingei nyuh-ei nyushi e, shejao üpaiyao büpa neyep; mehenangkü büpalei hepak shao-üng mangngoi-i nyuteke.

²¹Nyipabü Jisui jomphong kü, “Ngei lüdainyeih, hatü ammi ngei yemhen, shejao amphongü ammei mang kü dihen. Ngei melei dainya, halei am nepeiaokpih” shei e.

²²Hahepak kü Jehoda ami, “Büpa laophü nyingi jühahnüng hiang? ‘Ngei melei dai, halei am nedaiaokpih’ sheiyü büpai ha nang epü hiang?” shei e.

²³Jisui jomphong kü, “Amphongü phang leipü, ngeiyü shangphi leipü; amphongü kahdoknyülei, ngeiyü kahdoknyülei nevai.

²⁴Ammei mang kü am dihen hih shei ngei am kü etepih; ammi ngeiyü büpa shei hingnelempü thahshi amphongü ammei mang kü dihen” shei e.

²⁵Jomi büpa kü, “Nüng üpaang?” shei phe. Jisui jomphong kü, “Ngei amphong mü mehe vainüng eteihen?

²⁶Ngei amphong nang shahphenei ehen longi nyüpeih, shejao üpai ngei shom büpayü shahhing, hatü ngei mehe büpa leipü dan, ha kahdoknyü kü enyüpeih” shei e.

²⁷Büpai Pa jung enyeih shei jomi ha nyingei neaok.

²⁸Hanangkü Jisui jomphong kü, “Mechem ammi Shennyak Ha shangei lungei anshihhen, hahepak kü ammi ngeiyü büpa khih shei nyinghen, hatü ngei mongpü meheyao nedüknyih, shejao Pa-i ngei kü epü douthü jung enyüpeih.

²⁹Üpai ngei shom, büpa ngei mü nyüpeih; büpai ngei mon netuhphongnyih; mehenangkü ngei düngei büpai mehe kü mong hah, ha düknyüpeih” shei e.

³⁰Büpai hathü shah eshingkü longshishing büpa kü hinglem.

³¹Hahepak kü Jisui Jehoda am büpa kü hinglempüthü kü, “Ammi ngelei shah bangjema, am hingshangpü ngelei nanglomthü;

³²hatü ammi shahhing nyinghen, hatü shahhingi am bümei leihühen” shei e.

³³Jomi büpa kü, “Hamphongü Abrahamei hühihathü hatü ham üpalei aayao nevaihampeih. ‘Am bümei leihühen’ shei epeyü mehe lappa?” shei e.

³⁴Jisui jomphong kü, “Hingmei ngei am kü enyeih, mang thahpü peü mangei aathü hih.

³⁵Shemong hük kü aa hük mechemao denshing nenyunyih, shejao hapeü-ü denshing nyushing nyüpeih.

³⁶Hanangkü Ha-i am bümei leihüjema, am bümei vaidaihen.

³⁷Amphongü Abrahamei hühihathü shei ngei nyingnyüke, shejao ammi ngei jühen lem yemnyüke; mehenangkü am kü ngelei shah nyuishing neshiü.

³⁸Pa nyushingei ngei mehe ee, ngei ha enyüpeih; amphongiyü Pa leipü mehe dan ha düktuh” shei e.

³⁹Jomi büpa kü, “Abrahamü hamei pa hih” shei e. Jisui jomphong kü, “Amphong Abrahamei hapeüthü vailangmeyü Abrahami dükpü douthü ammi dükhah shepeih,

⁴⁰shejao shaang ngei Kahvang leipü danei shahhing ephopü shennyak, ngei jühen khenyüke. Abrahami dükpeyü ha nevaipih.

⁴¹Amphongiyü ampa ami mehe dük, ha düknyüke” shei e. Jomi büpa kü, “Hamphongü shounghathü nevaipih; hamei pa hük nyüpeih, hayü Kahvang” shei e.

⁴²Jisui jomphong kü, “Kahvangü ammei Pa vailangmeyü ammi ngei kü bamhah shepeih; mehenangkü ngei Kahvang leipü peipeih, hatü shaang ngei hatouei nyüpeih. Ngei mongpü kü ngei nepei, shejao büpai ngei shompeih.

⁴³Ngei epü ammi mehekei nedannya? Hayü ammi ngelei shah neyahpü nangkü hih.

⁴⁴Amphongü ampapa am kahshihthü leipü khih, hatü ammei ampapa ami lümpü dükhen jenyüke. Büpayü panghinüng shennyak jüpü am nyupeih; shahhing kü neshoung; mehenangkü büpa kü shahhing nenyu. Mechem büpai shahshem ehen, büpai büpalei nyingnyoi aimü enyüke; mehenangkü büpayü shahshem ebüthü hatü shahshemei pa.

⁴⁵Shejao ngei shahhing epü nangkü ammi ngei kü hingnelem.

⁴⁶Am üpai ngei kü mang nyüke shei eaokhen? Ngei am kü shahhing ephüjü mehekei ammi ngei kü hingnelemnya?

⁴⁷Üam Kahvang leipü nyüpa, Kahvangei shahthü bangnyeih. Amphongi hathü nebangpü lappeyü amphongü Kahvang leipü nevai” shei e.

⁴⁸Jehoda ami büpa kü jangei büpa kü, “Hami nüng kü Samaria am khih hatü nüng kü kahshih nyüke shei epeyü ham nejiüpü je?” shei e.

⁴⁹Jisui, “Ngei kü kahshih neshiüpih, shejao ngei Opa kü dhüm shuohnyeih, hatü ammi ngei kü dhüm nehunyu.

⁵⁰Ngei ngei shing müknyinshekhang neyemnyih; shejao ha yempü hük nyüke, hatü büpayü shahphenbü nyüke.

⁵¹Ngei am kü shahhing enyeih, üpai ngelei shah bangnya, büpa mechemao nedipih” shei e.

⁵²Jehoda ami büpa kü, “Nüng keyü kahshih nyüke shei shaang hami nyingteke. Abraham didai, hapa keiha thibüthüao didaiteke, shejao nüngi, ‘üpai ngelei shah bangnya, mechemao dipü ne-eepih’ shei enyüke.

⁵³Didaipü hamei pa Abraham mü nüng longpü je? Thibüthüao didaiteke. Nüngü üpa hih shei deihhahnya?” shei e.

⁵⁴Jisui jangei, “Ngei nyingi müknyinshekhanghahjema, ngelei müknyinshekhangü angsha. Ngei müknyinshekhanghüpeyü ngelei Opa hih; ammi büpa nenyingjao üpa jung ammi ‘Büpayü hamei Kahvang’ shei enya, hayü büpa hih.

⁵⁵Shejao ngei büpa nyingnyeih; ngei büpa nenyingnyih shei ejema ngeiyao am kei shahshem epü am leidaihen. Shejao ngei büpa nyingnyeih hatü büpalei shah bangnyeih.

⁵⁶Ammei pa Abrahami ngelei nyih deih-ei mongongpeih, hatü büpai ha eetü mongongteke” shei e.

⁵⁷Hahepak kü Jehoda ami büpa kü, “Nüngü bong pinyipüanao manglomjü nüngi Abraham eephei je?” shei e.

⁵⁸Jisui jomphong kü, “Hingmei ngei am kü enyeih, Abraham shekü ngei nyuhampeih” shei e.

⁵⁹Hanangkü jomi büpa kü shükhen yaong hom, shejao Jisu jodai, hatü phopshem leipü lüdai.