Read Phom Naga JOHAN 9 Bible Online

JOHAN 9 - Phom Naga bible

JOHAN 9

¹Jisu daishingkü mükphüngdaitü bühpü shennyak hük ee.

²Büpalei nanglomthüi büpa kü, “Nyuhbü, hapa shennyak mükphüngdaitü bühhen meyü üpai mang thahpa, büpai hi nyühipa homei vampa?” shei phe.

³Jisui e, “Hapa shennyak nevaijü nyühipa üpaiyao mang nethah; büpa mükphüngdaitü bühpeyü Kahvangei dou büpa kü shakei vamhen shingvaishi nyüke.

⁴Üpai ngei shom, büpalei dou jeni vangngai kü dükhen vongbong; üpaiyao dou nedükaokhen mü vangnyak peikünyüke.

⁵Ngei kahdoknyülei nyupü thahshi ngei kahdoknyü vangngai.”

⁶Büpai ha epheikü, büpai kahdok kü yu-op shaotü nyetei ashem leihütü ha yah-ei büpalei mük kü nyiotü,

⁷büpa kü, “Daiyei Siloam yungyenei paütüktuh” shei e. (Hapa lappü, Deishihpü). Hapheikü büpa daiyei paütüktü mük eeyei shemei lei.

⁸Jomei chingyowthü hatü shelei büpa yühahjaiyingei eepüthüi, “Uoshi yühah-ei nyuteipü shennyak nevai je?” shei phetei.

⁹Hanei ami, “Hayü büpa khih” shei e. Lebüthüi, “Nevai, hayü büpa lepü lebü shennyak khih” shei e. Shejao büpai, “Hapayü ngei hih” shei nedoh-i e.

¹⁰Shejao jomi büpa kü, “Shejema mekei etü nüngei mük appa?” shei nedoh-i phe.

¹¹Büpai jomphong kü, “Jisu shei menpü shennyaki ashem nuitü ngelei mük kü nyiotü ngei kü, ‘Daiyei Siloamei paütüktuh’ shei ephopeih. Hanangkü ngei daiyei paüjü ngelei mük eepeih” shei e.

¹²Jomi büpa kü, “Büpa melei nyüke?” shei phe. Büpai, “Ngei nenying” shei e.

¹³Jomi shelei mükphüngdaitü nyupü shennyak Phariseethü touei müei dei.

¹⁴Jisui ashem nuitü mük kü nyiotü mük vamhüpeyü Sabbath nyih jiüteke.

¹⁵Hahepak kü Pharisee ami büpalei mük mekei eeaokpa ha büpa kü phe. Büpai jomphong kü, “Büpai ngelei mük kü ashem nyiophopeih. Hapheikü ngei paütükpeih hatü shaang ngei mük eenyüpeih” shei e.

¹⁶Pharisee am hanei-i, “Hapa shennyakü Kahvang leipü nevai; mehenangkü büpai Sabbath jiüshi nethemnyu” shei e. Shejao lebüthüi, “Mang shennyak hüki mekei etü hapa keipü yashanyale dou dükaoknüng” shei e. Khongü nyi vaishi hantü nyu.

¹⁷Hanangkü jomi shao mükphüngpa kü, “Nüngiyao büpa nang mekei enya? Nüngei mük appeyü büpa je?” shei e. “Büpayü thibü hük khih” shei büpai e.

¹⁸Mük meidaipülei nyühipa mangnyük thahshi Jehoda ami hapa shennyak mükphüngdaitü nyupü meipü khih shei hingnelem;

¹⁹hatü nyühipa nyi kü, “Hapayü anjilei ha mükphüngdaitü bühpeih shei epü vaila? Mekei etü büpai shaang eeaoknya?” shei phe.

²⁰Büpalei nyühipai, “Hapayü hamei hapeü shei nyingnyüke hatü büpayü mükphüngdaitü bühpeih;

²¹shejao mekei etü büpai shaang eeaoknya hami nenyingang, nevaijü üpai büpalei mük appa nenying; büpayao nethe leidai; büpai-üng büpa nang ekahen hih” shei e.

²²Chenyü chepai hayü Jehoda am kü nyempü nangkü eteke; mehenangkü üpai Jisu-ü Messiah shei lahhenshang Sinagog leipü changtükhen shei Jehoda ami temtüktü nyu.

²³Hanangkü chenyü chepai, “Büpa nethe leidai; büpa kü phehahtuh” shei e.

²⁴Hanangkü nyipabü jomi hapa mükphüngdaipü shennyak nyükei büpa kü, “Kahvang müknyinshekhangtuh! Hapa shennyakü mang shennyak shei hami nyingteke” shei e.

²⁵“Hapa shennyakü mang shennyak hi nevaipa, ngei nenying. Ngei nyingpeyü ha mon: Ngei mükphüngdaitü nyupeih shejao shaang ngei eenyeih” shei büpai e.

²⁶Jomi büpa kü, “Büpai nüng kü mehe dükphopa? Büpai nüngei mük mekei apphopa?” shei phe.

²⁷Büpai jomphong kü, “Ngei amphong kü ephei hih, ha ammi nebangpeih. Mehekei ammi shao hapa banghünya? Amphongao büpalei nanglomthü leihünyu je?” shei e.

²⁸Hahepak kü jomi büpa kü eelaei, “Nüngü büpalei nanglom, shejao hamphongü Mosalei nanglomthü.

²⁹Kahvangi Mosa homei eteipeih, shejao hapa shennyakü meleipü peipa hami nenying” shei e.

³⁰Hapa shennyaki, “Hapayü thamabenüng dou khih! Büpa meleipü peipa ammi nenying, shejao büpai ngelei mük appeih.

³¹Kahvangi mangthülei shah nebangnyih shei jeni nying, shejao üpai büpa kü khüm, hatü büpai mongpü dükpüthülei shah bangnyeih.

³²Kahdoknyü vamhinüng üpaiyao mükphüngdaitü bühpü shennyakei mük vamhüpü nedanangpih.

³³Hapa shennyak Kahvang leipü nevaijema, büpai meheyao nedükaokpih” shei e.

³⁴Jomi büpa kü, “Nüngü bühhinüng mang kü bühteke, hatü nüngi hamphong küang nyuhnüng yaongnyu je?” shei e, hatü jomi büpa Sinagog leipü changtük.

³⁵Büpa changtükpü jung Jisui dan, hatü mechem büpai büpa pongpa, büpai, “Nüngi Shennyak Ha kü hinglemnyüla?” shei e.

³⁶“Longpüba, büpa üpaang? Ngei büpa kü hinglemhen hih, eshih” shei e.

³⁷Jisui büpa kü, “Nüngi shaang büpa eeteke, hatü shaang nüng mü shah eteipeyü büpa hih” shei e.

³⁸Büpai, “SHEMBÜPA, ngei hinglemnyeih” shei e, hatü büpai büpa kü khüm.

³⁹“Ngei kahdoknyülei peipeyü ne-eepüthüi eehen, hatü eepüthü mükphünghen nangkü shahphenhen peipeih” shei Jisui e.

⁴⁰Büpa yopailei nyupü Pharisee am hanei ha danei büpa kü, “Mehe? Hamphongü mükphüngpü am je?” shei e.

⁴¹Jisui jomphong kü, “Am mükphüngpü am vailangmeyü am mang nethahhen vaipeih. Shejao shaang ammi, ‘Hami eenyeih’ shei epü nangkü ammei mang nedoh-i nyüke” shei e.