Read Phom Naga PHONGSHANTHÜ DOU 1 Bible Online

PHONGSHANTHÜ DOU 1 - Phom Naga bible

PHONGSHANTHÜ DOU 1

¹Bampü Theophilus, shongpü ngelei lai kü chongpangpülei Jisui dükpü hatü nyuhpü peü,

²büpai jepü phongshanthü kü Laangha Daülangpü homei nyuhpheikü büpa vangsholei manganlangpü nyih thahshilei jung ngei nyangteke.

³Büpa shangpong pheikü ajükiyao nejü-ühen mü büpa jom touei yemmü vamei hu, hatü nyih pinyi yangkü jomphong touei vamei Kahvang ongching jung eteke.

⁴Mechem jomphong mü hahyingei nyupa, büpai jomphong kü Jerusalem tuhtü nedaihen, shejao Pa-i lahpü thintho danei nyuhen ngeükhüam shuoh. Mepa jung ngei epü ammi danpa, hayü hapa khih.

⁵Mehenangkü Johani yung kü baptükteke, shejao shaang mebü nyih longi nenyui amphong kü Laangha Daülangpai baptükphahen.

⁶Hanangkü mechem jomphong chemi peipa, jomi büpa kü, “SHEMBÜPA, nüngi Israel am kü ongching nyokei shuohhen ha hepak je?” shei phe.

⁷Büpai jomphong kü e, “Opai laophülei wonghingani temei tuhlangpü hepak nevaijü nyih nyinghen hayü am shingvaishi napü neshiü.

⁸Shejao mechem Laangha Daülangpü am kü peikahen, ammi ngan yahhen, hatü amphongü Jerusalem, Judea hatü Samaria peü kü hatü kahdoknyü dohpü ngoishi ngelei denbüthü vaihen.”

⁹Mechem büpai ha eyei kempa, jomphongi veishi nyushi büpa vangsholei anlang hatü phumi büpa banglang.

¹⁰Büpa anlangpü kü jomphong veishi nyushi ngangahük kü shennyak nyi shola ow temtü jomphong touei peiyei yaong.

¹¹Jijinyi-i, “Galil am, mehekei amphongi vangshangei veishi hatouei yaongnya? Hapa aihük Jisu üpa am toueipü vangsholei anlangi eenya, hapa kei-üng büpa yiükahen” shei eteke.

¹²Hapheikü jomphongi Jerusalem yopai leipü sabbath nyih kamaoksham taishi nyupü Olive Kahshang leipü Jerusalemei nyokei lei.

¹³Mechem jomphong chingnyülei leiyei shüpa, jomi Peter, Johan, Jakob, Andrew, Philip, Thomas, Bartholomia, Mathi, Alpheaslei ha Jakob, Nyakpükenpü Simon hatü Jakobei cheha Judas hathü nyupü dokpa dung-amei aongteke.

¹⁴Jom peü nedoh-i lanei shuoh-ei phopei nyu, hatü jomphong mü nyühathü, Jisulei chenyü Mary hi büpalei chenaüthüao omshi nyuteke.

¹⁵Hathü nyih kü vaipü jeihinaüthü touei Peter yaongei, (ha khong kü shennyak kho hük mü kukha hükshing nyu),

¹⁶“Jeihinaüthü, Jisu yeppü khong kü mübü vaipü Judas nangkü Laangha Daülangpai David homei tetei nyupü laihingü dhaümteke;

¹⁷mehenangkü büpayü jenphong mü bhei-ie kü omei nyupeih hatü hapa chongphopü dousho kü hean hanteke” shei e.

¹⁸(Shaang hapa shennyakü büpalei nemeipü doui dangpü lopi shakpü kah hük nyu; büpa halei dhongdhongi doei vom bhaoei leihilang kemei vamei di.

¹⁹Hapa jung Jerusalemei nyupü peüi nying; hanangkü hapa kah kü jomei shah mü, Akeldama, lappai, “Iy Kah” shei nyükteke.)

²⁰Mehenangkü Menvih Kesho lai kü ha nyangei nyüke: “Büpalei kahphei shemshing kong leihütuh, halei üpayao tenyuhü,” hatü, “Büpalei mübü hean mih lebü hüki yahhütuh.”

²¹“Hanangkü SHEMBÜPA Jisu jenphong mü daipü leipü hepak peü kü jenphong mü nyupü shennyakthü khongkü hük,

²²Johani baptükpü kübü pangei jen toueipü büpa manganlangpü nyih thahshi nyupü shennyak hük jehen vongbong khih. Mehenangkü hathü khongkü jepü hükü jenphong mü büpa yangei leipü kü denbü vaihen vongbong” shei Peteri eteke.

²³Hanangkü jomphongi shennyak nyi, Justus sheiyao nyükpü Barsabbas shei menpü Joseph, hatü Mathia nyi jeteke.

²⁴Hapheikü jomphongi, “SHEMBÜPA, nüngi peüei mong nyingei nyüke. Nüngi henyi khongkü üpa jepa?

²⁵Judas-i büpalei shingei lüdainüng yakphongpü hapa phongshan dousho üpai jeiyei kohen ham kü hushih” shei phopei e.

²⁶Jomphongi phongyom, hatü hapa phong Mathia kü hetteke, hatü büpa anpühük kü üteke.