Read Phom Naga PHONGSHANTHÜ DOU 10 Bible Online

PHONGSHANTHÜ DOU 10 - Phom Naga bible

PHONGSHANTHÜ DOU 10

¹Kasarealei shennyak hük Kornelius shei menpü nyu; büpayü Italy Veshan shei nyükpü khongkü kho hük shak kü mübü nyuteke.

²Büpayü Kahvang kü hinglempü shennyak; büpa hatü jom shem kemei Kahvang kü nyempü shemong nyuteke. Büpai shennyakthü kü nekaungi shuoh, hatü Kahvang kü düngei phophamteke.

³Chem om jem baji mongkü büpai manghkhang hük kü Kahvangei vangsho phongshan hük büpa touei longi lekshi peiyei, “Kornelius” shei eshuoh-ei eeteke.

⁴Büpai büpa kü nyemei veitü, “SHEMBÜPA, meheang?” shei e. Büpai, “Nüngi phoppü hatü nüngi mih kü sheühpü nebehen mü Kahvang ngoiteke.

⁵Shaang Peter shei menpü shennyak hük, Simon nyüknüng Joppalei shennyak hanei shomtuh;

⁶büpayü yungkungei shem nyupü ashakshem lingbü Simon am shemei ngoiyei nyüke” shei eteke.

⁷Mechem büpa mü shah eteipü vangsho phongshan büpa tuhtü lüdaipa, büpai büpalei aa nyi hatü büpa chongphobü hinglempü veshan hük nyük,

⁸hatü büpai hathü kü lemphü epheikü büpai hathü Joppalei shomteke.

⁹Nyihphei haümhah hepak kü jomphong yen daipü chingnyü ngoiyaki Peter shem adokei phopnüng aong.

¹⁰Büpa aeiyei pei, hatü lemhük hahhüei deih; hatü nemnojapü hepak kü büpa yuiyei sha, hatü manghkhang hük ee.

¹¹Büpai vangsho aptüktü lemhük ba mü jung ali kü shentü kahdokei shajapü ee.

¹²Hapalei la ali kohpü yem, biühimak hatü shangou lemphü kohshi ee.

¹³Hapheikü büpai ngeü hük, “Paotuh Peter, hathü jüei hahtuh” shei epü dan.

¹⁴Shejao Peteri, “Anyoh, SHEMBÜPA; mehenangkü ngei mechemao sheihdaipü hatü nedaüpü yem nehah-angpih” shei e.

¹⁵Hapa ngeüi büpa kü shao nyipabü, “Mehe Kahvangi daütük, nüngi ha kü nedaüpü shei te-e” shei e.

¹⁶Hapakei jempa vam, hatü hapayü met shei vangsholei anlang.

¹⁷Shaang Peteri hapa manghkhangü mehe vaihenang shei longi jü-üei nyushingkü ngangahük kü Kornelius-i shompü shennyak jem peiteke. Jomphongü Simon amei shem yemei peshadenei yaongshi nyu.

¹⁸Jomi halei Peter shei menpü Simon nyüla shei phenüng nyük.

¹⁹Peteri nedoh-i ha manghkhang nang deihhah-ei nyushingkü Laanghai büpa kü, “Veituh, shennyak jemi nüng yemnyüke.

²⁰Shaang yaongtuh, yiütuh, hatü nejü-üi jomphong mü daituh; mehenangkü hathüyü ngei shompeih” shei e.

²¹Hanangkü Peter yiüei hathü kü, “Amphongi yempeyü ngei hih; am mehe nadang kü peiküpa?” shei phe.

²²“Veshan kho hük shak kü mübü Kornelius-i hamphong shompeih. Büpayü daülangpü hatü Kahvang nyempü shennyak hih. Jehoda am peüi büpa kü longi dhüm shuohnyeih. Nüngi mehe e büpai ha banghen shingvaishi daülangpü vangsho phongshani nüng jomei shemei nyükhen eshuohpüja” shei jomphongi jangei e.

²³Hanangkü büpai jomphong nyükei shüei paümteke. Nyihphei büpa layaongei jomphong mü dai, hatü Joppa leipü vaipüthü hanei büpa mü chemi dai.

²⁴Nyihphei jomphong Kasarea ngoi. Kornelius-ü jomphong omdanei nyu, hatü büpalei shem am hatü mongkhen küphüthü kao nyükteke.

²⁵Peter ngoija shingkü Kornelius-i büpa mü pong, hatü la tüngei aümei shatü khüm.

²⁶Shejao Peteri büpa phukei yaonghütü, “Yaongtuh, ngeiyü shennyak hük mon hih” shei eteke.

²⁷Peteri büpa mü shah eteiyei nyutü mongei shüjashingkü longi thaiyei chongjateke;

²⁸hatü büpai jomphong kü, “Jehoda am hük Kung am mü küeijemei nevaijü thümhenü shahkung kü nejiü shei am nyingi nyingei nyüke, shejao ngei üpa kao sheihdaipü nevaijü nedaüpü shei ne-ehen Kahvangi ngei kü huphopeih.

²⁹Hanangkü mechem ngei kü nyüknüng shompa, ngei nejü-üi peiküpeih. Shaang ngei pheshah, mehe nadang kü ngei nyüknüng shompa?” shei eteke.

³⁰Kornelius-i jangei, “Nyih ali daiteke, hapa hepak kü dem, jem baji kü ngei shemei phopei nyushingkü ngangahük kü shennyak hük nyangnyangpü ow owtü ngei touei peiyei yaongküpeih.

³¹Büpai ngei kü, ‘Kornelius, Kahvangi nüngi phoppü danteke, hatü nüngi taopathü kü doumei dükpü deih-ei dangteke.

³²Hanangkü Joppalei Peter shei menpü Simon nyüknüng deishihtuh; büpayü yungching yopailei ashakshem lingbü Simon am shemei ngoiyei nyüke’ shei ephopeih.

³³Hanangkü shüshülangi nüng nyüknüng shompeih, hatü nüngi kenei peiküteke. Hanangkü shaang SHEMBÜPAi nüng kü etuh shei epü shahthü banghen shingvaishi ham peü hammü Kahvang touei nyüpeih” shei eteke.

³⁴Hahepak kü Peteri jomphong mü ehen pang: Kahvangü baong hanei nenonyu shei ngei hingmei mü nyingnyüke,

³⁵shejao jat peülei üpai büpa kü nyem hatü mehe jiüpü dük, hayü büpai yahaokbenüng khih.

³⁶Büpai Israel nanglakthü touei Jisu Khrista homei chingmei chongvenei shompü shahjangmei ammi nyingei nyüke — büpayü peüei SHEMBÜPA.

³⁷Hapa shahjangü Johani baptükpü jung baonghinüng Galil kübü pangei Judea peülei yanei daiteke.

³⁸Mekei Kahvangi Nazareth am Jisu Laangha Daülangpai hatü ngani thiteiphu, hatü mekei büpai doumei dükei, hatü mang laanghai shüveihahpüthü meihüpa ammi nyingei nyüke; mehenangkü Kahvang büpa mü nyuteke.

³⁹Büpai Judea hatü Jerusalemei dükpü peü kü hamphongü denbüthü nyüpeih. Jomi büpa shophang kü apei jü;

⁴⁰shejao Kahvangi büpa nyih jempabü kü yangei leishih, hatü shakei vamei huhüteke;

⁴¹hayü shennyak peü touei nevai shejao Kahvangi denbüthü vaihen jepü hamphong touei hatü büpa yangei leipheikü üami büpa mü hah hatü ying hathü touei vamei huteke.

⁴²Büpai hamphong kü nanglakthü kü chongvenhen, hatü büpayü yemmü nyupü hatü dipüthülei shahphenbü vaihen Kahvangi jepeih shei denpü shuohhen shahkung shuohpeih.

⁴³Üpai büpa kü hinglem, büpalei men kü mang tükpü danghen shei thihivamthü peüi büpa jung denpü shuohnyüke.

⁴⁴Mechem Peteri shah eyei nyupa, shah danpü peü kü Laangha Daülangpü yiüei bakteke.

⁴⁵Peter mü peipü Jehoda ami Kung am kü dangkao Laangha Daülangpü thintho khüpnyüke shei longi thama;

⁴⁶mehenangkü hathüi shahlem laolao eyei Kahvang men longpü jomphongi danteke. Hahepak kü Peteri,

⁴⁷“Jeni keiha jomiyao shaang Laangha Daülangpü yahteke; hanei ami jom baptükhen bangei tuh-aokhen je?” shei e.

⁴⁸Hanangkü büpai Jisu Khristalei men kü baptükhen jomphong kü ngeükhüam shuoh. Hapheikü jomi büpa kü nyih kansho hük themhen pheteke.