Read Phom Naga PHONGSHANTHÜ DOU 11 Bible Online

PHONGSHANTHÜ DOU 11 - Phom Naga bible

PHONGSHANTHÜ DOU 11

¹Shaang phongshanthü hatü Judea leipü vaipüthüi Kung amiyao Kahvang shah yahteke shei dan.

²Hanangkü mechem Peter Jerusalemei aongjapa, japtükpü vaipüthüi büpa kü eelaei,

³“Mehekei nüngi nejappüthü touei daiyei jom mü hahyingpa?” shei e.

⁴Hahepak kü Peteri jomphong kü hük pheikü hük nih-ei ehen chongpang.

⁵“Mechem ngei Joppa chingnyülei phopei nyupa, ngei yuiyei sha, hatü manghkhang hük eepeih. Ba mü lemhük vangsho leipü jung ali kü shentü shanei ngei yopailei peiküpeih.

⁶Ngei hapa kü nenei veishingkü la ali kohpü yemhathü, phaüyem, biühimak hatü shangouthü eepeih.

⁷Shao ngeü hüki ngei kü, ‘Peter, paotuh, ha jüei hahtuh’ shei ephopeih.

⁸Shejao ngei, ‘Anyoh, SHEMBÜPA; mehenangkü sheihdaipü nevaijü nedaüpü meheyao ngelei ju kü mangshihpih’ shei eshuohpeih.

⁹Shejao nyipabü vangsho leipü ngeü hüki jangei, ‘Mepa Kahvangi daütük, ha kü nüngi nedaüpü’ shei te-e shei ephopeih.

¹⁰Hapakei jempa vamküpeih, hatü lemphü vangsholei shüei anlangphopeih.

¹¹Hapa hepak kü dem Kasarea leipü ngei nyüknüng shompü shennyak jem ngei ngoipü shemei ngoiküpeih.

¹²Laanghai ngei kü jom mü nejü-üi daihen ephopeih. Ngei mü jeihinaü jom vok omshi daiyei hapa shennyakei shemei ngoipeih.

¹³Büpai vangsho phongshan jem jom shemei peiyei yaongtü, ‘Joppalei shomtuh, hatü Peter shei menpü Simon müei leituh;

¹⁴nüng hatü nüngei shem am kemei yanghen büpai am kü shahjangmei ephahen’ shei eshuohpü jung büpai hamphong kü eküpeih.

¹⁵Ngei shah enüng pangjü chongpangpülei jen kü bakpükei Laangha Daülangpü yiüei jom kao bakteke.

¹⁶SHEMBÜPAi epü shah hük, ‘Johani yungi baptük, shejao amphongü Laangha Daülangpai baptükhen’ shei epü deih-ei peiküpeih.

¹⁷Jeni SHEMBÜPA Jisu Khrista kü hinglemshingkü büpai jen kü shuohpü aihük thintho Kahvangi jom kao shuohjema, Kahvangi epü bangtükhen ngei üpaang?”

¹⁸Mechem jomi ha danpa, jomphong nendai, hatü jomi Kahvang men longei, “Shejema Kahvangi Kung am kao yangnyuyem touei mülanghen mong lephen shuohhen khih” shei e.

¹⁹Shaang Stephen kü shüveidoideipü homei yanei daipüthüi Phoenicia, Cyprus hatü Antiokh kü nyupü Jehoda am kü mon shahjangmei eyei dai.

²⁰Shejao jomphong khongkü shennyak haneiyü Cyprus hatü Cyrene leipü nyu, hatü jom Antiokhlei peiyei Greek am kao SHEMBÜPA Jisu jung baong.

²¹SHEMBÜPAlei ngan jom mü nyu, hatü shennyak longi hinglem hatü SHEMBÜPA touei lep.

²²Jerusalem leipü attoilei hapa shahjang pei, hatü jomphongi Antiokhlei Barnabas shom.

²³Mechem büpa peipa, Kahvang phahji eeyei büpa mongong, hatü büpai peü kü lanei shuoh-ei SHEMBÜPA kü hinglemei nyuhen nangthongei e;

²⁴mehenangkü büpayü Laangha Daülangpü hatü hinglempai mapü shennyak mei nyuteke, hatü SHEMBÜPA touei shennyak longi müei lei.

²⁵Hapheikü Barnabas-ü Saul mü pongnüng Tarsuslei heih,

²⁶hatü mechem büpa pongpa, büpai büpa Antiokhlei müei lei. Hanangkü hapa bongyang kemei jijinyi-i attoi am mü thaiyeiyuei nanglak longi kü nyuhteke, hatü Antiokh leipü vaipü nanglakthü kü, “Khristan” shei shongei nyükei pang.

²⁷Hahepak kü thibüthü hanei Jerusalem leipü Antiokhlei yiü.

²⁸Jomphong khongkü Agabus shei menpü hük yaongei kahdoknyü peü kü münghishaü mangshi nyuhen khih shei Laangha homei tetei e, hatü hapayü Klaudius-i vanglem lempü hepak kü vamteke.

²⁹Nanglakthüi laophüi aokpü kei peüi Judealei nyupü vaipüthü kü sheühpü shomhen temteke;

³⁰jomi hayü Barnabas hatü Saul nyi mü shomei attoi behethü kü dükteke.