Read Phom Naga PHONGSHANTHÜ DOU 12 Bible Online

PHONGSHANTHÜ DOU 12 - Phom Naga bible

PHONGSHANTHÜ DOU 12

¹Ha shan kü Herod ongpai attoi am hanei kü lak shihteke.

²Büpai Johanei chenaü Jakob yani jü.

³Hakei dükpai Jehoda am mongmeihünyu khih shei eeyei büpai Peter-ao yephen dai. (Hapayü Daw Neshihpü Aan Mo hepak kü nyuteke.)

⁴Mechem büpai Peter yeppa, büpai büpa khoklatei küp, hatü veshan ali ali nyupü khong ali kü büpa yomtuh shei lanei shuoh. Herodi Hompü Mo pheikü nanglakthü touei deiyei büpa shahphenhen deihshi nyu.

⁵Mechem Peter khoklatei nyupa, büpa shing attoi ami lanei Kahvang kü phop.

⁶Herodi büpa shahphennüng deihen yashong Peter-ü veshan nyi aa kü nyiamvü nyi shentü shishi nyu, hatü yombüthü shadenei khoklat yomei nyu.

⁷Ngangahük kü SHEMBÜPAlei vangsho phongshan hük peiyei büpa paümshingei vangngai khang. Büpai Peterlei bhagchong kü düktü phukei, “Lomi paotuh” shei büpai e, hatü lak leipü nyiamvü vüdai.

⁸Hahepak kü vangsho phongshani büpa kü, “Shüngshep wongtuh, lathuh thuhtuh” shei e, hatü Peteri hapakei dük. “Ashak ngeih-ei ümtü ngei phei mükei” shei e.

⁹Peteri khoklat leipü vamei büpa phei müei dai, shejao vangsho phongshani mehe dük, hayü hingmei vaila phonehingi nyu; manghkhang hük eenyu vaaishang shei büpai deih.

¹⁰Jijinyi-i shongpü hatü nyipabü yombüthü peih-ei chingnyülei daipü nyiam shaden ngoi. Hapa shaden nyingnying apdaitü jiji laoei daiyei chingyangshongei kamei nyu; hahepak kü ngangahük kü vangsho phongshani büpa tuhphong.

¹¹Hahepak küang Peteri büpa nyingi deih-ei dang hatü, “SHEMBÜPAi laophülei vangsho phongshan shompü khih shei shaangang ngei nyingnyüke, hatü Herodei lak leipü hatü Jehoda ami omdanei nyupü kübü yangpü khih” shei e.

¹²Büpai ha nyingpheikü büpa Mark sheiyao lebü men menpü Johanei chenyü Mary am shemei heih; halei longi thaiyei phopei chongjateke.

¹³Mechem büpai chingshe shaden kü khungpa, nela hük meni Rhoda oitü vam.

¹⁴Peterlei ngeü nyingei pinnyü longi mongongei shaden aphen nangjeiyei pinnyü mokei shüei Peter chingshelei yaongshi nyüke shei baong.

¹⁵Jomphongi pinnyü kü, “Nüngü ngadainyu khih!” shei e. Shejao pinnyüi hapayü hingmei hih shei nedoh-i e. Jomphongi, “Hapayü büpalei vangsho phongshan vaihen hih” shei eteke.

¹⁶Shejao Peteri nedoh-i khung, hatü mechem jomi sha apshuohpa, jomi büpa ee, hatü yashan.

¹⁷Büpai jomphong kü laki huei nenmü nyuhen e, hatü mekei SHEMBÜPAi büpa khoklat leipü müei ngaipa, ha jomphong kü nih-ei eteke, hatü büpai, “Ha jung Jakob kü hatü vaipüthü kü eyeishuoh” shei e. Hapheikü büpa layaongei lebü shingei lüdai.

¹⁸Mechem vangngaipa, Peter mehe vaipa shei veshanthü mopei nyu.

¹⁹Herodi büpa yemjao büpa nedang, hanangkü büpai yombüthü kü meishi dokei veitü jomphong jühen ngeükhüam shuoh. Hapheikü büpa Judea leipü Kasarealei yiüei halei nyu.

²⁰Shaang Herodü Tyre hatü Sidon nanglakthü kü longi mongshih-ei nyu. Hanangkü jomi khong lingtü büpa mü pongnüng pei. Shongpüba kü jomi ongshemei ongpa chongphopü Blastus yawhei yah. Hapheikü jomi Herod touei peiyei chingmei linghen khümei e; mehenangkü jomei kahmükü ongpalei kahmük leipü hahying shuohpü kü nyaangtü nyuteke.

²¹Itteipü nyih Herodi ong-ow temtü ong uoshingei uotü nanglakthü touei shah e.

²²Nanglakthüi, “Hapayü shennyaki enyu nevai, Kahvangi enyu khih” shei lenei e.

²³Shejao büpai Kahvang kü müknyinshekhang neshuohpü nangkü ngangahük kü SHEMBÜPAlei vangsho phongshani büpa kü bhei, hatü büpa laongi hah-ei di.

²⁴Shejao Kahvangei shah da khan da hatü vaipüthü longi vam.

²⁵Hapheikü Barnabas hi Saul nyi-i jijilei kangpü dousho tempheikü Jerusalemei lei, hatü jiji mü Mark shei lebü men menpü Johanao müei lei.