Read Phom Naga PHONGSHANTHÜ DOU 13 Bible Online

PHONGSHANTHÜ DOU 13 - Phom Naga bible

PHONGSHANTHÜ DOU 13

¹Shaang Antiokh leipü attoilei thibü hatü nyuhbüthü nyuteke. Jomphongü Barnabas, Simon, üpa kü Niger shei nyük, Cyrene am Lucius, Herod governor mü nyuei longpü Manaen, hatü Saul nyu.

²Mechem jomi SHEMBÜPA kü khümei shüaeiyungleyei nyupa, Laangha Daülangpai jomphong kü, “Mepa dou shingvaishi ngei jiji nyük, ha dou dükhen ngei shingvaishi Barnabas hi Saul nyi khaatei deishihtuh” shei e.

³Hapheikü shüaeiyungleyei phop pheikü jomi jiji kü laki shüngteke, hatü shomteke.

⁴Hanangkü Laangha Daülangpai shompü nangkü jomphong Seleucialei yiü, hatü haleipü Cypruslei (yungching homei) heih.

⁵Mechem jomphong Salamis ngoipa, jomphong Jehoda amei Sinagoglei Kahvangei shah chongven. Jiji mü sheühteihen Johanao jiji mü nyuteke.

⁶Mechem jomphong shübaong kemeilei Paphos thahshi daipa, jomphongi phongyomteipü Jehoda am shahshem thibü hük Bar-Jisu shei menpü pongteke.

⁷Büpayü governor Sergius Paulus mü sheühteipü küphü nyu. Hapa governor-ü longi nahpü shennyak hük nyu; büpai Kahvang shah danhahhüpü nangkü Barnabas hi Saul nyi kü nyükteke.

⁸Shejao hapa phongyombü Elymas-i (hayü Greek shah mü büpalei men nyu) jiji khüei yaong, hatü büpai governor-i hinglemhen kübü leplangnüng khe.

⁹Hahepak kü Saul, üpa kü Paul sheiyao nyük, Laangha Daülangpai maei Elymas kü khangei veitü,

¹⁰“Nüngü kahshihlei ha, jiüpü lemphülei vepa. Nüng keyü lueilem hatü ühing peü maei nyüke. Kangshangpü SHEMBÜPAlei lem kaokeinyomei lingpü nedohhen je?

¹¹Shaang SHEMBÜPAlei lak nüng khüei nyüke. Nüngei mük kansho hük shing phüngdaihen, hatü nüngi vanghenyü vangngai ne-eehen” shei eteke. Ngangahük kü büpalei mük kü nyaühiphum kei pei, hatü hanei ami büpalei lak kü düktü mühühen bomeipangei dai.

¹²Mechem governor-i ha eepa, büpai hinglem, mehenangkü SHEMBÜPA jung nyuhpü kü büpa yashanteke.

¹³Hapheikü Paphos leipü Paul hatü büpalei küphü nyi Pamphilia kahdok Pergalei yung homei heih. Shejao Johanü jiji tuhphongtü Jerusalemei leidai.

¹⁴Shejao jiji Perga leipü daiyei Pisidia leipü Antiokh ngoi, hatü Sabbath nyih jiji Sinagoglei peiyei uoteke.

¹⁵Shahkungnyü hatü thibü laithü iepheikü Sinagog leipü lakchongbüthüi jiji kü shahjang shomei, “Jeihinaü nyi, nanglakthü kü nangthong shah ehen nyujema etuh” shei e.

¹⁶Hanangkü Paul yaongei lak aülaüei eteke: Israel shennyak, hatü Kahvang kü khümpü am Kung am, ngei epü bangtuh!

¹⁷Israel nanglakthülei Kahvangi jenei bühipa je, hatü Ijiplei nyushingkü nanglak dahüpeih. Wong longpai büpai hapa kahmük leipü müei lüdaipeih.

¹⁸Bong pinyi hükshing jahpanei büpai jom kü jungpeih.

¹⁹Büpai Kananei jat nyet neütüktü büpai jomei kahdok büpalei nanglakthü kü mükjüp vaishi shuohpeih.

²⁰Ha peüshep bong 450 yahpeih. Hapheikü büpai Samuel thibülei hepak thahshi kü shahphenbüthü shuohpeih.

²¹Hapheikü nanglakthüi ong hük yüpeih, hatü Kahvangi Benjamin phang kübü Kishlei cheha Saul, ong vaihen shuohpeih, hatü büpai bong pinyi ong vaipeih.

²²Saul dohtükpheikü büpai David yah-ei jomei ong vaihüpeih. Büpai büpa nang hei e: “Ngelei mongi napükei ngei Jesselei cheha David dangteke; ngei dükhahhüpü dou peü büpai dükkahen.”

²³Hapa shennyakei hüshompheinaü kübü Kahvangi Israel jat kü lahpükei Yemleipü Jisu shuohteke.

²⁴Jisu peishekü Johani Israel am peü kü mong lepei baptükpü jung nyuhteke.

²⁵Johani büpalei dou temyaki büpai, “Ngeiyü üpa hih shei deihnya? Ngeiyü ammi omdanpüba nevai. Shejao ngei pheikü hük peikünyüke; ngeiyü büpalei lathuh vü-ao lainüng neaok” shei e.

²⁶Ngelei jeihinaüthü, am Abraham phang kübü hühihathü, hatü Kahvang nyempü Kung shennyakthü, jen kü hapa yemleipü shahjangü shompeih.

²⁷Mehenangkü Jerusalem kü nyupüthü hatü jomei mübüthüi sabbath ieyei jomi ieteipü thihivam shahthü jomi nenying nevaijü nedanaok; hathü shah-ü jomi büpa nyonghüpai dhaümhüpeih.

²⁸Jomi büpa jühen shangpü mang meheyao nedangjao jomi Pilat kü büpa jühen yüpeih.

²⁹Mechem jomi büpa nang nyangpü peü dükei tempa, jomi büpa shophang leipü yah-ei mahngchong hükei vüphongpeih.

³⁰Shejao Kahvangi büpa dipü kübü yangei leishih,

³¹hatü Galil kübü Jerusalem thahshi büpa mü aongpüthü kü nyih longi kü vamei huteke, hatü shaang jomphongü nanglakthü kü ha denpü shuohnyeih.

³²Hami am touei shahjangmei koei peikünyeih; mepa Kahvangi jenei bühipathü kü dükhen shei lah,

³³ha jomei hapeüthü jen kü büpai Jisu dipü kübü yangei leishihpai dhaümteke. Nyipabü Menvih Kesho kü ha nyangei nyüke: “Nüngü ngelei Ha, shinnyih ngei nüngei Pa leitepih.”

³⁴Kahvangi büpa dipü kübü yangei leishihhen, hatü neshehen shei epü hapakei eyei nyüke: “Ngei amphong kü daülangpü, hatü ngei David kü lahpü hingshangpü moihiman shuohhen.”

³⁵Büpai shao lebü lai kao hapakei enyüke: “Nüngi laophülei Daülangpü Hük mahngchongei neshehühen.”

³⁶Mehenangkü Davidi büpalei den kü Kahvangei mükhong dükpheikü büpa di, chebü chepa am mü mahng vü, hatü büpalei büm mahngshalei shedai.

³⁷Shejao Kahvangi üpa dipü kübü yangei leishih büpa kü ha nevam.

³⁸Hanangkü jeihinaüthü, am kü ha nyinghünyeih, Jisu homei mon mang tükpü nyüpeih shei am kü chongvennyeih.

³⁹Mosa shahkungi dah neshakhüaokpü lemphü kübü hinglempüthü peü büpa homei dah shaknyüpeih.

⁴⁰Hanangkü thihivamthüi epü ha am kü nejiühühen lituh:

⁴¹“Veituh, amphong mih vüshihpüthü! Am thamatuh, hatü didaituh! Mehenangkü ammei nyih kü ngei dou hük düknyeih; hanei ammi am kü ejao ammi hapa kü hingnelemhen.”

⁴²Paul hi Barnabas nyi lüdaishingkü nanglakthüi jiji kü ngoikei sabbath kao hathü douthü jung ehen eshuohteke.

⁴³Mechem Sinagoglei thaipü yanpa, Jehoda am hatü Kung am Jehoda vaipü vanglem kü leppüthü Paul hi Barnabas nyi phei mü, hatü jijinyi-i jom kü Kahvang phahji kü nedoh-i nyuhen eshuoh.

⁴⁴Nepü sabbath kü chingnyü kübü kemei vaishi Kahvang shah bangnüng thai.

⁴⁵Shejao mechem Jehoda ami thaipü khongnyü eepa, jomi mükhakpai ma, hatü Pauli epü kü nyongnyongi lingtü thaüvaüei e.

⁴⁶Hahepak kü Paul hi Barnabas nyiphen mong longei e, “Kahvangei shah am kü shong ehen nadang vaipeih. Shejao ammi ha yaktüktü yangnyuyem danghen ham nechang shei am nyingi shahphenpü nangkü shaangü hami Kung am touei lüdainyeih.

⁴⁷Mehenangkü SHEMBÜPAi ham kü hapakei shahkung shuohpeih: ‘Kahdoknyü dohpü ngoishi yemleipü danghühen nangkü ngei amphongü Kung am shingvaishi vangngai hük leihüpeih.’ ”

⁴⁸Mechem Kung ami ha danpa, jom mongong hatü Kahvang shah kü menvih shuoh, hatü meshüki yangnyuyem danghen je, vaipü am leiteke.

⁴⁹Hapa keiha SHEMBÜPAlei shah moidoi kempülei daei dai.

⁵⁰Shejao Jehoda ami chingnyü kübü Kung am shennyak mübüthü hatü Kahvang kü vaipü noknyü kü laphen shaopü nyühathü kü ühing ittü Paul hi Barnabas nyi kü shüveitü hapa moidoi leipü changtük.

⁵¹Hanangkü jijinyi-i jom khüei lathuh hukei dheüphongtü Ikoniumlei heihdai.

⁵²Nanglakthü mongongpai hatü Laangha Daülangpai mateke.