Read Phom Naga PHONGSHANTHÜ DOU 14 Bible Online

PHONGSHANTHÜ DOU 14 - Phom Naga bible

PHONGSHANTHÜ DOU 14

¹Ikonium leiyao aihük mü vam. Paul hi Barnabas nyi Jehoda amei Sinagoglei pei, hatü halei longi wong kohshi epai Greek am hatü Jehoda am longi hinglem.

²Shejao hingnelempü Jehoda ami hapa jeihinaü nyi khüei Kung am kü ühing ittü jomei mongkü leü nemeipü peihü.

³Hanangkü jiji halei SHEMBÜPA jung wong kohshi eyei, büpalei phahji jung jijinyi-i denpeyü hingshangpü shei nyangeihepü hatü yashanyale jom homei dükei hepak luangi nyu.

⁴Shejao chingnyü kü nyupüthü khong nyi anei handai; haneiyü Jehoda am kü bangh, haneiyü phongshan nyi kü banghteke.

⁵Hahepak kü Kung am hatü Jehoda am hanei jomei mübüthü khaaitü jiji kü nemei-i dükhen hatü yaongi shükhen showteke.

⁶Mechem phongshan nyi-i ha danpa, jijinyi-i Lykaonia kahdok kübü chingnyü nyi Lystra hatü Derbe hatü lebü kahmükei nyaiyei lüdai;

⁷hatü halei jiji-i shahjangmei chongvenei nyu.

⁸Lystralei shennyak hük bühhinüng la khodaitü nekamaoki uoshi nyu.

⁹Pauli shah eshingkü büpai bangei nyu. Pauli büpa kü hüngei veitü meihen mü büpa kü hinglempü nyüke shei veiaokei,

¹⁰ngeü longpai, “Nüng laülüki yaongtuh” shei e, hatü hapa shennyak laülüki yaong hatü kam.

¹¹Mechem khongnyüi Pauli dükpü dou eepa, jomi Lystra amei shah mü, “Jen touei shennyak aimü kahvangthü yiüküteke” shei len.

¹²Jomi Barnabas kü Zeus, hatü Paul kü Hermes shei nyük; mehenangkü Paul-ü shongnyü shah ebü nyuteke.

¹³Zeus kahvangei phopshemü chingnyü pedaülei nyu, hatü haleipü ngongpai mohoh chebaongthü hatü chüyükthü yah-ei peshadenei heih; mehenangkü büpa hatü khongi phongshan nyi kü jakpü moila shuohhü.

¹⁴Mechem phongshan Paul hi Barnabas nyi-i ha danpa, jijinyi-i ashakviha shaaktüktü lenyaki khongnyü lemei mokei heih.

¹⁵Küphüthü, mehekei amphongi hapa düknya? Henjiyü am keipü hangku hih, hatü henüng yahlak neshiüpü douthü kübü kahdok, vangsho, yungching hatü halei nyupü lemphü lingpü vanyangyem Kahvang touei lepei leihen shingvaishi henji-i am touei shahjangmei koei peiküpeih.

¹⁶Peihdaipü denthü kü jatthü peü kü laophü laophülei lem kü daihen büpai hanpeih;

¹⁷shejao düngei büpai doumei dükpai büpa nyupü huei heihpeih; büpai vangsho leipü vang shomnyeih hatü dühü kü jiüshi betjük jükhünyeih; büpai am hahyingi mahünyeih hatü ammei mong mongongpai maei nyunyeih.

¹⁸Hathü shah eyei phongshan nyi-i kheyei jakpü moila shuohhen kübü khüamei tuh-aok.

¹⁹Shejao Antiokh hatü Ikonium leipü peipü Jehoda ami khongnyü jomi yawh-ei yah. Hapheikü jomi Paul kü yaongi shüktü didainyeih shei deihshi chingnyü pedaülei shüei ngaiyei tuh.

²⁰Shejao mechem vaipüthü büpa shonei thai, büpa paoei chingnyülei shüteke. Nyihphei büpa Barnabas mü Derbelei heihdai.

²¹Jiji halei shahjangmei baongtü vaipüthü vamhüpheikü jiji Lystralei lei, hapheikü Ikonium hatü Antiokhlei lei.

²²Halei jiji-i vaipüthülei laangha wong kohhü, hatü “Shüveidoidei longi homei jen Kahvang ongchingei shüaokhen” shei vaipü kü nedoh-i nyuhen nangthongei e.

²³Jiji-i attoi ieyei kü jom shing behethü jepheikü phoppü hatü shüaeiyunglepai vaipüthü SHEMBÜPA kü lanei shuoh.

²⁴Hapheikü jiji Pisidia homei Pamphilialei pei.

²⁵Jiji-i Pergalei shahjangmei chongventü Attalialei yiü.

²⁶Haleipü jiji Antiokhlei leiteke; halei jiji-i dou temaokpü shingvaishi Kahvang phahji kü menvih shuoh.

²⁷Mechem jiji leiyei Antiokh ngoipa, jiji-i attoi am chemi nyük, hatü Kahvangi jiji kü dükpü, hatü mekei Kung am kao hinglemhen shaden appa, ha jung peü shah-om aokteke,

²⁸hatü jiji halei vaipüthü mü kansho hük nyu.