Read Phom Naga PHONGSHANTHÜ DOU 15 Bible Online

PHONGSHANTHÜ DOU 15 - Phom Naga bible

PHONGSHANTHÜ DOU 15

¹Shennyak hanei Judea leipü Antiokhlei yiüei jeihinaüthü kü nyuh-ei, “Mosa vanglem kü kei ammi shuw mangjap thahshi am yemleihen neaok” shei e.

²Paul hi Barnabas nyi ha nangkü shah daktei; hanangkü Paul hi Barnabas nyi mü lebü hanei Jerusalemei aonghen hatü hapa shahhidou phongshanthü hatü behethü mü shah shükteihen jeteke.

³Hanangkü attoi ami jomphong shom, hatü jom Phoenicia hatü Samaria homshingkü jomi Kung am mong leppü jung shah-om shuoh, hatü vaipüthü peü kü mongong longpü koei pei.

⁴Mechem jom Jerusalem ngoijapa, attoi am, phongshanthü hatü behethüi jom mongongshi yah, hatü Kahvangi jom kü dükpü shah-om peü shuoh.

⁵Shejao Pharisee am khong kübü vaipüthü hanei yaongei, “Jomphongao shuw japhen, hatü Mosa shahkung dükhen ngeükhüam shuohhen vongbong” shei e.

⁶Phongshanthü hatü behethü chemi ha jung eteihen thai.

⁷Shah longi shüktei pheikü Peter yaongei jomphong kü, “Ngelei jeihinaüthü, hepak kansho hük daiteke, Kung ami shahjangmei danei hinglemhen shingvaishi jom kü chongvenhen amphong khong kübü Kahvangi ngei jeteke,

⁸hatü hangkulei mongdang nyingpü Kahvangi jen kü dükphopükei jom kü Laangha Daülangpü shuoh-ei denpü shuohteke,

⁹hatü hinglempai jomei mong daühüei büpai jom hatü jen aa kü meheyao baong hanei nenoang.

¹⁰Hanangkü shaang mekei etü jenei bühipa nevaijü jeniyao nekoaokhen pang vaipüthü kü paihüei Kahvang kü ammi doknya?

¹¹Halei meyü jomi keiha jenao SHEMBÜPA Jisu phahji homei yanghen shei hinglemnyeih” shei eteke.

¹²Barnabas hi Paul nyi-i jiji homei Kahvangi Kung am touei nyangeihepü hatü thamapü douthü dükpü jung jijinyi-i epü bangei thaipü khong nenmü nyu.

¹³Jiji eyei kemhinüng Jakobi jangei e, “Ngelei jeihinaüthü, ngei epü banghümao.

¹⁴Kahvangi shongei Kung am kü bamei veipü, hatü jom khong kübü laophülei lompü nanglak vaihen yahhen jung Simoni nih-ei eküteke.

¹⁵Hapayü nyangei nyupü thihivamei shah kü jiüteinyüke:

¹⁶‘Hapheikü ngei nyokei leihen, hatü doei nyupü David nyushing lingei leihen; bendaipü kübü ngei ha lingei leihen, hatü ngei ha yaonghühen,

¹⁷shejüang lebü shennyakthü peüi SHEMBÜPA yemhen, hatü ngelei men kü nyükpü Kung am peü. Hathü douthü dükpü SHEMBÜPAi enyüke;

¹⁸ha nyinghüphei kü hepak longi daiteke.’ ”

¹⁹Hanangkü jeni Kung am Kahvang touei lepei leipüthü kü shanghah neshuohhen vaipü khih shei ngei shahphen yah-aoknyüke,

²⁰shejao jeni jom kü nyangshuohhenü lajei kü jeetükpü hahying nehahhen, mükbongjuyung mang kübü, hatü yüpei jüpü hatü iy hahpü kübü yanei nyuhen ehen khih.

²¹Mehenangkü Mosa shahkung shelei mebü chingnyü peü kü chongven, hatü sabbath nyih ieyei kü ha wongmü Sinagoglei iehampeih.

²²Hahepak kü phongshanthü hatü behethü mü attoi am peüi mongei jom nanglak khong kübü shennyak jeyei Paul hi Barnabas nyi mü Antiokhlei shomhen temteiteke. Jomi Barsabbas shei menpü Judas, hatü Silas, jeihinaüthü khongkü mübü nyi,

²³hapa lai kotü shom: “Ammei jeihinaü, phongshanthü hatü behethüi jeihinaü Kung am vaipüthü Antiokh, Syria hatü Cilicia kü nyupüthü peü touei selam.

²⁴Hami düktuh shei ne-epü kü ham khong kübü shennyak hanei daiyei am kü baokei mong shüng nelinghen mü epü hami danpü nangkü,

²⁵ham chemi mongteitü nanglak hanei jeyei jenei bampü jeihinaü Paul hi Barnabas nyi mü shomhen temteipeih.

²⁶Jijinyi-i SHEMBÜPA Jisu Khristalei men kü jijilei yangnyuao lanei shuohteke.

²⁷Hanangkü hami Judas hi Silas nyi shomphünyeih; jijinyi-iyao aihük shah jomei ju kübü vamei ekahen.

²⁸Hathü vongbong khih shei deihpü hanei mü lenei Laangha Daülangpü hatü hamphong kao meiangke shei deihpeyü am kü lebü nyeinya hanggovih nekohhühen vaipü khih.

²⁹Ammi lajei kü jeetükpü hahying nehahhen, iy hatü yüpei jüpü nehahhen hatü mükbongjuyung kübü yantuh. Ammi hathü kübü yanei nyujema, am-üng meipüba kü nyuhen, dohpü selam.”

³⁰Hanangkü hathü shom, hatü Antiokhlei yiü. Mechem vaipüthü khong peü chemi thaijapa, ha lai shuoh.

³¹Mechem jomi ha lai iepa, nangthong shah meipü nangkü jom mongong.

³²Judas hi Silas, üpa nyi thihivam kei nyu, hepak yah-ei nangthong shah hatü wong kohhen shah e.

³³Jomphong halei kansho hük nyupheikü vaipüthü jomphong chingmei kü shompü am touei nyokei leishih,

³⁴shejao Silas payü halei nyujü meihen khih shei deih.

³⁵Shejao Paul hi Barnabas nyi Antiokhlei nyu, hatü halei lebüthü longi mü SHEMBÜPAlei shah nyuh-ei venteke.

³⁶Nyih kansho hük pheikü Pauli Barnabas kü, “Kei, chingnyü peü kü ji-i SHEMBÜPAlei shah baongei tuhpü vaipüthü jom shaang mekei nyüpüshang ji shao daiyei thümshah” shei e.

³⁷Barnabas-i Mark shei menpü Johanao jiji mü deihahhüei deih.

³⁸Shejao Pauli Pamphilialei jiji tuhphongtü dousho kü chemi nedai-i leidaipü nangkü büpa nemunghahhüei deih.

³⁹Jiji shah nethahtei-i mangshi dakteitü laolao yan; Barnabas-ü Mark müei Cyprus lemei dai.

⁴⁰Shejao Paul-ü Silas müei layaong; vaipüthüi büpa SHEMBÜPA phahji kü lanei shuoh.

⁴¹Büpai attoithü wong kohhüei Syria hatü Cilicia homei dai.