Read Phom Naga PHONGSHANTHÜ DOU 17 Bible Online

PHONGSHANTHÜ DOU 17 - Phom Naga bible

PHONGSHANTHÜ DOU 17

¹Paul hi Silas nyi Amphipolis hatü Appolonia homei daipheikü jiji Thesalonikalei pei; halei Jehoda amei Sinagog hük nyu.

²Büpalei vanglem aimü büpa halei shü, hatü sabbath nyih jem thahshi laihing leipü yah-ei jomphong mü shah daktei,

³hatü Messiah shangponghen vongbong hatü dipü kübü yangei leihen shei nih-eikhoei, “Hapayü ngei amphong kü baongpü Messiah, Jisu” shei e.

⁴Jehoda am hanei mongkü pong hatü Paul hi Silas nyi mü om; hapa keiha Kahvang kü khümpü Greek am hatü nyüha mübüthü maani nevai-i omteke.

⁵Shejao Jehoda ami mükhak, hatü jomi chingyangshong leipü nebahnevaipü shennyakthü thaiyei khong lingtü chingnyülei mophicheü ngaiteke. Jomi shahthai shingei deinüng shei Paul hi Silas nyi yemshingkü Jasonei shem shümteke.

⁶Jomi jiji nedangi Jason hatü vaipüthü hanei chingnyü kü vanglem lempüthü touei shüei deiyei, “Kahdoknyü shakhimong leitükpü shennyakthü hatoueiyao peiteke,

⁷hatü Jasoni hathü kü yen keiha ühyingei angpeih. Jom peüi Rom ongpalei shahkung kü nejiüi shao lebü ong hük Jisu shei menpü nyüpeih” shei enyüke shei lenteke.

⁸Nanglakthü hatü chingnyü kübü lakchongbüthüi ha danei mopteke,

⁹hatü jomi Jason hi vaipüthü leipü hang yahtü veyei leishih.

¹⁰Ha ya-üng Paul hi Silas nyi Berealei shomtük, hatü mechem jiji halei ngoipa, jijinyi Jehoda amei Sinagoglei heih.

¹¹Thesalonika leipü Jehoda am meyü Berea leipü Jehoda am-üng yahhahhüpü kohshi nyu; mehenangkü jomi shahjangmei longi mong shuohshi yah, hatü hathü jiüla shei nyihjeih laihing yemteke.

¹²Jom longi hinglem, hatü Greek am nyühathü maani nevai-i, hatü laphen shaopü bahathü longi omshi hinglem.

¹³Shejao mechem Thesalonika leipü Jehoda ami Berea leiyao Pauli Kahvang shah enyüke shei danpa, jomi haleiyao khong kü shiongei mophicheü ngaihününg peiteke.

¹⁴Hahepak kü vaipüthüi shülangi Paul yungching yungkungei shomtük, shejao Silas hi Timoti nyi payü halei nyu.

¹⁵Paul müei daipüthüi Athen thahshi dai, hatü Silas hi Timoti nyi lomi ngei touei aokpü thahshi shomshih shei epü shah yah-ei jomi büpa tuhtü leidai.

¹⁶Mechem Pauli Athenei jiji danei nyupa, hapa chingnyü kü lajeithü maei eetü longi büpa kü mongkü tüngei deih.

¹⁷Hanangkü büpai Sinagoglei Jehoda am, hatü Kung am Kahvang kü khümpüthü mü shak daktei hatü nyihjeih bhei leihshingei heüteipü shennyakthü mü etei.

¹⁸Shao Epikurean hatü Stoik vaipü vanglem kü nyingpühingpüthüi büpa mü shah doktei. Hanei ami, “Hapa shahvang ahpai mehe ehünyuja” shei e. Lebüthüi, “Büpayü mih Kung amei Kahvang jung baongbü khih” shei e. (Hayü büpai Jisu jung shahjang meipü hatü yangei leipü jung epü nangkü nyuteke.)

¹⁹Hanangkü jomi büpa müei Areopagus shei epü shahtap shingei deiyei büpa kü, “Nüngi epü ha nyuhpüvenpü ja hami nyinghüangke.

²⁰Hapayü ham shingvaishi thüng mü khih; hanangkü ha mehe lappa hami nyinghüangke” shei e.

²¹Shaang halei nyupü Athen am hatü Kung am peü mepa shingvaishiyao nevai, shejao lemhük ja eteiyei nevaijü danhah-ei mon hepak tükhamteke.

²²Hahepak kü Pauli Areopagus shahtapei yaongei, “Athen am, lem peü phikü ami vaipü kü ahshi-üng wong kohpü am shei ngei veiaoknyüke.

²³Mehenangkü ngei chingnyü homei daishingkü, hatü ammi khümpü dou kü meishi veijü khümteipü moidü hük kü, ‘NENYINGPÜ KAHVANG HÜK KÜ’ shei nyangei eeteke. Ammi mepa kü nenyingi khüm, ha jung ngei am kü baongnyüpeih.

²⁴Kahvangi kahdoknyü hatü halei nyupü lemphü lingpeih; büpayü vangsho hatü kahdoknyü SHEMBÜPA; büpai hangkulei laki lingpü khümshingei nenyunyih,

²⁵nevaijü büpai lemhük nanyu kei hangkulei laki büpa chongnephonyih; büpaiang hangku peü kü yangnyu, ngü hatü dou peü shuohnyeih.

²⁶Bü hük kübü büpai jatthü peü kahdoknyü kempülei nyuhen lingpeih, hatü büpai jom nyuhen hepak hatü jom nyuhen shing kü viong lingei hanpeih.

²⁷Shejüang shennyakthüi büpa yemhen hatü büpa jen peü toueipü taishi neshiüjao jeni büpa danghen shingvaishi Kahvangi ha dükpeih.

²⁸Mehenangkü büpa kü jen nyunyeih, aülaünyeih hatü jenei yangnyu nyüpeih. Hapayü ammei lai nyangbü hanei-i, ‘Mehenangkü jenphongao büpalei lihilathü’ shei nyangpükei nyüke” shei eteke.

²⁹Hanangkü jenphongü büpalei lihilathü vaipü nangkü Kahvangü hon, ngin nevaijü yaong — hangkui deih-ei letü laki shangpü lajei kei nyüpükei jeni nedeih-ükhih.

³⁰Peihdaipü hepak kü hapakei nenyingpeyü Kahvangi hei-üng tuhphongpeih, shejao shaang büpai shing peü leipü hangkuthü kü mong lephen shahkung shuohnyüke.

³¹Mehenangkü büpai jepü shennyak hüki shahhingi kahdoknyü shahphenhen büpai nyih itei nyüke. Büpai hapayü büpa yangei leishihpü homei hangku peü kü denpü shuohnyüke.

³²Mechem jomi dipü kübü yangei leipü jung danpa, hanei ami nyienteke, shejao lebüthüi, “Hami shao-üng hapa jung banghen hih” shei e.

³³Hajük thahshi etü Paul lüdai.

³⁴Shejao hanei ami Paul phei mü hatü hinglem. Hathü khongkü Areopagus shahtap kübü nanglak Dionisius, hatü nyüha hük Damaris nyu, hatü lebü longi nyu.