Read Phom Naga PHONGSHANTHÜ DOU 18 Bible Online

PHONGSHANTHÜ DOU 18 - Phom Naga bible

PHONGSHANTHÜ DOU 18

¹Hapheikü Pauli Athen leipü Korintlei heih.

²Halei büpai Jehoda am Aquila heü, hatü büpayü Pontus am Klaudius ongpai Rom leipü Jehoda am peü lüdaituh shei ngeükhüam shuohpü nangkü Italy leipü chenyüha Priscilla müei peiyei nyuteke. Pauli jiji mü pongteinüng heih,

³hatü büpa-ao ashak shem lingbü aihük mü jom kei bhei leihpü am vaipü nangkü jom shemei ngoi, hatü jom chemi dou dük.

⁴Sabbath nyih ieyei kü büpai Sinagoglei shah shükteiyei nyu, hatü büpai Jehoda hatü Greek am lepei leihen khe.

⁵Mechem Silas hatü Timoti nyi Macedonia leipü ngoijapa, Paulü Jehoda am kü chongvenei Jisu-ü Messiah hih shei denpü shuoh-ei nyu.

⁶Shejao mechem Jehoda ami Paul khüei yaongei büpa kü nemei-i eshuohpa, büpai jom khüei büpai ashak leipü mag dheüei jomphong kü, “Ammei iy am shak kü nyutuh! Ngei mang nevai. Shaang mü leitü ngei Kung am touei daihen” shei e.

⁷Hapheikü büpai Sinagog leipü Titius Justus shei menpü shennyak hükei shemei heih; büpayü Kahvang kü khümpü Kung shennyak nyu; jomei shemü Sinagog mü dhienei nyuteke.

⁸Sinagog kü mübü Krispus hatü jom shem kemei SHEMBÜPA kü hinglem, hatü Pauli epü danpü Korint am longi hinglemei baptükteke.

⁹Ya hük manghkhang hük kü SHEMBÜPAi Paul kü, “Tenyem, shejao etuh, nenmü tenyu;

¹⁰mehenangkü ngei nüng mü nyüpeih, hatü üpaiyao nüng kü nemeihen mü lak nenopih; mehenangkü hapa chingnyülei ngelei nanglak longi nyüpeih” shei eteke.

¹¹Büpai jom kü Kahvangei shah nyuh-ei bong hük mü lenyang vok nyu.

¹²Shejao mechem Gallio-ü Akhaia kü Rom governor nyupa, Jehoda am hoi jemtü Paul yepei shahphen shingei dei.

¹³“Hapa shennyaki nanglakthü kü shahkung kü nejiüpü lem kü Kahvang kü khümhen yawhlangnyüke” shei jomi e.

¹⁴Pauli shah enüng nyushi Gallio-i Jehoda am kü, “Am Jehoda ami epeyü lemhükei jüteipü nevaijü shahkung longi shaipü vailangmeyü ngei ammei shah yahpü kü dahshakhen nyüpeih,

¹⁵shejao hapayü shah hatü men hatü ammei shahkung nangkü shah dakteipü vaipü nangkü am nyingi ehahtuh; ngei henüng nangkü shahphenbü nevaipih” shei e.

¹⁶Büpai jomphong shahtap leipü yantük.

¹⁷Hahepak kü jom peüi Sinagog leipü lakchongbü Sosthenes yepei shahtap shelei üpteke, shejao Gallio-i ha kü yaakeiyao nevei.

¹⁸Halei hepak kansho hük nyupheikü Pauli vaipüthü kü selam shah ephongtü Priscilla hi Aquila nyi müei Syrialei leidai. Cenkhrealei büpa sho japteke; mehenangkü büpa lahtüktü nyuteke.

¹⁹Mechem jomphong Ephesia ngoipa, büpai jomphong halei tuhphong, shejao shongei büpa Sinagoglei heih-ei Jehoda am mü shah shükteiyei nyu.

²⁰Jomi büpa kü nyih lushi themkütuh shei eshuoh, shejao büpai nemong;

²¹shejao jom toueipü leidainüng kü büpai, “Kahvangi mongjema ngei shao peikahen” shei eshuoh. Hapheikü büpa Ephesia leipü leidai.

²²Mechem büpa Kasarea ngoipa, büpa Jerusalemei aongei attoi am mü selam yah, hatü Antiokhlei yiüdai.

²³Halei hepak shohük nyupheikü büpa layaongei shing hük kübü hük shei Galatia hatü Phrigia moidoilei vaipüthü wong kohhüei dai.

²⁴Shaang Ephesialei Alexandria leipü Jehoda am Apollos shei menpü pei. Büpayü shah meishi eaokpü laihing meishi nyingpü shennyak nyu.

²⁵Büpayü SHEMBÜPAlei Lem kü nyuh-ei angpü shennyak nyu. Büpai Johan baptükpü jung mon nyingjao büpai monghumpai e, hatü Jisu jung ahshi-üng jiüshi nyuhteke.

²⁶Büpai Sinagoglei longi monglongshi e, shejao Priscilla hi Aquila nyi-i büpai epü danei jiji-i büpa müei daiyei Kahvangei Lem longi jiüshi nih-ei eshuoh.

²⁷Mechem Apollos Akhaia lemei heihhüei deihpa, jeihinaüthüi büpa kü mongnang thongteke, hatü vaipüthü kü büpa mongongshi yahhen lai nyangteke. Büpa ngoiyei phahji homei vaipüthü kü longi sheüh.

²⁸Mehenangkü büpai ngaiheyei Jehoda am mü Jisu-ü Messiah shei laihing kübü nih-ei jom kü shah dokteipü neüteke.