Read Phom Naga PHONGSHANTHÜ DOU 19 Bible Online

PHONGSHANTHÜ DOU 19 - Phom Naga bible

PHONGSHANTHÜ DOU 19

¹Mechem Apollos Korintlei nyupa, Paul-ü hapa kahmük moidoi jiam homei daiyei Ephesialei pei; halei büpai vaipüthü hanei heüteke.

²Büpai jomphong kü, “Am vaipü hepak kü ammi Laangha Daülangpü yahla?” shei phe. Jomi, “Neyah, hami Laangha Daülangpü nyüpüja sheiyao nedanangpih” shei jangei e.

³Hahepak kü büpai, “Shejema menüng kü amphongi baptükpa?” shei phe. Jomi, “Johanei baptükpü kü” shei e.

⁴Pauli, “Johanü mong leppü baptükpü kü büpa pheikü peihen hük, hayü Jisu kü hinglemtuh shei eyei baptükpeih” shei eteke.

⁵Ha danei jomi SHEMBÜPA Jisulei men kü baptükteke.

⁶Mechem Pauli jom kü laki shüngpa, Laangha Daülangpü jom kü pei, hatü shahlem laolao-i shah eyei teteivan.

⁷Peüshep jom anpünyi hükshing nyu.

⁸Büpa Sinagoglei shüei wong kohshi lenyang jem hükshing shah e, hatü Kahvang ongching nang mongkü pongshi shah shükteiyei nyu.

⁹Mechem hanei am mong vaanei vaihen nemong hatü hapa Lem nangkü thaipü khong touei nemei-i eshuohpa, büpai jom tuhphongtü vaipüthü müei lüdai, hatü nyihjeih ongpalei shahthai shemei nyuh-ei nyu.

¹⁰Hapakei bong nyi nyu, hanangkü Asia moidoi kü nyupü Jehoda hatü Greek am peüi SHEMBÜPAlei shah danteke.

¹¹Kahvangi Paul homei hayaoha yashanyale dou dük.

¹²Büpalei romal hatü dokshak dangkao tüngpüthü touei deiyei notei, hatü jomei din meidai, hatü mang laanghathüao jom leipü lüdaikem.

¹³Hahepak kü Jehoda am hanei yen kü longteiyei mang laangha changteipüthüi mang laanghai yeppüthü kü SHEMBÜPA Jisulei men noteihen khe, hatü jomi, “Pauli chongvenpü Jisulei men kü ngei ngeükhüam shuohnyeih” shei e.

¹⁴Jehoda am Sceva shei menpü ngongchong hükei chehathü jom nyeti hapa dou dükei nyuteke.

¹⁵Shejao mang laanghai jom kü, “Jisu, ngei nyingnyeih hatü Paulao ngei nyingnyeih, shejao amphong üpaang?” shei jangei e.

¹⁶Hahepak kü mang laanghai yeppü shennyaki jom kü laongei shük, jom peü kü shüngei shan, hanangkü jomphongü shem leipü bümkong iy phudaitü nyaiteke.

¹⁷Mechem hapa jung Ephesialei nyupü Jehoda hatü Greek ami danpa, peüi nyempai ma, hatü SHEMBÜPA Jisulei men longteke.

¹⁸Shao vaipüthü longshi shingi jomi dükpü ngaiheyei eyei pei.

¹⁹Phongyomteipüthü jomei lai thaiyei peüi eeshi aw kü jaktük; hatü aw kü jaktükpü laithülei bhei itshuohjü ngin haja pinyipüanei bhei nyuteke.

²⁰Hanangkü SHEMBÜPAlei shah wong kohshi long, hatü daei dai.

²¹Shaang hathü dou tempheikü Laangha kü Pauli Macedonia hatü Akhaia homei daihen, hatü hapheikü Jerusalemei leihen temteke. Büpai, “Ngei halei heihphei keyü ngei Romao thümhen” shei e.

²²Hanangkü büpai büpa mü sheühteipü Timoti hatü Erastus nyi Macedonialei shom; büpa payü hepak kansho hük lushi Asialei nyu.

²³Hapa hepak kü SHEMBÜPAlei Lem nangkü mophicheü longpü vam.

²⁴Demetrius shei menpü shennyak hük büpayü ngin shükbü nyu; büpai ngin yah-ei Artemis kahvang lajei shükhamteke hatü hapa bhei leihpü doui dou dükbüthü longi nanglei danghamteke.

²⁵Büpai dou dükbüthü hatü hapakei aihük dou dükpü lebüthüao chemi nyükei thaihütü, “Shennyakthü, jeni hapa bhei leihpü homei jen kü lop peipü ammi nyingei nyüke.

²⁶Ammiyao eeteke hatü danteke, Ephesialei mon nevai shejao Asia kempülei hapa Pauli shennyakthü longi laki lingpü kahvangü kahvang nevaipih shei eshi yawh-ei leplangkemteke.

²⁷Hapa jenei bhei leihpü menten leidaihen vongshüh mon nevai, shejao longpü Artemis nyüha kahvangei men ne-ienelemi leidaihen, hatü Asia hatü kahdoknyü kemei pinnyü kü khümhen neshiüi pinnyülei müknyinshekhang mahdaihen khih” shei e.

²⁸Mechem jomi ha danpa, jom mongshih-ei, “Ephesia kü longpeyü Artemis kahvang” shei lenteke.

²⁹Hapa chingnyü bukpüshaanpai ma, hatü shennyakthü chemi ngashingei mokei heih-ei Paul mü chemi yen daipü Macedonia am Gaius hi Aristarkhus nyi shüei dei.

³⁰Pauli khong touei heihhen yaong, shejao vaipüthüi büpa nedeishih.

³¹Asia kahdok kü Paulei küphü lakchongbüthü hanei-i ngashingei büpa tedeikei shei shahjang shom.

³²Thaipüthü üathamaei nyu; hanei ami lemhük len, lebüthüi lebü lenteke. Shennyakthü longshi shingi jom hatouei mehekei peipa nenyingi nyu.

³³Jehoda ami Alexander shelemei hungei deishih, hatü khong haneiyü büpa homei vampeih shei len. Nanglakthü touei büpa yanghen nang enüng chem nentuh shei Alexanderi e.

³⁴Shejao mechem jomphongi büpayü Jehoda am khih shei nyingpa, jom peü ghonda nyi hükshing mongjemtü, “Longpeyü Asia amei Artemis kahvang” shei lenteke.

³⁵Shejao hapa jila kübü lakchongbüi khongnyü nenhütü büpai, “Ephesia am bühüthü, Ephesia jilayü longpü Artemis kahvangei phopshem, hatü vangsho leipü vüpü lajei yompü jila shei nenyingpü hatouei üpa nyüpa?

³⁶Hathü nevai shei ehen neaok, hanangkü am nenmü nyutuh, hatü deih-ei nedangi ngangahük kü meheyao tedükkei.

³⁷Ammi hathü shennyak hatouei deiteke; jomphongü phopshem leipü dou gühpao nevai, nevaijü jenei kahvang thaüvaüpao nevai.

³⁸Hanangkü Demetrius hatü büpalei dou dükbüthüi hanei am khüei shah nyujema, shahphen shing apshi nyüke, hatü halei governorthü nyüke; ammi halei ehen shahhidou deikei.

³⁹Ammi shao nyeinya lemhük nyinghüjema, hapayü bühü shahthai shingei eteihen.

⁴⁰Mehenangkü shinnyih mehe mophicheü ngaipa, hapa kü jen nyonghen vongshüh nyüke; hapa mophicheü ngaipü dahshakhen mü meheyao laphen neshiü” shei e.

⁴¹Büpai ha etü büpai khong thaipü yantük.