Read Phom Naga PHONGSHANTHÜ DOU 2 Bible Online

PHONGSHANTHÜ DOU 2 - Phom Naga bible

PHONGSHANTHÜ DOU 2

¹Mechem nyih pinyipüanpabü ngoipa, jom peü shing hük kü thaiyei nyu.

²Hatü ngangahük kü vangsho leipü yinglükpalei keiha ngeü hük pei, hatü jomphong uoshi nyupü shem kemei ma.

³Awyei keiha phaakshi jom touei vamei jom peü kü bakteke.

⁴Jom peü Laangha Daülangpai ma, hatü Laanghai jom kü ehüaokpü thahshi lebü shah mü ehen chongpang.

⁵Shaang vangsho phangkü jat peü kübü Kahvang nyempü Jehoda am Jerusalemei nyu.

⁶Mechem jomi ha ngeü danpa, peüi yashan; mehenangkü jom peüi laophülei shah mü eyei danteke.

⁷Jomi yashanei hatü thamaei, “Shah epüthü peü Galil am nevaipü je?

⁸Shejema mekei etü jen peüi laophü laophülei nyübüh shah mü dannya?

⁹Jenphongü Parthia, Media, Elam hatü Mesopotamialei nyupüthü, Judea hatü Kappadokia, Pontus, hatü Asia,

¹⁰Phrigia, Pamphilia, Ijip hatü Cyrene yopai kübü Libya leipü. Jen haneiyü Rom leipü nyüke.

¹¹Jehoda hatü Kung am nyiphen Jehoda vanglem kü leppüthü, hatü jen haneiyü Crete hatü Arab kahmük kübüthü; shejao Kahvangei ngan douthü jung jomphongi jenei shah mü epü jen peüi dannyüke” shei pheteiyei nyu.

¹²Peüi thamaei hüki hük mü, “Hapayü mehe lappüang yo?” shei etei.

¹³Shejao hanei ami nyieneinyangei, “Hathüyü yiünaü-i chokpü khih” shei eteke.

¹⁴Shejao Peter, anpühük mü yaongtü ngeü anei jomphong kü eteke, “Jempü Jehoda am hatü Jerusalemei nyupüthü, ammi ha nyingtuh hatü ngei mehe enya, ha banghümao.

¹⁵Hingmei meyü jomphongü ammi deihpükei yiünaü-i chokpü nevai; mehenangkü shaangü nepnüng shü baji mon khih.

¹⁶Shejao hapayü Joel thibü homei epü ha khih:

¹⁷Dohpü nyihthü kü hapakei nyuhen shei Kahvangi enyüke: ‘Ngei nanglak peü kü ngelei Laangha khüpshuohhen, ammei yiükha yeshangthüi teteivanhen; nethethüi manghkhang eehen, hatü behethüi mangh manghhen.

¹⁸Hathü nyih kü ngei ngelei chongphobü nyüha baha peü kü ngei ngelei Laangha khüpshuohhen, hatü jomi teteivanhen.

¹⁹Ngei vangsho shangei thamapü, hatü kahdoknyülei yashanpü, iy hatü aw hatü awshit huhen.

²⁰Longpü hatü müknyinshekhangpü SHEMBÜPA yiüpü nyih shekü vanghenyü manghdaihen, hatü lennyü-ü iy leidaihen.

²¹Hatü üami SHEMBÜPAlei men kü nyükhenshang yanghen.’ ”

²²Israel am, ngei mehe ephahen bangtuh: Nazareth am Jisu-ü Kahvangi yahpü shennyak hük amphong touei yashanyale, thamapü hatü nyangeihepü homei Kahvangi am kü büpa homei dou dükpü am nyingi nyingei nyüke.

²³Kahvangei küpjan hatü yeihshi nyingei nyupükei hapa shennyak ammei lak kü lanei shuoh, hatü ammi nemeipüthülei lak homei büpa shophang kü apei jütük.

²⁴Shejao Kahvangi büpa dipü hanghi kübü bümei leihüei yangei leishih; mehenangkü dipülei ngani büpa shümei netuh-aok.

²⁵Mehenangkü Davidi büpa nang hapakei enyüke: “Ngei düngei SHEMBÜPA ngei touei eeteke; Mehenangkü ngei nejenlenhen shingvaishi büpa ngelei lakdah philei nyüpeih.

²⁶Hanangkü ngelei mongei mongongpeih, hatü ngelei jui mongmeipeih; nyeishi ngelei bümao monglempü kü nyuhen;

²⁷mehenangkü nüngi ngelei laangha mahngchongei netuhphonghen, nevaijü nüngei Daülangpü Hük neshehühen.

²⁸Nüngi ngei kü yangnyu lemthü nyinghü; nüng ompü touei nüngi ngei kü mongongpai mahühen.”

²⁹Jeihinaüthü, jenei pa David diyei vütükteke, hatü büpalei wo shinnyih thahshi hatouei nyüke shei ngei monglongei am kü eaoknyeih.

³⁰Büpayü thibü hük vaipü nangkü büpalei ong uoshing kü büpalei hühiha hük uohühen shei Kahvangi büpa kü lahpü büpai nying.

³¹Ha Davidi yeihshi mebü eepü nangkü Davidi Khrista yangei leihen nang hapakei epeih. “Büpa mahngchongei netuhphong nevaijü büpalei büm neshe.”

³²Kahvangi hapa Jisu yangei leishih, hatü hamphong peü hapa shahhing denbüthü hih.

³³Kahvangei lakdah philei longei anshihtü Pa leipü Laangha Daülangpü lahpü dangteke, hatü ha büpai am kü khüpphopü shaang ammi eenyüke, hatü dannyüke.

³⁴Mehenangkü David vangsholei ne-aong, shejao büpai hapakei enyüke: “SHEMBÜPAi ngelei SHEMBÜPA kü, ngei nüngei vepathü,

³⁵nüngei la shopshing mangleihü thahshi ngelei lakdah philei uotuh.”

³⁶Hanangkü Israel phang peüi ha lekei nyingtuh: Ammi shophang kü aptükpü hapa Jisu-ü Kahvangi SHEMBÜPA hatü Messiah leihüpeih.

³⁷Mechem nanglakthüi ha danpa, jomei mong kü nyah, hatü jomi Peter hatü lebü phongshanthü kü, “Jeihinaüthü, hami mehe dükhenang?” shei phe.

³⁸Peteri jomphong kü, “Amphong mong leptuh, hatü am peüi Jisulei men kü yung kü hüngtuh, shejüang ammei mang tükphahen, hatü amphongi Laangha Daülangpü thintho danghen.

³⁹Mehenangkü ha lahpeyü am, ammei hapeüthü hatü tailuei nyupüthü, üam kü SHEMBÜPA, jenei Kahvangi nyük, hathü peü shingvaishi nyüke,

⁴⁰hatü büpai lebü shahthü longi jomphong kü nangthongei, ‘Hapa nemeipü den kübü am yangdaituh’ shei eteke.”

⁴¹Hanangkü üami büpalei shahjangmei yah, yung kü hüngteke, hatü ha nyih jomphong mü nanglak haja jem hükshing üteke.

⁴²Jomphongi phongshanthüi nyuhpü kü hatü mongjempü kü, aan bhaokei hatü phoppü kü lanei shuoh.

⁴³Peü kü nyempü pei; mehenangkü phongshanthüi thamapü hatü nyangeihepü longi dük.

⁴⁴Vaipüthü peü chemi nyu, hatü dou peü sheppü nyuteke;

⁴⁵Jomi jomei mophimo hatü dou peü yutü napü aimü hanei shuoh.

⁴⁶Nyihjeih jomi phopshemei chemi hepak longi tük; jomi shem shem kü aan bhaokei mongongpai hatü mong dhaopai,

⁴⁷Kahvang kü menvih shuoh-ei nanglakthü peüi kenteipü kü mongongei hahying, hatü nyihjeih SHEMBÜPAi yangpüthü jomphong mü bhei-ie kü üteke.