Read Phom Naga PHONGSHANTHÜ DOU 20 Bible Online

PHONGSHANTHÜ DOU 20 - Phom Naga bible

PHONGSHANTHÜ DOU 20

¹Mophicheü dohpheikü Pauli vaipüthü kü nyüknüng deishih, hatü jomphong nangthong shah epheikü jomphong mü selam shah etü büpa Macedonialei heihdai.

²Mechem büpai hapa moidoithü homei daipa büpai vaipüthü kü nangthong shah longi etü Greeklei heih,

³hatü büpa halei lenyang jem nyu. Büpa Syria lemei heihnüng shei nyushi Jehoda ami büpa khüei phaüshah showpü nying, hanangkü büpa Macedonia homei leidaihen tem.

⁴Büpa mü Berea leipü Perrhuslei cheha Sopater, Thesalonika leipü Aristarkhus hatü Sekundus, Derbe leipü Gaius, hatü Asia leipü Tekhikus hi Trophimus hatü Timoti nyuteke.

⁵Jomphong shelei daiyei Troaslei ham danei chongküpeih;

⁶shejao hamphongi Daw Neshihpü Aan Mo pheikü Philippi leipü dai, hatü nyih nga pheikü Troaslei jomphong mü pong hatü halei nyih nyet thempeih.

⁷Hatyang kü shongpü nyih kü mechem hami mongjempü bhaong hahhen thaipa, Paul nyihphei lüdaihen vaipü nangkü jomphong mü nyak jiam thahshi shah eteiyei nyu.

⁸Dokpa dung-am ham thaipü shingei awdük longi nyuteke.

⁹Eutekus shei menpü nethe hük ümha shadenei uoshi nyu; Pauli lushi shah epü hepak kü büpa mükhet ngaokngangei nyutü mükhet ngoiyei shipü nangkü jaan jem shaopü shem leipü kahdokei vü hatü mahng mü homteke.

¹⁰Shejao Paul shüh-ei yiüei aümei shaei büpa lakei paümei yahtü, “Mongteshang, büpa yemmü nyüke” shei e.

¹¹Hapheikü Paul jaandokei aongei bhaong hah hatü vangngaipü thahshi nedoh-i shah eyei nyutü büpa layaongei lüdai.

¹²Jomi hapa nethepa yemmü shemei yah-ei lei, hatü longi mong nyiushem meiteke.

¹³Hamphongi shelei yeihshi jahaslei heih, hatü Paul mühen nangkü Assoslei yungching homei heih; mehenangkü büpa kahdok lem kü dainüng shei hapa yenshan temteke.

¹⁴Mechem Assoslei büpai hamphong pongpa, hamphongi büpa jahas mongei shütü Mitylenelei heihpeih.

¹⁵Ham haleipü layaongei daiyei nyihphei Kios ngoipeih. Nyihphei hamphong Samos hom, hatü shao nyihphei hamphong Miletus ngoipeih.

¹⁶Mehenangkü Pauli Asialei hepak netükhen nangkü Ephesialei nehaki peihdaihen tem; nyih pinyipüanpabü mo keyü aokjema büpa Jerusalemei nyuhen kenpü nyuteke.

¹⁷Miletus leipü büpai Ephesia leipü attoi behethü kü büpa mü pongtuh shei shah shom.

¹⁸Mechem jomphong peijapa, büpai jomphong kü, “Shongpü nyih kübü Asia kü ngei la shouphinüng hapa hepak yangkemei ngei mekei am mü nyuei daipa am nyingi nyingei nyüke;

¹⁹Peü mü maanpü leiyei mükphi yenei, Jehoda ami showpü kon homei dokpü kemei munenei SHEMBÜPA chongphoei nyuteke.

²⁰Am kü sheühhen kü lemhükao shümei netuhlangi am kü shahjangmei ngaiheyei nyuh-ei shem shem leiyao nyutepih.

²¹Ngei Jehoda hatü Greek am nyiphen kü Kahvang touei mong lephen hatü SHEMBÜPA Jisu kü hinglemhen ngei denpü shuohteke.

²²Shaang Laangha Daülangpülei ven bangei ngei kü mehe vamkahen nenyingi Jerusalemei leidainyeih;

²³chingnyü peülei ngei shingvaishiyü khoklat kü küphen hatü shüveidoidei mon ngei shing danei nyupü Laangha Daülangpai denpü shuohnyüke.

²⁴Shejao ngei ngelei dou mon temaokjema hatü SHEMBÜPA Jisu leipü dangpü Kahvang phahji shahjangmei denpü shuohpü dousho aokphei keyü ngei ngelei yangnyu kü mehe kao nanglei kei ieyeilemei neshiüpih” shei eteke.

²⁵Ngei mü amphong Kahvang ongching jung chongvenei daipüthü üpaiyao sheyü ngelei dhe ne-eeshasha shei ngei nyingdaiteke.

²⁶Hanangkü ngei shinnyih am kü ha ngaiyei enyeih, amphong üpalei iy-ao ngei nekohen;

²⁷mehenangkü Kahvangei küpjan kempü ngei am kü ne-e-i shümei netuh-angpih.

²⁸Am laophü nyingi hatü Laangha Daülangpai amphong veibü vaihen tuhpü mithü peü thaeimaei yomtuh; laophülei Halei iy homei shakei tuhpü Kahvangei attoi kü mi yomtuh.

²⁹Ngei leidaipheikü mi aoei netuh-i hahtükhen mangpü shuw am touei peikahen shei ngei nyingnyüke.

³⁰Haneiyü amphong khong kübü-üng shahhing nyongnyongi lingtü jom phei mühen nanglak yawhhahnüng vamkahen.

³¹Hanangkü ngei bong jem thahshi nyakhingai thüngei nedoh-i mükphi yenei am peü kü shahvüng shuohpü deih-ei dangtü thashimashi nyutuh,

³²hatü shaang ngei amphong Kahvang kü hatü büpalei phahji shahjangmei am lingei leiaokhen hatü daütükpüthü khongkü am kü mükjüp shuohhen shahjangmei kü lanei shuohnyeih.

³³Ngei üpalei hon hi ngin nevaijü ashakviha kao mük nehühnyih.

³⁴Ngelei nadang kempü hatü ngelei küphüthülei nadang peü shingvaishi ngei ngelei laki dou dükpü am nyingi nyingei nyüke.

³⁵Ha peü kü ngei am kü hapakei dou dükpü homei SHEMBÜPA Jisulei shah deih-ei dangtü wong nekohpüthü kü sheühhen khih shei ngei am kü lappü hük shuohtepih; mehenangkü büpai, “Yahhahpü leimeyü yahshuohpüüng meipüba” shei eteke.

³⁶Mechem büpai jomphong kü shah eyei kempa, büpai jomphong mü aümei shatü phop.

³⁷Halei jom peü longi theptei, hatü jomi Paul kü khaaitü ju kü jüpteke;

³⁸jomi sheyü büpalei dhe ne-eepih shei eshuohpü nangkü longi mongkü tüng. Hapheikü jomi büpa jahas yaongshingei müei yiü.