Read Phom Naga PHONGSHANTHÜ DOU 21 Bible Online

PHONGSHANTHÜ DOU 21 - Phom Naga bible

PHONGSHANTHÜ DOU 21

¹Mechem jom toueipü hamphong yanei leipa, hami laülükpü lem kü leiyei Kos ngoipeih, hatü nyihphei Rhodes, hatü haleipü Patara ngoipeih.

²Mechem hamphongi Phoenicialei leihen jahas heüpa, hami ha kü uotü leipeih.

³Hami müki veijü laknyong philei Cyprus eeshi tuhtü Syria lemei leiyei Tyre ngoipeih; mehenangkü hapa jahas leipü hanggo halei aokhen mü nyuteke.

⁴Hami haleipü vaipüthü hanei heüei halei nyih nyet thempeih. Laangha homei Paul kü Jerusalemei neleihen jomi eteke.

⁵Shejao mechem ham jom mü thempü nyih kempa, hami layaongei daipeih. Haleipü vaipüthü jom peü nyüha hapeüthü peü omshi chingnyü peih-ei yomshi jungphopeih, hatü ham peü yungkung ngoiyei aümei shaei phoptü,

⁶hüki hük mü selam vaiteitü hamphong jahaslei uotü leidai, jomphong shem yemei leidaipeih.

⁷Ham Tyre leipü nedoh-i daiyei Ptolemais ngoipeih, hatü hami haleipü vaipüthü mü selam vaiteitü jom mü nyih hük thempeih.

⁸Nyihphei hamphong layaongei Kasarea ngoiyei chongvenbü Philip, nyet khongkü hük, jom shemei peiyei büpa mü thempeih.

⁹Shem mangyempü büpalei yiükha jom ali nyu; jom peü kü teteivanei ehen thintho nyuteke.

¹⁰Mechem halei nyih kansho hük themei nyupa, Agabus shei menpü thibü hük Judea leipü yiüküpeih.

¹¹Ham touei peiyei büpai Paulei shüngshep yah-ei büpalei lakhila kü hapa shatü, “Hapa keiha Jerusalemei nyupü Jehoda ami hapa shüngshep shembü yepei shatü Kung amei lak kü shuohtükhen shei Laangha Daülangpai enyüke” shei büpai eteke.

¹²Mechem hami ha danpa, ham mü halei nyupü nanglakthüi Paul kü Jerusalemei te-aong shei khümei eteke.

¹³Hahepak kü Pauli, “Mehekei am thepnya hatü ngelei mongdang manghünya? Ngeiyü yepei shahahhen mon nevai, shejao SHEMBÜPA Jisulei men kü Jerusalemei dihenao temei nyüpeih” shei jangei e.

¹⁴Büpa yawh-ei neleiaokpü nangkü hami, “SHEMBÜPAi mongpükei nyemvai” shei etü nenmü nyupeih.

¹⁵Hapheikü ham temei Jerusalemei aonghen layaongpeih.

¹⁶Kasarea leipü vaipüthü hanei hamphong mü müküpeih, hatü shongpü nanglak, ham ngoiteihampü Cyrus am Mnason am shemei ham müei peipeih.

¹⁷Mechem hamphong Jerusalem ngoijapa, jeihinaüthüi hamphong mongongshi yah.

¹⁸Nyihphei Pauli Jakob thümnüng dai, hatü behethü peü omshi nyu.

¹⁹Jom mü selam vaipheikü büpalei chongphopü dousho homei mekei Kahvangi Kung am touei dou dükpa ha hük pheikü hük shah-om shuohteke.

²⁰Mechem jomi ha danpa, jomi Kahvang men longteke. Hahepak kü jomi büpa kü, “Nüngiyao veihümao, jeihinaü, Jehoda am khongkü vaipüthü haja longi nyüke, hatü jom peü shahkung kü longi nyakeikennyüke.

²¹Nüngi Kung am mü nyupü Jehoda am kü Mosa shahkung kübü yandaihen, hatü hapeüthü kü shuw nejaphen, nevaijü jenei vanglem nedükhen nyuhpüja shei jomi eteinyüke.

²²Shejema mehe dükhenang? Nüng peiteke shei jomi hingmei nyingshasha.

²³Hanangkü hami mehe e, ha düktuh. Lahpü yahtü shennyak ali nyüke.

²⁴Nüng jomphong mü daituh, hatü jom mü daüeilangpü ken düktuh hatü sho kuppü kü lop shuohtuh. Shejüang peüi nüng jung eteipeyü shahshem khih, hatü nüngao shahkung bangei nyunyu khih shei nyingdaihen.

²⁵Shejao Kung am vaipüthü nangkeyü jomi lajei kü jeetükpü hahying, iy hatü yüpei jüpü yem nehahhen hatü mükbongjuyung nedükhen shei jen temteipü lai shomphei” shei eteke.

²⁶Hahepak kü Pauli hathü shennyak müei dai, hatü nyihphei jom mü büpaao daütük, hatü büpa phopshemei jomphong mü shüei daütüktü nyih meshük nyuei dohhen, hatü jom peü shing moila shuohhen ha nyih nyinghüteke.

²⁷Mechem nyih nyet lomhen mü nyupa, Asia leipü Jehoda am hanei Paul phopshemei eeyei jomphongi khongnyü peü mophütü jomi büpa yeptü,

²⁸“Israel shennyakthü, ham kü sheühshih! Shing peülei jenei nanglak, jenei shahkungnyü hatü hapa shing khüei nyuhpeyü büpa hih; ha mü nyeishi büpai Greek am phopshemei müei peiyei hapa daülangpü shing sheihtükpeih” shei lenteke.

²⁹Mehenangkü jomi shelei büpa mü chingnyülei Ephesia am Trophimus müshi eeteke, hatü Pauli büpa phopshemei müei peiphei khih shei deihteke.

³⁰Hahepak kü chingnyü kemei mopteke, hatü shennyakthü chemi mokei heih. Jomi Paul yepei phopshem leipü shüei ngai, hatü shüshülangi sha küptük.

³¹Mechem jomi büpa jününg shei kheyei nyupa Rom veshan mübü touei Jerusalem chingnyü kemei mopnyüke shei shahjang peiteke.

³²Büpai met shei lakchongbüthü hatü veshanthü müei khongnyü touei mokei yiü. Mechem mophicheü ngaipüthüi veshan mübü hatü veshanthü eepa, jomi Paul kü üppü dohteke.

³³Hahepak kü veshan mübü peiyei büpa yep, hatü nyiamvü nyi büpa kü shahen ngeükhüam shuoh. Hapheikü büpai büpa kü nüng üpa hatü mehe dükpa shei phe.

³⁴Khong hanei-i lemhük len, khong hanei-i lebü len. Moppü nangkü veshan mübüi mepa jiüpa ha shah neyep-aok; hanangkü büpai Paul veshanthü nyushingei leihen ngeükhüam shuoh.

³⁵Mechem Paul lateen ngoipa moppü khong ahshi mangpü nangkü büpayü veshanthüi poh-ei daihen mü vamteke.

³⁶Büpa phei müpü khongi, “Büpa jütuh!” shei lenteke.

³⁷Paul veshanthü nyushingei shüshekü büpai veshan mübü kü, “Ngei nüng kü lemhük eaoküla?” shei phe. Veshan mübüi, “Nüngi Greek shah nyingnyüla?

³⁸Nüngü shelei mophicheü ngaitü phaülei phaü am haja ali müei daipü shennyak vaila?” shei phe.

³⁹Pauli, “Ngeiyü Jehoda am Cilicia leipü Tarsus am shongnyü chingnyü kübü bühü shennyak hih; ngei nüng kü khümei enyeih, ngei shennyakthü kü eshah” shei e.

⁴⁰Mechem büpai Paul kü mongshuohpa, Pauli lateenei yaongtü nanglakthü kü nenkütuh shei e, hatü mechem jom peü nenei nyupa, büpai jomphong kü Hebrew shah mü eteke.