Read Phom Naga PHONGSHANTHÜ DOU 22 Bible Online

PHONGSHANTHÜ DOU 22 - Phom Naga bible

PHONGSHANTHÜ DOU 22

¹“Jeihinaüthü hatü pathü, shaang ngei am touei ngei nang ekününg bangtuh.”

²Mechem büpai Hebrew shah mü epü jomi danpa, jom nyeinya nenmü nyu. Hahepak kü büpai e:

³Ngeiyü Jehoda am hük, Cilicia kü Tarsuslei bühpü, Gamaliel phangkü hapa chingnyülei longpeih, hatü shinnyih am peü keiha jenei bü shahkung kü nyupükei Kahvang kü nyakeikenei nyupeih.

⁴Ngeiyao hapa Lem kü dihen thahshi nyüha baha yepei khoklat kü küpei shüveihampeih,

⁵mehenangkü ngongchong hatü shahtap kübü behethüi ngei nang denpü shuoh-aohen. Ngeiyao jomphong leipü lai Damaska leipü jeihinaüthü shing yahpeih, hatü halei nyupüthü yepei Jerusalemei leiyei shüveihen shingvaishi ngei halei heihpeih.

⁶Mechem ngei daiyei Damaska ngoi-üi nyupa, haümhah pheikü vangsho leipü vangngai longpü hük ngangahük kü ngei kü khangphopeih.

⁷Ngei kahdokei doei sha, hatü ngeü hüki ngei kü, “Saul, Saul, mehekei nüngi ngei kü shüveinya?” shei epü danpeih.

⁸Ngei jangei, “SHEMBÜPA, nüng üpaang?” shei eteke. Hahepak kü büpai ngei kü, “Ngeiyü nüngi shüveipü Nazareth am Jisu hih” shei ephüteke.

⁹Shaang ngei mü nyupüthüi vangngai payü eeteke, shejao ngei kü shah ebülei ngeü jomi nedanang.

¹⁰“SHEMBÜPA ngei mehe dükhenang?” shei ngei pheteke. SHEMBÜPAi ngei kü, “Yaongtuh, hatü Damaskalei shütuh; nüngi dükhen shingvaishi hanpü lemphü halei ephahen hih” shei eteke.

¹¹Hapa vangngai nyapai ngei ne-eeaokpü nangkü ngei mü nyupüthüi ngelei lak kü düktü Damaskalei müei shüpeih.

¹²Ananias shei menpü shennyak hük, shahkungnyü kü jiüshi vaipü hatü halei nyupü Jehoda am peüi büpa nang meishi epü shennyak hük;

¹³ngei touei peiküpeih, hatü ngei touei yaongtü, “Jeihinaü Saul, nüngei müki eetuh!” shei ephopeih. Hapa hepak kü-üng ngei mük ap, hatü büpa eepeih.

¹⁴Hahepak kü büpai, “Jenei bühipalei Kahvangi büpai mongpü nyinghen, hatü Daülangpü Hük eehen hatü büpalei ngeü banghen nüng jeteke;

¹⁵mehenangkü nüngi eepü hatü danpü kahdoknyü peülei nüngü büpalei denbü vaihen.

¹⁶Mehekei nüng pheinya? Layaongtuh, baptüktuh, hatü nüngei mang paütüktü büpalei men kü nyüktuh” shei ephopeih.

¹⁷Ngei Jerusalemei leiyei phopshemei phopei nyushingkü ngei shomeiyingei shapeih,

¹⁸hatü Jisui ngei kü, “Shülangi Jerusalem leipü laoei daituh; mehenangkü jomi ngei nang nüngi denpü neyahküpih” shei ephopeih.

¹⁹Ngei jangei, “SHEMBÜPA, ngei Sinagog hük leipü hük shei nüng kü vaipüthü khoklatei küphen hatü üpei longteihampeih shei jomi nyingei nyüke;

²⁰hatü mechem nüngei denbü Stephenei iy yenhüpa, ngei hatouei yaongshi büpa jüpeyü jiüphei shei büpa jüpüthülei ashakviha jungei nyupeih” shei e.

²¹Hahepak kü büpai ngei kü, “Daituh, hatü ngei nüng tailulei Kung am touei shomhen” shei ephopeih.

²²Jomi hajük thahshi mon Pauli epü bang. Hapheikü jomi shao ngeü anei, “Kahdoknyü kübü büpa jütüktuh; büpa yemmü nyuhen nehanpih” shei lenteke.

²³Mechem jomi lenei, ashakviha nyiukei domei, kübhih paoh-ei haiyei nyupa,

²⁴veshan mübüi büpayü veshanthü nyushingei leituh shei e, hatü büpa khüei bukpüshaanpü vampü nang nyinghen shingvaishi büpa kü leiyei shah phehen ngeükhüam shuoh.

²⁵Shejao mechem jomi büpa kü üpnüng vüi shashuohpa, Pauli kho hük shak kü veshan mübü yaongshi nyupü kü, “Nyonghüpü neshiüpü kü Rom am bühü hük kü üphen shahkungi mongnyu je?” shei e.

²⁶Mechem kho hük shak kü veshan mübüi ha danpa, büpa veshan mübü longpüba touei heih-ei ha jung eteke. “Nüngi mehe dükhenang? Hapa shennyakü Rom bühü khih” shei e.

²⁷Hapa veshan mübü Paul touei heih-ei, “Nüngü Rom bühü shennyak je? Ngei kü eshih” shei phe. Büpai, “Hih” shei jang.

²⁸Hahepak kü hapa veshan mübüi, “Ngeiyü lop longi shuohtü bühü leipeih” shei e. “Shejao ngeiyü nyübüh-i bühü hih” shei Pauli e.

²⁹Üamphongi büpa kü shah phehen nyu, jom peü yandaikem, hatü veshan mübü büpa monhai Paul, Rom bühü hük kü nyiamvüi shapü khih shei nyemteke.

³⁰Nyihphei Jehoda ami Paul khüei mehekei nyonghünya shei lekei nyinghüpü nangkü büpai Paul vetük, hatü ngongpathü hatü shahtap kübü nanglak peü kü thaihen nyük. Hahepak kü büpai Paul deiyei jomphong touei yaonghüteke.