Read Phom Naga PHONGSHANTHÜ DOU 23 Bible Online

PHONGSHANTHÜ DOU 23 - Phom Naga bible

PHONGSHANTHÜ DOU 23

¹Pauli shahtap kübü nanglakthü kü hüngei veitü, “Jeihinaüthü, shinnyih thahshi ngei ngelei chudeih mongdang meipüba kü Kahvang touei ngelei yangnyu jiüshi nyuei heihtepih” shei e.

²Hahepek kü Paul yopailei yaongshi nyupüthü kü Paulei ju kü aphen ngongchong Ananias-i ngeükhüam shuoh.

³Hahepak kü Pauli büpa kü, “Kahvangi nüng kü apphahen, nüng shola-i jintükpü bham! Shahkungnyü kü jiüpü aimü shahphenhen nüng hatouei uoshi nyüke, shejao nüngi-üng ngei kü üptuh shei ngeükhüam shuohpai shahkung mangnyu je?” shei eteke.

⁴Paul yopailei yaongshi nyupüthüi, “Nüngi Kahvangi jepü ngongchong kü yaüei enyu je?” shei e.

⁵Pauli, “Jeihinaüthü, büpayü ngongchong khih shei ngei nenyingangpih; ‘Ammei nanglak vanglem lembü kü ten te-e’ shei nyangei nyüpeih” shei e.

⁶Hahepak kü Pauli thaipüthü haneiyü Sadduke, hatü lebüthüyü Pharisee am khih shei nyingei büpai shahtap kü peipüthü kü nyüktü, “Jeihinaüthü, ngeiyü Pharisee am, Pharisee amei hapeü hük. Dipü kübü yangei leihen monglempü nangkü ngei kü shahphennyu khih” shei e.

⁷Mechem büpai ha epa, Pharisee hi Sadduke am khong nyi dehen chongpang, hatü khong nyi vaishi handai.

⁸(Sadduke ami dipü kübü yangei neleinyih; vangsho phongshan nevaijü laangha neshiüpih shei enyüke, shejao Pharisee ami hathü jem peü nyüpeih shei hinglemnyüke.)

⁹Hahepak kü nyeinya nyeinya lenteke, hatü Pharisee am shahkung nyuhbüthü hanei yaongei longi mangshi shah dakteiyei, “Hapa shennyak kü pungpü meheyao ne-eeang. Laanghai nevaijü vangsho phongshani büpa kü eshuohpü vaijema meheang?” shei jomphongi e.

¹⁰Shah dakteipü longi mangshi vampü nangkü hathü khongi Paulü khih mü shaaktükhen khih shei veshan mübüi nyemei deih. Büpai veshanthü kü khong mü yiüei jomphong toueipü Paul lükei deilanghen, hatü veshanthü nyushingei leilanghen ngeükhüam shuoh.

¹¹Ha ya SHEMBÜPA büpa yopailei yaongtü, “Nüng monglongtuh! Nüngi ngei jung Jerusalemei denpü shuohpükei nüngi Rom leiyao denpü shuohhen” shei e.

¹²Nepphei Jehoda am thaiyei Paul mangjü thahshi nük nehahhen hatü yung neyinghen phaüshah show, hatü vangteiteke.

¹³Hapa shah showpü kü ompü shennyak pinyi dok kü nyuteke.

¹⁴Jomphong ngongpathü hatü behethü touei peiyei, “Paul mangjü thahshi hahying meheyao nehahhen vangtüktih.

¹⁵Hanangkü shaang amphong hatü shahtap kübü nanglakthüi büpa kü shao meishi lekei dokei veihen yünyeih shei eshi veshan mübü kü etü büpa yükei, hatü büpa mangngoikei-i büpa jütükhen ham temei nyüpeih” shei e.

¹⁶Shejao mechem Paulei chenaü-ei hapeüi ha shah showpü danpa, veshanthü nyushingei heih-ei büpai Paul kü eshuohteke.

¹⁷Pauli kho hük shak kü mübü hük kü nyüktü, “Hapa nethepa veshan mübü touei müei deituh; mehenangkü büpai büpa kü ehen lemhük nyüke” shei e.

¹⁸Hanangkü büpai büpa müei veshan mübü touei deitü, “Khoklatei nyupü Pauli ngei kü nyüktü hapa nethepa nüng touei müei deijatuh shei ephopeih; büpai nüng kü ehen lemhük nyüpüja” shei eteke.

¹⁹Hapa veshan mübüi büpa kü laki düktü haolei lomei müei deiyei, “Nüngi mehe ehen nyüpa?” shei phe.

²⁰Büpai, “Jehoda am jom pinyi hükshing ngenyih Paul müei shahtapei nyeinya shahhidou lekei phenüng kei müei yühen nüng kü phehen temteiteke.

²¹Shejao nüngi jomei yawh kü teshü; mehenangkü jom pinyi mü nyeishi büpa jühen tapei nyüke. Büpa mangjü thahshi nehah neyinghen vangteitü nyüke. Jom shaang temei nyüke, hatü nüngi mongshuohpü mon danei nyüke” shei eteke.

²²Hanangkü veshan mübüi nethepa kü ngeükhüam shuoh-ei, “Nüngi ngei kü ha jung eshuohpeih shei üpa kao te-e” shei eteke.

²³Hapheikü büpai kho hük shak kü mübü nyi nyükei, “Sheya shü baji kü Kasarealei heihhen veshan kho nyi, koyei veshan pejempüan, hatü phung nopü shennyakthü kho nyi temtuh.

²⁴Shao Paul uohen koyei shuohtuh hatü büpa meishi governor Felix touei deituh” shei e.

²⁵Büpai hapa shahhidou nang lai nyangei shuoh.

²⁶“Klaudius Lysias-i vangdhüm shuoh-ei nyupü governor Felix, Selam.”

²⁷“Hapa shennyakü Jehoda ami yepei jütükhen mü nyupü khih, shejao mechem büpayü Rom bühü shennyak shei ngei danpa, ngei veshanthü müei peiyei büpa yangpeih.

²⁸Jomi büpa mehe nangkü hajükjük nyonghünya shei ha ngei nyinghen shahtapei müei peipeih.

²⁹Shejao büpayü jomei shahkungnyü nangkü nyonghüpü khih, shejao jühen shangshi büpai meheyao nedük-ang, nevaijü khoklatei küphen mao neshiü.

³⁰Hapa shennyak khüei phaüshah showpü danei ngei büpa nüng touei shomphünyeih, hatü büpa nyonghüpüthüao büpa khüei jomi mehe ehüpa ha nüng touei ehen ngeükhüam shuohtepih” shei e.

³¹Hanangkü epükei veshanthüi Paul müei nyak kü Antipatris touei yiü.

³²Nyihphei koyei veshanthü büpa mü daihen tuhphongtü aopü veshanthü nyushingei nyokei leidai.

³³Mechem jomphong Kasarea ngoiyei governor kü ha lai yahshuohpa, jomi Paul-ao büpa touei deiyei shuoh.

³⁴Lai ieyei veitü büpa kü nüng mepa moidoi leipüang shei phe, hatü mechem büpai büpayü Cilicia leipü hih shei danpa,

³⁵büpai, “Nüng nyonghüpüthü ngoiküjü hapa shahhidou ngei bangei veihen hih” shei e. Hapheikü büpai Paul-ü Herodei ongshemei meishi yomei tuhtuh shei ngeükhüam shuoh.