Read Phom Naga PHONGSHANTHÜ DOU 24 Bible Online

PHONGSHANTHÜ DOU 24 - Phom Naga bible

PHONGSHANTHÜ DOU 24

¹Nyih nga pheikü ngongchong Ananias mü behethü hatü shahkung nobü Tertullus, hathü yiüei governor touei Paul khüei eteke.

²Mechem Paul nyükei deijapa, Tertullus-i büpa nyonghüei ehen chongpang:, “Nüng Longpüba, nüng nyupü nangkü ham chingmei kü nyunyeih, hatü nüngei manghkhang homei hapa nanglakthü kü yeiyapü vamhüteke.

³Hami lem peü kü hatü peü philemei hapa mongongshi yahnyüpeih.

⁴Shejao nüngei hepak ahshi netükhüpü nangkü nüngi bamei hami shohloh-i ekününg banglangshih.

⁵Hami hapa shennyakü shanghah ngaibü shei nyingei nyüpeih; kahdoknyü peülei Jehoda am mü mophicheü ngainyüke. Büpayü Nazarene khong kü mübü hih.

⁶Büpai phopshem dangkao sheihtükhen khepeih; hanangkü hami büpa yeppeih hatü hami hamei shahkung kü jiüpükei büpa kü shahphenhen vaipeih.

⁷Shejao mübü longpü Lysias longi mangshi peiyei hamei lak leipü büpa shüei lüdaipeih,

⁸hatü büpa nyonghüpüthü kao nüng touei peihen ngeükhüam shuohpeih. Nüngi büpa kü dokei veijü hami büpa mehe nangkü nyonghünya nüngi büpa leipü nyingaokhen hih” shei e.

⁹Jehoda am peü chemi mongjemtü ha peü jiüpeih shei eteke.

¹⁰Mechem governori büpa kü etuh shei hanpa, Pauli jangei, “Ngei mongongshi ngei nang ehen yaongnyüpeih; mehenangkü nüngü bong longi hapa kahmük kü shahphenei nyupeih.

¹¹Nüngi yopai-i dangaokhen hih, ngei Jerusalemei phopnüng aongpheikü nyih anpünyi dok kü mangdaipih.

¹²Jomi üpa mao ngei phopshemei deyei nevaijü Sinagoglei nevaijü chingnyülei mophicheü ngaiyei mechemao ne-eeangpih.

¹³Nevaijü jomi shaang ngei khüei epü shah kü nüng touei shah lakdükshing nedangpih.

¹⁴Shejao ngei nüng touei ha vaiteke shei enyeih; jomi ngei kü hayaoha hanpü khong shei enyüke, shejao hapa Lem phei müpü hük keiha ngei hamei bühipa Kahvang kü shahkungnyülei hatü thihivam lai kü nyangei nyupü lemphüli kü hinglemei khümnyeih.

¹⁵Jom kü nyupü monglem kei-üng ngeiyao Kahvang kü monglemnyeih — hayü daülangpü hatü nedaünelangpü nyiphen yangei leihen.

¹⁶Hanangkü ngei meiden doh-ei Kahvang hatü hangku touei düngei chudeih mongdang daülangi nyuhen khenyeih” shei e.

¹⁷Bong kansho hük pheikü ngei Jerusalemei taopathü kü sheühhen moila yahnüng, hatü moila shuohnüng leipeih.

¹⁸Mechem ngei ha dükei nyupa, jomphongi ngei phopshemei daüeilangpü ken dükei tempheikü shennyak khong neshiü, nevaijü meheyao bukpüshaanpü neshiüi eepü khih.

¹⁹Shejao Asia leipü Jehoda am hanei shepeih — jomi ngei khüei lemhük nyujema jom hammü nüng touei peihen vaipeih.

²⁰Hei nevaijü ngei shahtapei yaongshing kü ngei pungpü mehe dangpa, hatoueipü shennyakthüi nyemekei.

²¹Ngei jomphong touei yaongshing kü, “Dipü kübü yangei leinyeih shei epü nangkü ngei shinnyih am touei ngei shahphen shingei nyüpeih” shei ngei hapa shah mon lenei epeih.

²²Shejao Felix-i hapa Lem meishi nyingei nyupü nangkü, “Mechem Lysias veshan mübü yiükahen, hajü mon ngei ammei shahphenhen” shei etü thaipü yantükpeih.

²³Hapheikü büpai veshan kho hük shak kü mübü kü khoklatei küphen epeih, shejao büpa maani bhashahshi angtuh hatü büpalei küphüthüi büpa kü sheühnüng peiküpü kü tekhüam shei etü tuhpeih.

²⁴Nyih kansho hük pheikü Felix-i chenyüha Drusilla, Jehoda lapeü, mü peiyei büpai Paul nyüknüng deishih, hatü Jisu Khrista kü hinglempü nang büpai epü bangteke.

²⁵Pauli shahhing epü, ungeiaeipü hatü ngoikahen shahphenpü nyih nang ejashingkü Felix nyemei pei, hatü, “Shaang shingvaishi hajük vaishah; ngei hepak meipü kü ngei nüng nyüknüng shomphahen hih” shei epeih.

²⁶Pauli büpa kü lop yahshuohhen shei monglemshi nyu; hanangkü büpai chengei Paul nyüknüng deishih hatü büpa mü shah eteihamteke.

²⁷Bong nyi pheikü Felix kü Porcius Festus-i jeiteke; Jehoda ami büpa kü mong hah-ei nyemdeihshuoh shei Felix-i Paul-ü khoklatei tuhphong.