Read Phom Naga PHONGSHANTHÜ DOU 25 Bible Online

PHONGSHANTHÜ DOU 25 - Phom Naga bible

PHONGSHANTHÜ DOU 25

¹Festus hapa moidoilei peipü nyih jem phei kü büpa Kasarea leipü Jerusalemei aong;

²halei ngongpathü hatü Jehoda am mübüthüi Paul khüei büpa kü shah-om shuoh. Jomi büpa kü,

³Paul khüei jom kü bampü huei Jerusalemei shing chaiyei anshih shei khümei e. Hingmei meyü jomi büpa lemei jütükhen tapei nyuhen küpjan shüpü khih.

⁴“Paul-ü Kasarealei küpshi nyüpeih, hatü ngeiyao lomi halei leihen deihshi nyüpeih shei Festus-i e.

⁵Hanangkü am mübüthü hanei ngei mü yiüshah, hatü büpai lemhük pungei nyujema büpa khüei ammi etuh” shei eteke.

⁶Büpa jom mü nyih shet nevaijü nyih an nyupheikü Kasarealei lei, hatü nyihphei büpa shahphen shingei uo, hatü Paul büpa touei müei deikei shei ngeükhüam shuoh.

⁷Mechem Paul heihjapa, Jerusalem leipü yiüpü Jehoda ami büpa shonei yaong, hatü jomi meheyao shah lakdükshing nedangi Paul khüei shah longi e.

⁸Hahepak kü Pauli büpa yanglem yemei, “Ngei Jehoda amei shahkung khüei meheyao shaitükpü neshiüpih, nevaijü phopshem nevaijü ongpa khüei neshiüpih” shei e.

⁹Shejao Festus-i Jehoda am mong hahhühen nangkü Paul kü, “Nüng Jerusalemei aongei nüng khüei nyonghüpü shah nangkü ngei touei shahphenhünyüla?” shei phe.

¹⁰Pauli, “Ngei ongpalei shahphen shingei yaonghen nanyüpeih; hatouei ngelei shahphenhen vongbong. Ngei Jehoda am kü meheyao pungei nedük ha nüngiyao meishi nyingei nyüke.

¹¹Shaang ngei nejiüi hatü dihen shangshi shaitükpü lemhük dangkao nyujema ngei dihen kübü yanglem neyemnyih, shejao jomi ngei khüei epü kü meheyao shahhing neshiüjema, üpaiyao ngei yepei jom kü shuohnüng neaok. Ngei ongpa touei heihhen hih” shei e.

¹²Hahepak kü Festus-i büpalei shahtap kübü nanglakthü mü eteitü, “Nüngi ongpa touei heihhen hih shei epü nangkü nüng ongpa touei heihtuh” shei eteke.

¹³Nyih kansho hük peihpheikü Agrippa ongpa hatü Bernis nyi Festus mü pongnüng Kasarealei yiü.

¹⁴Jiji halei nyih kanja thempü nangkü Festus-i ongpa mü Paulei nang jaütei. Büpai, “Felix-i khoklatei tuhphongpü shennyak hük hammü nyüpeih.

¹⁵Mechem ngei Jerusalemei aongjapa, Jehoda am ngongpathü hatü behethüi büpa khüei shah koei peiküpeih hatü büpa nyonghütuh shei eküpeih” shei e.

¹⁶“Ngei jomphong kü Rom amei vanglem kü shennyak hük büpa kü khüei yaongpüthü touei laophü nang ehen hepak mei mangdang thahshi üpayao lanei shuohnüng neaokpih shei eshuohpeih.

¹⁷Mechem jom ngei mü ponghen hatouei peiküpa, shahphen shingei thaihen kaaei nenyui nyihphei-üng nyükpeih, hatü hapa shennyak müei deikahen ngeükhüam shuohpeih.

¹⁸Mechem büpa khüei yaongpüthü shah ehen yaongpa, ngei deihpükei jomi büpa kü meheyao ten dükpü nang ne-eang.

¹⁹Shejao jomi büpa mü jomei vaipü vanglem hatü Jisu shei menpü shennyak dipü kübü yangei leipeih shei epü nangkü shah nethahteipü hük nyüke.

²⁰Hapa keipü shahhidou mekei pangei yemei daihen ai mah-ei nyupeih; hanangkü ngei büpa kü büpai mongjema Jerusalemei aongei halei shahphenpü shingei nyemyaong shei eshuohpeih.

²¹Shejao Pauli Rom ongpa phangkü shahphenhen büpa touei khoklatei küpei tuhshih shei khümpü nangkü ngei büpa ongpa touei mangshom thahshi küpei tuhnyüpeih” shei eteke.

²²Agrippa-i Festus kü, “Ngeiyao büpai epü bangei veihen hih” shei e. Hanangkü büpai, “Ngenyih bangei veituh” shei eteke.

²³Hanangkü nyihphei Agrippa hatü Bernis nyi longi meishi temtü ngetnahcheüi yiüei veshan mübüthü hatü chingnyü kübü mübüthü mü shahthai shemei shüteke. Festus-i eshuohpü nangkü Paul müei deiteke.

²⁴Festus-i, “Agrippa Ongpa, hatü hatouei ham mü thaiyei nyupüthü, hapa shennyak kü veihümao! Jerusalem hatü ham mü Kasarealei Jehoda am khong kemei büpa nangkü ngei kü khümei epeih; hatü jomi lenei büpa yemmü nyuhen neshang shei eküpeih.

²⁵Shejao büpa dihen shangei meheyao nedükang shei ngei dangaokpeih, hatü mechem büpai Rom ongpa touei heihhen epa, ngei shomtükhen tempeih.

²⁶Shejao jenei Ongpa kü büpa nang nyanghen hayaoha meheyao neshiüang. Hanangkü ngei büpa amphong touei deiküpeih, hatü anyei vaishi Agrippa ongpa touei, shejüang jen chemi büpa kü dokei veipheikü ngei nyanghen lemhük dangkao dangaokhen hiang shei deihpeih;

²⁷mehenangkü büpa khüei epü shah neshiüshiüi khoklatei küppü shennyak hük shomhen ahshi jiüpü nevaipükei deihnyüke” shei eteke.