Read Phom Naga PHONGSHANTHÜ DOU 26 Bible Online

PHONGSHANTHÜ DOU 26 - Phom Naga bible

PHONGSHANTHÜ DOU 26

¹Hapheikü Agrippa-i Paul kü, “Nüng nang ehen nüng kü mongnyeih” shei e. Hahepak kü Pauli büpalei lak haongei büpa nang shah ehen pang.

²“Agrippa Ongpa, Jehoda ami ngei nyonghüpü khüei ngei nangkü shinnyih nüng touei yaongpeyü lashüh meipü khih shei ngei deihnyeih;

³anyei vaishi nüngi Jehoda amei vanglem hatü dokteikhaungkhei nyingei nyüke; hanangkü nenteiaokei ngei epü bangkahen ngei nüng kü khümei enyeih.”

⁴Jehoda am peüi ngei hashih mebü mekei nyu, panghinüng ngelei nanglakthü mü hatü Jerusalemei mekei nyuei longpa nyingei nyüke.

⁵Ngeiyü hamei vaipü vanglem kü longi wong kohshi vaipü khong kübü shennyak hük Pharisee am hih shei jomi nyingei nyüpeih hatü jomi mongjema denpü shuohkahen.

⁶Ngei shaang hatouei hamei bühipa kü Kahvangi lahpü kü ngei monglempü homei shahphen shingei yaongshi nyüpeih.

⁷Nyakhingai thüngei lanei shuoh-ei khümshingkü jat anpünyi-i danghen shei monglempü lahpeyü hapa hih. Ongpa, hapa monglem nangkü Jehoda ami ngei nyonghünyu khih.

⁸Kahvangi dipü kübü yangei leishihnyeih shei hinglemhenü neaokbenüng kei ham mü nyupü amphongi mehekei deihnya?

⁹Nazareth am Jisu khüei ngei aokpü thahshi dükhen shei ngei nyingi deihshi nyupeih.

¹⁰Hanangkü ngongpathü leipü mongpü lai yahtü ngei Jerusalemei ha dükpeih; ngei vaipüthü longi yepei khoklatei küppü mon nevai, shejao mechem jom jühenshang, ngeiyao jom khüei nyonghüpü kü hean yahhampeih.

¹¹Hepak longshi shingkü ngei Sinagog hük leipü hük thahshi jom hanghihühen longteihampeih, hatü jom vaipü jom nyingi sheyü nevaipih shei ehühen ngei khehampeih. Ngei ahshi-üng jom kü mongshihpü nangkü ngei jom hanghihühen nangkü mih kung kahdok leipü chingnyüthü leiyao daiyei shüveihampeih.

¹²“Ha mongkü jaotü ngei yen daipü khongkü chem ngongpathü leipü wong hatü kangpü yahtü Damaskalei daipeih.

¹³Om philei, Oh ongpa, ngei lemei kamei nyushingkü ngei vangsho leipü vangngai hük vanghe mao nyapüba ngei hatü ngei mü nyupüthü shinei eepeih.

¹⁴Ham peü kahdokei dopeih, hatü ngeü hük vamei Aramaic shah mü, ‘Saul, Saul, mehekei nüngi ngei kü shüveinya?’ shei epü ngei danpeih. Atep ju kü la-i haojü laophü-üng ma yahnyeih” shei ephopeih.

¹⁵Hahepak kü ngei, “Nüng üpaang, SHEMBÜPA?” shei pheshuohpeih. SHEMBÜPAi jangei, “Nüngi shüveipü Jisu ngei.

¹⁶Shaang paoei nüngei la-i yaongtuh. Nüngi ngei leipü mehe ee, hatü ngei mehe nüng kü huphahen nyu, hapa chongphohen hatü denbü vaihen shingvaishi ngei nüng touei vamei jepeih.

¹⁷Ngei nüng, nüngei nanglakthü kübü hatü Kung am kübü yangphahen. Ngei nüngü,

¹⁸jomei mük aphühen hatü vangnyak kübü vangngai lemei lephühen, hatü kahshihlei ngan kübü Kahvang touei lephühen, shejüang jomi mang tükpü danghen hatü ngei kü hinglempü homei daütükpü khongkü shing danghühen shingvaishi ngei nüng shomnyeih” shei ephopeih.

¹⁹Hanangkü, Agrippa ongpa, ngei hapa pheikü vangsho amei manghkhang ven nedani nenyuangpih,

²⁰shejao shongpüba kü Damaska, hapheikü Jerusalem, hatü Judea kahmük kempülei hatü Kung am kao jom mong lepei Kahvang touei leihen, hatü jom mong leppü doui huhen epeih.

²¹Ha tata kü Jehoda ami ngei phopshemei yepei ngei jütükhen khepü khih.

²²Shinnyih thahshi Kahvangi sheüh-ei ngei hatouei longpü hatü maanpü touei lebü meheyao nevai shejao thihivamthü hatü Mosai vamhen shei tetei tuhpü jung denpü shuoh-ei yaongnyüpeih:

²³Messiah shangponghen hatü dipü kübü yangei leihen shongpü vaipü nangkü büpai Jehoda am hatü Kung am kü vangngai jung baonghen.

²⁴Mechem Pauli büpa nang eyei nyupa, Festus-i, “Paul, nüng ngadainyu khih! Ahshi nyingpai nüng ngadainyu khih!” shei e.

²⁵Ngei nganyu nevaipih, lupülongpü Festus, shejao ngei jiüpü shahhing enyeih.

²⁶Hingmei ongpa, hathü peü nejü-üi enyüpeih; mehenangkü hathü peü büpai nenyingi neshiüpih, hatü ha joshi nedüknyih.

²⁷Agrippa, nüngi thihivamthü shah kü hinglemnyüla? Nüngi hinglemnyeih shei ngei nyingnyüke.

²⁸Agrippa-i Paul kü, “Nüngi ngei kü hajük lomshi Khristan nyemvaikei shei yawhnyu je?” shei e.

²⁹Pauli, “Lomi vaijao nevaijao nüng mon nevai, shejao shinnyih ngei epü kü bangpüthü peü nyiamvüi shapü mü lenei ngei kei nyemlei shei ngei Kahvang kü phopnyeih” shei jangei e.

³⁰Hahepak kü ongpa hatü büpa mü nyupü governor hatü Bernis, hatü büpa mü uopüthü peü yaong;

³¹hatü jom daiyaki hüki hük mü, “Hapa shennyak dihen nevaijü khoklatei küphen shangshi meheyao ten nedükang” shei etei.

³²Agrippa-i Festus kü, “Hapa shennyaki Rom ongpa touei heihhen ne-elangmeyü vetükhen vaipü khih” shei eteke.