Read Phom Naga PHONGSHANTHÜ DOU 27 Bible Online

PHONGSHANTHÜ DOU 27 - Phom Naga bible

PHONGSHANTHÜ DOU 27

¹“Mechem hamphong Italylei daihen temteipa, jomi Paul hatü khoklatei küppü lebüthü Rom Ongpalei veshan kho hük shak kü mübü Julius kü deiyei shuoh.

²Hamphongi Adramittiumlei Asia yungnah shetei aongnüng shei nyupü jahas kü Thesalonika leipü Mecedonia am Aristarkhus-ao omshi shüei uotü layaongteke.

³Nyihphei hamphong Sidon ngoi, hatü Julius-i Paul kü bamei notei, hatü büpalei nadang kü küphüthüi nyemsheühshuoh shei büpa kü daihen hanteke.

⁴Hatoueipü hamphongi shao yungchingei heih-ei vanglük bangpü lem kü Cyprus lemei daiteke; mehenangkü vanglükü ham lemei nyongnyongi lükteke.

⁵Hami Cilicia hatü Pamphilia yungching hompheikü Lycia kahdok Myra ngoiteke.

⁶Halei veshan kho hük shak kü mübüi Italylei heihhen Alexandria amei jahas hük heüei hamphong halei shüteke.

⁷Hami youngmü nyih longi yah-ei daiyei longi ponghah-ei Nidus ngoi, hatü vanglük ham lemei nyongnyongi lükpü nangkü hami vanglük bangpü lem Salmone kahdok Crete lemei dai.

⁸Longi tok vaiyei hapa homei daiyei Lasea chingnyü yopailei, Meipü Jahas Yaongshing” shei epü shing ngoiteke.

⁹Hepak longi tük, hatü yungching kü daihen vongshüh vaihen mü vamteke; mehenangkü hapa hepak keyü Shüaeiyunglepü nyih-ao peihdaitü nyuteke, hanangkü Pauli jomphong kü,

¹⁰“Shennyakthü, jen jahas kü daihenü vongshüh vaihen mü eenyüke, hatü hapayü hanggo lak-ai mon nevai, jenei yangnyuao omshi vaihen khih” shei eteke.

¹¹Shejao Pauli epü meyü jahas yüpbü hatü jahas shembüi epü kü mon veshan kho hük shak kü mübüi mong shuoh.

¹²Halei ünyü hepak tükhen mü jahas yaongshing changshi neshiüpü nangkü haleipü shennyakthü longshi shingi kheyei ünyü hepak tükhen Phoenix dangkao ngoiaokjema meihen shei epü nangkü hamphong layaongteke. Hapayü Crete amei jahas yaongshing heshü-pehe hatü heshü-apsha phi nyuteke.

¹³Mechem pehe vanglük lükha lükhen pangpa, jomi deihpü ngoiaokhen shei jomi deihteke, hanangkü jomphongi jahas lakvü anei hütü yungphaang sheetei Crete homei daihen pang.

¹⁴Shejao meshük ne-angi Crete philemeipü mangpü vanglük, “Heong vanglük” shei epü ha lükteke.

¹⁵Vanglüki jahas kü hungpü nangkü she phi lepei nedaiaok; hanangkü hami nekhetei-i vanglük dailemei nyemdei shei nyudaipeih.

¹⁶Kauda shei epü shübaong maanpü ngoishing küang maani vanglük neshahpü loishing dangpeih; haleiang hamphongi kheyei jahas yangei tuh-aokpeih.

¹⁷Jomi yungphaangei shüei deiyei vü hanei jahas shinei shenhüteke; shejao jomphongi Libya yungkung bhihdü kü jahas maangdaihen khih shei yüngei deihpü nangkü vü kemei laitü vanglük dailemei hei-üng daipeih.

¹⁸Nyihphei vanglük longi mangpü nangkü jomphongi jahas leipü hanggo lak-ai noei yungei shüktük,

¹⁹hatü nyih jempabü kü jomphongi jahas leipü hadir noei yungei shüktük.

²⁰Nyih longi vanghe aongpü nevaijü litha vampü ne-ee, hatü yungching vanglük longi lükpü nangkü ham yanghen monglem neshiüi mong mahdaitü nyupeih.

²¹Sheyü jomphongü nük nehah-i hepak longi daipü nangkü Paul yaongei jomphong kü, “Shennyakthü, amphongi ngei epü bangei Crete leipü la neyaonglang meyü hajükjük mangtükpü hatü lomoh-aühaü neponghen vaipeih.

²²Shaangü am peü monglongtuh, jahas mü lenei am üpayao yangnyu nemahpih.

²³Mehenangkü meya ngelei Kahvang, ngei üpalei nyüpa hatü üpa kü khümnya, büpalei vangsho phongshan ngei touei peiyei,

²⁴ngei kü, ‘Paul, nüng tenyem, nüng Rom ongpa touei peiyei yaonghen, hatü Kahvangi nüng mü chemi daipüthü peü kü yanghen shuohteke.’

²⁵Hanangkü shennyakthü monglongtuh, hatü ngei epü keiha jiüshi chongkahen; mehenangkü ngei Kahvang kü hinglemnyeih.

²⁶Shejao jenphongü shübaong haneilei heih-ei kahdokei shühhen vongbong khih” shei eteke.

²⁷Mechem ya anpüalipabü ngoipa, hamphongü Adria Yungchingei daiyei nyu, hatü nyak jiam kü jahas yüppüthüi kahdok ngoinyu vaaishang shei deih.

²⁸Hanangkü jomphongi vü kü vihpü nyiam shentü yungmongei hüngshuoh shingkü meter pinyi chüshi nyu, hatü maani daitü shao hapakei hingshuoh shingkü meter hapüan chüshi nyu.

²⁹Jahas yaong kü kaonghen khih shei nyemei jahas yaonghen lakvü ali shüktü vangngaipü danei phopei nyu.

³⁰Jahas leipü laongei nyaidainüng shei jahas yüpbüthüi yung shangei ai maanpü shüktü lakvü annüng shükpükei shükteke.

³¹Hahepak kü Pauli veshan kho hük shak kü mübü hatü veshanthü kü, “Jahas yüpbüthü ha mongei nenyujema amphong yanghen neaokpih” shei eteke.

³²Hahepak kü veshanthüi ai kübü vü kü vettü ha deishihtük.

³³Vangngai shekü Pauli jomphong peü kü, “Shinnyihpai nyih anpüalipabü khih hatü ha yangkemei amphongi meheyao nehah-i küpshi nyuteke.

³⁴Hanangkü am peüi nük hahtuh; mehenangkü am büm meishi nyuhen vongbong; am üpaiyao laophülei shangjing leipü sholah hükao vüei nemahpih” shei e.

³⁵Büpai ha epheikü büpai hahying ngaiyei jom peü touei Kahvang kü menvih shuohtü ha demei hahteke.

³⁶Hahepak kü jom peü mong yangei laophü laophüi hahyingteke.

³⁷(Jahaslei ham peüshep kho nyi mü pejempüanpüvok nyuteke.)

³⁸Jom peü hah-ei mohpheikü jomi yungei wheat kemei shüktükpü nangkü jahas shangkhah-i leiteke.

³⁹Dhom mü jomphongi kahdok hüngei ne-ee, shejao jomi yung moinuk hük yungphaang kohshi ee, hatü aokjema jahas hapa yungphaangei deihen shei jomphongi tem.

⁴⁰Hanangkü jomphongi jahas yaonghen lakvü vettü yungei hüngtük. Hahepak kü jomphongi ailüng kü shenpü vü sheshuohteke; haphei küang jomi jahas yathen she philei anei haongpü nangkü vanglük yungphaang philei lük, hatü hamphong yungphaang philei heihteke.

⁴¹Shajao jahas bhihdü kü heih-ei kaongteke, hatü kahdokei heih, hatü jahas she phi bhihdülei taangdaipü nangkü nejenlenaok, shejao jahas shaongphi yungmok mangpai mangtük.

⁴²Khoklatei küppüthü üpayao yung kü owei daiyei nenyaihen shingvaishi veshanthüi jomphong jütüknüng shei tem,

⁴³shejao veshan kho hük shak kü mübüi Paul yanghüpü nangkü jomi tempü küpjan nedük. Büpai yung ownüng manpüthü kü shong haleipü laongei kahdok yemei owei heihhen e,

⁴⁴hatü aopüthü taukta bhaok kü hatü lebüthüi jahas benpü showhijung kü düktü heihhen ngeükhüam shuoh, hatü hapakei peü meishi yungphaang ngoiteke.