Read Phom Naga PHONGSHANTHÜ DOU 28 Bible Online

PHONGSHANTHÜ DOU 28 - Phom Naga bible

PHONGSHANTHÜ DOU 28

¹Hamphong meishi kahdok thahpheikü hapa shübaongü Malta khih shei nying.

²Halei nyupü ami longi bampü huphopeih. Vang keiyei wohongpü nangkü jomi aw jaktü ham peü kü halei shinei uotuh shei ephopeih.

³Pauli püthang thaiyei aw kü jakteke; hahepak kü biü hük awi shaamshuohpü nangkü vamei Paulei lak kü ngeihteke.

⁴Mechem haleipü shennyakthüi büpalei lakei biü ngeihshi eepa, jom hüki hük mü, “Hapa shennyakü shennyak jüpü am vaihen khih. Büpa yungching yinglükleisho kübü yangjao shahhingi büpa yemmü nyuhen nehanpü khih” shei eteiteke.

⁵Shejao büpai hapa biü awbhaongei dheüei yaktük hatü nekaokhah.

⁶Jomi büpayü poukkahen nevaijü dikahen shei deih, shejao hepak longi angdaijao büpa kü meheyao hayaoha nevam; hanangkü jomi mong yeiyaei büpayü kahvang hük vaaishang shei ehen chongpang.

⁷Shaang hapa shing yopailei hapa shübaong kü mübü shennyak hük, Publiuslei kah nyuteke; büpai ham mongongshi yah, hatü nyih jem thahshi hamphong kü ühyingteke.

⁸Hahepak kü Publiuslei chepa mihbheü hatü iy kohshi vom daiyei tüngteke. Pauli büpa thüm, hatü büpai büpa kü laki dükei phoptü tüngpü meidai.

⁹Ha vampheikü hapa shübaong kübü lebü nanglak din nyupüthü pei hatü tüngpü meitükkem.

¹⁰Jomi hamphong kü dhüm longi shuoh, hatü mechem ham layaongdaihen ngoipa, jomi ham nahen hahying peü jahas mongei hüphüteke.

¹¹Lenyang jem pheikü ünyüyang kemei shübaongei nyupü Alexandria leipü “Kahvang Nyi” shei epü jahas kü layaongei dai.

¹²Ham daiyei Syrakus ngoi, hatü halei nyih jem them;

¹³hapheikü hamphongi jahas yaonghen vülak anei hütü daiyei Rhegium ngoi. Nyihphei pehe vanglük lük, hatü nyih nyipabü kü Puteoli ngoi.

¹⁴Halei hamphongi vaipüthü pongei jom mü hapta hük themkütuh shei thongteke. Hatü hapakei hamphong Romei heihteke.

¹⁵Haleipü vaipüthüi hamphong peipü danei Appius Hatshing hatü Bangtap Jem thahshi baongnüng heihküteke. Hathü eeyei Pauli Kahvang kü menvih shuoh hatü mongyangteke.

¹⁶Mechem ham Rom ngoipa, Paul kü büpa nyingnying büpa yompü veshanthü mü nyuhen hanteke.

¹⁷Nyih jem pheikü büpai hapa shingeipü Jehoda am mübüthü kü nyük. Mechem jom thaijapa, büpai jomphong kü, “Jeihinaüthü, ngei jenei nanglak hatü vanglem khüei meheyao nedükjao jomi Jerusalemei ngei yepei Rom am kü shuohpü khih.

¹⁸Jomi ngei kü dokei veitü Rom ami ngei vetükhüei deih; mehenangkü dihen shangshi ngei pungpü meheyao nenyuang.

¹⁹Shejao Jehoda ami ha kü khüei yaongpeih, hanangkü ngei jenei nanglak khüei ehen meheyao neshiüjao ngei Rom ongpa touei peihen eshuohpeih.

²⁰Ha tata kü ngei am mü ponghen hatü ehen nangkü pheshuohpeih; mehenangkü Israel amei monglem men kü ngei hapa nyiamvü-i shatü nyüpeih” shei e.

²¹Jomphongi büpa kü, “Nüng nangkü hamphongi Judea leipü lai meheyao nedang, hatü haleipü peipü jeihinaüthü üpaiyao nüng jung nemei-i ne-ekei nevaijü shah-om ne-aokkeiangpih.

²²Shejao nüngi mehe deih, hami nüng leipü danhahhüangke; mehenangkü hapa khong nangkü peüei khüei langmaanpü hami nyingnyüke” shei e.

²³Jomi büpa mü ponghen nyih itteipheikü jomi büpa paümpü shingei khong longi pei. Dhom kübü om dhüshi büpai hapa jung nih-ei Kahvang ongching jung denpü shuoh, hatü Mosa shahkung hatü thihivam laithü kübü eyei jomphongao Jisu shingvaishi lepei leihen khe.

²⁴Hanei ami büpai epü kü vaiteke shei mongkü pong, shejao haneiyü hingnelem.

²⁵Hanangkü jom hüki hük mü shahju nejiütei, hatü jom leidai shingkü Pauli shao shah hük hapakei e: Isaiah thibü homei ammei bühipa kü Laangha Daülangpai epeyü jiüpü khih,

²⁶“Hapa nanglakthü touei daiyei etuh: Ammi banghen shejao nedanaokhen, hatü ammi veihen shejao ne-eehen.

²⁷Mehenangkü hapa nanglakthülei mongdang ngadai, hatü jomei dhaong nedanhen mü hüdai, hatü jomei mük phüngdaiteke. Hei nevailang meyü jomei müki eehen, jomei dhaongi danhen, hatü jomei mong kü nyinghen, hatü jom ngei lemei lepei leihen, hatü ngei jom meitükhah shepeih.”

²⁸Hanangkü am kü ha nyinghünyeih, Kahvangei yemleipeyü Kung am touei shompü khih; jomi ha bangkahen.

²⁹Büpai ha epheikü Jehoda ami jom jom mangshi shah dakteiyaki leidaiteke.

³⁰Büpa halei vangbong nyi thahshi fara shem kü nyu, hatü büpa touei peijapüthü peü mongongshi yah.

³¹Büpa monglongshi hatü meheyao khüampü neshiüi Kahvang ongching baongei SHEMBÜPA Jisu Khrista jung nyuhteke.