Read Phom Naga PHONGSHANTHÜ DOU 4 Bible Online

PHONGSHANTHÜ DOU 4 - Phom Naga bible

PHONGSHANTHÜ DOU 4

¹Mechem Peter hi Johan nyi nanglakthü kü shah eyei nyupa, ngongpathü, phopshem yompü mübü, hatü Sadduke am jiji touei pei.

²Phongshanthüi nanglakthü kü Jisu kü dipü kübü yangei leipü nyüpeih shei nyuhpü hatü baongpü nangkü jomphong longi shanghah-ei nyu.

³Hanangkü jomi jiji yepei nyihphei thahshi khoklatei tuh; mehenangkü om dhüdaitü nyuteke.

⁴Shejao hapa shahjang danpüthü longi hinglem, hatü jomphongü haja nga hükshing nyuteke.

⁵Nyihphei jomei vanglem lembüthü, behethü hatü nyangbüthü Jerusalemei thai,

⁶hatü ngongchong Anna, Kaiaphas, Johan, Alexander, hatü ngongchongei shem am kübü peü omshi thai.

⁷Jomphongi khoklatei küppü nyi jiamei yaonghütü, “Üpalei wong nevaijü men kü ammi ha düknya?” shei jomi phe.

⁸Hahepak kü Peteri Laangha Daülangpai maei jomphong kü e, “Nanglak vanglem lembüthü hatü behethü,

⁹tüngei nyupü hanei am kü doumei dükpü nangkü shinnyih henji kü shah phejema, hatü hapa shennyak mekei etü meihüpa shei phejema,

¹⁰amphongi shophang kü aptükpü shejao Kahvangi dipü kübü yangei leishihpü Nazareth am Jisu Khristalei men kü hapa shennyak shaang am touei yaongshi nyüpeih shei am peü kü hatü Israel nanglakthü peü kü nyinghünyeih.

¹¹Hapa Jisu-ü, ‘am shem vepüthüi yaktükpü yaong, shongnyü shemshouk yaong leiteke.’

¹²Üpa kao yemleipü neshiü; mehenangkü jen yanghen shingvaishi vangsho phangkü hangku üpa kao lebü men shuoh-ei neshiü.”

¹³Shaang mechem jomi Peter hi Johan nyi mong longpü eepa, hatü jijiyü lai nemanpü jiüjiü shennyak shei nyingpa, jomphong thama, hatü Jisu mü nyuhampü nyi khih shei nying.

¹⁴Mechem jomi meidaipü shennyak jomphong touei yaongshi eepa, jomi meheyao khüei ne-eaok.

¹⁵Hanangkü jom hüki hük mü hapa nang shah shükteishingkü jiji kü shahtap leipü lüdaituh shei ngeükhüam shuoh.

¹⁶Jomphongi, “Jeni henyi kü mehe dükhenshang? Jiji homei nyangeihepü dou dükpü Jerusalemei nyupüthü peüi nyingdaiteke; jeni nevai shei enüng neaoknyu.

¹⁷Shejao nyeinya ha daei nanglakthü touei nedaihen shingvaishi jeni jiji kü hapalei men jung hajük kü ne-ehen ngeükhüam shuohshah” shei etei.

¹⁸Hanangkü jomi jiji nyükei Jisulei men lanshei neehen nevaijü nenyuhhen shingvaishi ngeükhüam shuoh.

¹⁹Shejao Peter hi Johan nyi-i jomphong kü, “Kahvangi epü meyü amphongi epü-üng banghen Kahvang touei jiüpü hi nejiüpa ammi shah phentuh;

²⁰mehenangkü mehe hami ee, hatü dan, ha ne-e-i nenyuaokpih” shei jangei e.

²¹Shao jiji kü nyemshao pheikü jiji leitük; jiji kü hanghi shuohhen meheyao lem nedang; mehenangkü nanglakthü peüi mehe vampa, ha shingvaishi Kahvang men vih-ei nyuteke.

²²Üpa shennyak kü hapa meihüpü nyangeihepü dükpa, büpayü nyübüh bong pinyi dok kü nyuteke.

²³Jiji veshuoh pheikü jijinyi küphüthü touei leiyei ngongpathü hatü behethüi jiji kü mehe eshuohpa ha shah-om aokjateke.

²⁴Mechem jomi ha danpa, jomi chemi Kahvang kü ngeü anei, “Chaipüba SHEMBÜPA, kahdok hatü vangsho, yungching hatü haleipü lemphü lingpüba,

²⁵nüng chongphobü hamei bü David homei Laangha Daülangpai ha epeyü nüng khih: ‘Mehekei Kung ami hokeiheinya, hatü nanglakthüi angsha douthü deihhahnya?

²⁶Kahdoknyü ongthüi temeilemnyüke, hatü vanglem lembüthüi chemi thaitü, SHEMBÜPA hatü büpalei Messiah khüei yaongnyüke.’ ”

²⁷Mehenangkü hapa chingnyülei Herod hi Pontius Pilat nyi mü Kung am hatü Israel nanglakthü chemi thaitü nüngi jepü nüngei daülangpü chongphobü Jisu khüei yaongnyüke.

²⁸Nüngei ngan hatü nüngi yeihshi mebü ha vamhühen shei mongei tempü küpjan khüei lemphü dükhen jom thainyüke.

²⁹Shaang, SHEMBÜPA, jomi nyem shaopü kü veihümao, hatü nüngei chongphobüthüi mong longei nüngei shah ehütuh.

³⁰Meihühen nüngei lak haongtuh hatü nüngei daülangpü chongphobü Jisulei men kü yashanyale, nyangeihepü hatü thamapü douthü düktuh.

³¹Jom phopei tempheikü jom thaipü shing jenteke, hatü jom peü Laangha Daülangpai ma hatü Kahvang shah mong longei e.

³²Shaang vaipüthü peü chudeih mongdang hük mü nyu, hatü jom üpaiyao hayü ngei lompü mop shei ne-e, shejao jomi angpü lemphü sheppü vaiteke.

³³Ngan longpai phongshanthüi SHEMBÜPA Jisu yangei leipü denpü shuoh, hatü jom peü mü phahji longpü nyu.

³⁴Jomphong khongkü nehahneyingpü shennyak üpayao nenyu. Kahdok hatü shem angpüthüi hathü yutü hapa yupülei lop koei peiyei,

³⁵phongshanthülei la tüngei haü, hatü hapayü napü aimü peü kü demei shuoh.

³⁶Cyprus leipü Levi am Joseph-i (üpa kü phongshanthüi Barnabas, lappai, Mongnang Thongpü Ha shei nyük),

³⁷büpalei kah hük yutü hapalei lop koei peiyei phongshanthülei la tüngei haüteke.