Read Phom Naga PHONGSHANTHÜ DOU 5 Bible Online

PHONGSHANTHÜ DOU 5 - Phom Naga bible

PHONGSHANTHÜ DOU 5

¹Shaang Ananias shei menpü shennyaki chenyüha Sapphira mü eteitü kahdok hük yuteke.

²Chenyühai nyingshi büpai haleipü lop hanei yah-ei jom shing tuhtü aopü koei peiyei phongshanthülei la tüngei haüteke.

³Hahepak kü Peteri, “Ananias, mehekei Laangha Daülangpü touei shahshem ehen hatü kahdok yupü kübü lop hanei tuhlanghen kahshih-i nüngei mong kü mahüpa?

⁴Hapa neyui nyupü thahshi hayü nüngei kahdok nevaipü je? Ha yuphei kao hapa lopü nüngei nevaipü je? Henüng dou dükhen mehekei nüngei mongei lehüpa? Nüngi hamphong kü nevai, shejao Kahvang kü shahshem epeih” shei eteke.

⁵Shaang mechem Ananias-i ha shahthü danpa, büpa doei shük hatü di, hatü mehe vam, ha jung danpü peü kü nyempü longpai mateke.

⁶Hahepak kü nethethü peiyei mahng kü jümtü paiyei daiyei mahng vütük.

⁷Ghonda jem hükshing angpheikü mehe vampa ha nenyingi chenyüha pei.

⁸Peteri pinnyü kü, “Ambaha anjinyi-i kahdokü hajük hajük kü yupeih shei eshih” shei phe. Pinnyüi, “Hih, yupü lop hajük hih” shei e.

⁹Hahepak kü Peteri pinnyü kü, “Mekei etü anjinyiyü SHEMBÜPAlei Laangha kü dokhen shah shetpa? Veituh, ambaha mahng vüpüthü shadenei nyüke, hatü jomi nüngao hapakei paiyei daihen” shei e.

¹⁰Hahepak kü-üng pinnyü büpalei la tüngei doei shük hatü di. Mechem nethethü shüjapa, pinnyü didaitü nyu; hanangkü jomphongi pinnyülei mahng paiyei daiyei chepaha touei vüphong.

¹¹Attoi kempülei ha vampü jung danpü peüi nyempai ma.

¹²Shaang phongshanthü homei yashanyale, nyangeihepü hatü thamapü dou longi nanglakthü kü dük. Vaipüthü peü chemi Solomonei Shemshom shei epü shingei thai.

¹³Shennyakthüi jom jung longi meishi eteijao üpaiyao jomphong mü neshep.

¹⁴Shejoongpa nyüha bahathü nyeinya nyeinya SHEMBÜPA kü vai, hatü jomphong mü bhei-ie kü om.

¹⁵Phongshanthüi dou dükpü eeyei shennyakthüi Peter peihshingkü büpalei vangdhüm laangi tüngpüthü kü dhümhühen shingvaishi lüng hatü aüm kü tüngpüthü lemhütü deiyei chingshongei haüteke.

¹⁶Jerusalem shinpü jilathü kübü shennyakthüiyao tüngpüthü hatü mang laanghai shüveipüthü müei pei hatü jom peü meihütük.

¹⁷Hahepak kü ngongchong hatü büpa mü sheühteipüthü peüi (Sadduke khongi) mükhakpai mateke.

¹⁸Jomi phongshanthü yepei khoklatei tuh.

¹⁹Shejao yanüng SHEMBÜPAlei vangsho phongshan hüki khoklat sha aptü jomphong müei ngai hatü,

²⁰“Daituh, phopshem chingkonei yaongtü nanglakthü kü hapa yangnyu ja shahjang peü eyeishuoh” shei eteke.

²¹Jomphong kü ha epü danei, jomphong heshotapa kü phopshem chingkonei shüei nanglakthü kü nyuh-ei chongpang. Mechem ngongchong hatü büpa mü sheühteipüthü ngoipa, jomi shahthai thaihen Israel am behethü peü nyük, hatü khoklatei nyupüthü müei deihen shom.

²²Shejao mechem phopshem yompü veshanthü heihjapa, jomi hathü khoklatei nechongja; hanangkü jomphong nyokei leiyei shah-om shuohteke.

²³“Khoklat longi meishi yüpei lattüktü chongküpeih, hatü ha yompüthü shadenei yaongshi nyuküpeih, shejao mechem hami ha apei veishuohpa mongei üpayao nechongkei.”

²⁴Shaang mechem phopshem yompü veshan mübü hatü ngongpathüi ha danpa, hathü nangkü mehe vampa shei thamapai üateke.

²⁵Hahepak kü hanei am peiyei, “Veituh, amphongi khoklatei yepei küppü shennyakthüyü phopshemei yaongshi shennyakthü kü nyuhnyüke” shei lenei e.

²⁶Hahepak kü phopshem yompü veshanthü mübü heih-ei jomphong müei lei, shejao lak nehet; mehenangkü nanglakthüi jom kü yaongi shükshuohhen khih shei nyemteke.

²⁷Mechem jomi hathü müei leipa, jomi hathü shahtapei yaonghü. Ngongchongi jomphong kü,

²⁸“Hami amphong kü hapa men jung nenyuhhen hami am kü ngeükhüam wongmü shuohphei, shejao hatouei amphongi Jerusalemü ammei nyuhpüvenpai mateke, hatü amphongi hapa shennyakei iy ham shak kü kohühen temnyu khih” shei e.

²⁹Shejao Peter hatü phongshanthüi, “Hami shennyak leimeyü Kahvangei shah banghen.

³⁰Amphongi pü kü apei jütükpü Jisu, jenei bühipalei Kahvangi yangei leishihteke.

³¹Israel kü mong leppü shuohhen, hatü mang tükpü danghühen shingvaishi Kahvangi laophülei lakdah philei Mübü hatü Yemleipüba kei longei anshihteke.

³²Hamphongü hapa jung hatü büpalei ven danpüthü kü Kahvangi Laangha Daülangpü shuohpü jung denbüthü hih” shei jangei e.

³³Mechem jomi ha danpa, jom mongshih hatü hathü jütükhüei deih.

³⁴Shejao shahtapei nyupü Pharisee am Gamaliel, shahkung nyuhbü, peüi dhüm shuohpü shennyak yaongei kansho hük shingvaishi hathü chingshelei antüktuh shei ngeükhüam shuoh.

³⁵Hapheikü büpai jomphong kü, “Israel jeihinaüthü, hathü shennyakthü kü ammi mehe dükhen shei tem, ha meishi deih-ei dangtuh.

³⁶Hepak maani daiteke, Theudas-i büpayü mübü longpü hük hih shei vamteke, hatü shennyak kho ali hükshing büpa phei mü, shejao büpa jütük, hatü büpa phei müpüthü peü yandai hatü büpalei dousho dohdai.

³⁷Hapheikü Galil am Judas shangkuk iepü hepak kü vam, hatü büpayao büpa phei müpüthü dangteke, shejao büpayao jütük, hatü büpa phei müpüthü peü yandaikem.

³⁸Shejao shaangpü shahhidou nangkeyü, ngei enyeih, am jom toueipü khaatei nyutuh, hatü jomphongü hei-üng tuhphongtuh; mehenangkü hapayü hangku kübü vampü küpjan nevaijü dükhiling vaijema aokpü nedangküpih;

³⁹shejao hapayü Kahvang leipü vaijema, ammi jomphong neneüaokpih; hapa nangkeyü amphongang Kahvang khüei yaongpü leihen” shei eteke. Büpalei shah-i jomei mong yeplang,

⁴⁰hatü jomi phongshanthü nyükei shüei hathü kü bheiteke. Hapheikü jomi hathü kü Jisulei men kü shah ne-ehen ngeükhüam shuohtü deishihtük.

⁴¹Jomphong shahtap leipü vamei daishingkü jom mongong; mehenangkü hapa men nangkü ne-ienelem ponghahhen shangpeih shei deih.

⁴²Nyihjeih phopshemei hatü shem shem kü jomi Jisu-ü Messiah shei nyuhpü hatü baongpü nedoh-i nyu.