Read Phom Naga PHONGSHANTHÜ DOU 7 Bible Online

PHONGSHANTHÜ DOU 7 - Phom Naga bible

PHONGSHANTHÜ DOU 7

¹Hapheikü ngongchongi büpa kü, “Hathü shah-ü hingmei je” shei phe.

²Ha kü Stephenei shahnyok: “Jeihinaüthü hatü pa hi pa am, ngei epü kü bangtuh. Müknyinshekhangpü Kahvangi jenei bü Abraham kü büpa Haranei mangnyu, Mesopotamialei nyushi vamei hupeih,

³hatü büpa kü, ‘Nüngei kahmük hatü nüngei shem am tuhphongtü ngei nüng kü huphahen kahmükei daituh’ shei eteke.

⁴Hahepak kü büpai Kaldea kahmük tuhtü Haranei heih-ei nyu. Chepa dipheikü Kahvangi büpa hapa kahmük kübü vamei deishihpeih; hapa kü am shaang nyunyüpeih.

⁵Büpai büpa kü lakham hükao hapa kahdok mükjüp vaishi kungei neshuoh, shejao hapayü büpa kü hatü hahepak kü hapeü nenyujao büpa pheikü büpalei hühihathü kü jomei lompü vaihen shuohhen shei lahpeih.

⁶Kahvangi büpa kü hapakei epeih: ‘Nüngei hühihathüyü jomei kahdok nevaipü kahmükei yenpa kei nyuhen, hatü jomphongü aa vaihüei bong kho ali thahshi nemei-i noteiyei anghen.

⁷Shejao jom aa vaishi chongphopü kahmük kü ngei hanghi shuohhen, hatü hapheikü jom hapa kahmük kübü vamei daiyei hapa shingei ngei chongphohen shei Kahvangi epeih.’

⁸Hapheikü büpai Abraham kü shuw japhen vangpüshuwpü shuohpeih, hatü Abrahamü Isakei pa lei, hatü büpa bühpheikü nyih shetpabü kü shuw jappeih. Hapheikü Isaki Jakob büh, hatü Jakobi phang anpünyilei pathü bühpeih.”

⁹“Jakobei hapeüthüi shombü Joseph kü mükhüh-ei jomi büpa Ijiplei aa hük keiha yutükpeih, shejao Kahvang büpa mü nyu,

¹⁰hatü shanghah peü kübü büpa yang, hatü Ijip ongpa Pharaoh touei yaongshingkü büpa kü bamhahhen mü hatü kihikon huaokhen mü leihüpeih; hanangkü ongpai Ijip kü, hatü jomei shemong kempü kü vanglem lembü vaihen büpa jepeih.

¹¹Shaang Ijip hatü Kanan kempülei münghishaü peiyei shanghah longpü nyu, hatü jenei bühipathüi hahying nedang.

¹²Shejao mechem Jakobi Ijiplei hahying dangnyuja shei danpa, büpai jenei bühipathü shongpüba vaishi thümhen shom.

¹³Nyipabü yiüpü hepak kü Joseph-i büpalei chejeihijei am kü büpa jung nyinghü, hatü Josephei shem am Pharaoh mü nyingteiyei lei.

¹⁴Hapheikü Joseph-i chepa hatü büpalei shem am peü kü büpa nyupülei peüshep jom pejempüanpünga kü shah shomei nyük;

¹⁵hanangkü Jakob Ijiplei yiü. Büpa halei di, hatü jenei pathüao halei di,

¹⁶hatü jomphongei vanghimahng Shekhemei lei, hatü Abrahami ngin shuohtü Shekhem am Hamor leipü shakpü mahngchongei vüteke.”

¹⁷Shejao Kahvangi Abraham kü lahpü dhaümhen hepak ngoiyaki jenei nanglak Ijiplei longi dateke.

¹⁸Hahepak kü Ijip kü Joseph jung nenyingpü ong hüki vanglem lem.

¹⁹Büpai jenli kü nemei-i nopeih, hatü jenei bühipathü kü jomei naüthü nyemdidai shei yakphonghen nyeanteke.

²⁰Hahepak kü Mosa büh, hatü büpa Kahvang touei nethe meishi nyuteke. Lenyang jem thahshi büpa chepalei shemei jungei ang.

²¹Mechem büpa shem leipü deitükpa, Pharaohlei yiükhai laophülei ha vaishi ungei longteke.

²²Hanangkü Mosa kü Ijip amei kihikon lemphü nyuh, hatü büpa shah hatü dou kü longi wong kohshi nyuteke.

²³Mechem bong pinyi lompa, büpalei mongei laophülei Israel nanglak thümhen peiteke.

²⁴Büpai laophü shennyak hük kü Ijip am hüki nejiüi dükpü eeyei büpai büpa kü bahngei yaong, hatü Ijip am shennyak jüei bhüh yemteke.

²⁵Jom yanghen shingvaishi Kahvangi büpa noteinyu khih shei laophülei nanglakthüi deihkahen shei Mosai deih, shejao jomi ha nenying.

²⁶Nyihphei Israel am nyi deyei chongjai jiji aa kü chingmei linghühen shei peiyei, “Anji, anjinyiyü jeihinaü khihma; mehekei hüki hük mü hakei denya?” shei e.

²⁷Shejao nejiüpü naühai Mosa kü hungei deitü, “Ham shak kü nüng vanglem lembü hatü shahphenbü vaihen üpai nüng jepa?

²⁸Nüngi menyih Ijip am hük jüpükei nüngi ngei jühüpü je?” shei e.

²⁹Mechem Mosai ha danpa, büpa laongei daiyei Midian kahdokei benha hük kei nyuei dai. Halei büpai yeshang nyi büh.

³⁰Mechem vangbong pinyi lompa, Sinai Kahshang jahpanei vangsho phongshan hük büpa touei pünien kü aw bah-ei awlom mü vam.

³¹Mechem Mosai ha eepa, büpai veitü thama, hatü büpai hüngei veinüng heihja shingkü halei SHEMBÜPAlei ngeü vam:

³²“Ngeiyü ambü ampalei Kahvang, Isak hatü Jakob Kahvang.” Hanangkü Mosa kheühen chongpang hatü ha kü neveiaok.

³³Hahepak kü SHEMBÜPAi büpa kü, “Nüngei la leipü lathuh huktüktuh; mehenangkü nüng yaongpü shingü daülangpü shing hih.

³⁴Hingmei ngei Ijiplei nyupü ngelei nanglakthü kü nemei-i dükpü ngei eeteke, hatü vaüpü-eepü danteke, hatü ngei jomphong yangnüng yiüpeih. Shaang peikei, ngei nüngü Ijiplei shomhen hih” shei eteke.

³⁵“Üpai nüng vanglem lembü hatü shahphenbü vaihen jepa?” shei eshi jomi yaktükpü Mosayü büpa nyuteke, hatü shaangü pünien kü vamei vangsho phongshan hupü homei Kahvangi büpa vanglem lembü hatü bümei leihüpüba vaishi shomteke.

³⁶Büpai Ijiplei, Hakla Yungchingei hatü jahpanei vangbong pinyi thahshi thamapü hatü nyangeihepü douthü dükei büpai jom müei lüdaipeih.

³⁷“Kahvangi ngei ngaihüpükei büpai am shingvaishi am nanglak khong kübü thihivam hük vamhühen” shei Israel am kü epü Mosayü hapa hih.

³⁸Büpayü jahpanei khong mü jenei bühipathü mü hatü Sinai Kahshangei büpa kü shah eshuohpü vangsho phongshan mü nyu, hatü jen kü shuohhen vanyangyem shah büpai yah.

³⁹Jenei bühipathüi büpai epü banghen nemong; ha nangjei, jomi büpa hungei deitük, hatü jomei mongei jomi Ijiplei nyokei leidai.

⁴⁰Aaron kü, “Ham kü lem müphahen shingvaishi kahvangthü lingshih; Ijip kahdok leipü ham müei daipü Mosayü mehe vamjapüshang hami nenyingang” shei e.

⁴¹Hahepak kü jomi mohoh cheha hük ling, lajei kü jakpü moila shuoh, hatü jomei laki linghahpü lajei kü dhüm huei mongongtei.

⁴²Shejao Kahvang jom toueipü yandai hatü vangsho lithilen kü khümhen shuohtük. Thibüthüi lai kü hapakei nyangei nyüke: “Bong pinyi jahpanei nyushi ammi ngei kü jakpü moila koei peila, Oh Israel phang?

⁴³Ammi khümnüng linghahpü lajeithü, Molekh Kahvang, hatü ammei litha kahvang Rephanei khümhen ammi koei longteipeih. Hanangkü ngei am Babylon peih-ei wüpküpei shomtükhen.”

⁴⁴Mechem büpai Mosa mü eteipa, Kahvangi lingtuh shei ngeükhüam shuohpü düklem büpai eepü aimü jahpanei jenei bühipathüi ashakshem angteke.

⁴⁵Kahvangi jenei bühipathü toueipü jatthü changtüktü kahdok yahshingkü jenei bühipathüi Joshua mü hapa ashakshem koei daipeih. Hapayü David hepak thahshi halei nyuhampeih.

⁴⁶Büpa Kahvangi bamhahhen mü nyu, Jakob Kahvang shingvaishi nyuhen shing hük linghen büpai phepeih.

⁴⁷Shejao büpa shingvaishi phopshem vepeyü Solomon nyuteke.

⁴⁸Shejao Chaipübai hangkulei laki vepü shem kü nenyunyih. Thibüthüi hapakei enyüke:

⁴⁹“Vangsho-ü ngelei ong uoshing, kahdoknyü ngelei la shoupshing. Menüng keipü shem ammi ngei shing vephahen? nevaijü ngei nyiumeihen shing melei nyuhen?

⁵⁰Ngelei laki hathü kemei nelingangpü je? shei SHEMBÜPAi enyüke.”

⁵¹“Am ngaümvang vaanpü shennyakthü; mongdang hatü dhaong shuw nejappüthü, ambü ampai dükpükei ammi düngei Laangha Daülangpü khüei yaongnyüke.

⁵²Mepa thihivam kü ambü ampai neshüveipa? Jomi Daülangpü Hük peikahen shei tetpüthü peü jühampeih, hatü shaang amphongü büpa yuhahpü hatü jüpü am leiteke.

⁵³Vangsho phongshan leipü shahkung yahpeyü am hih shejao ammi ha nebangnyu.”

⁵⁴Mechem jomi ha danpa, jomi Stephen kü mongshih-ei bha vükteke.

⁵⁵Shejao Laangha Daülangpai maei büpai vangsholei ngangei veishingkü Kahvang müknyinshekhang hatü Jisu, Kahvangei lakdah philei yaongshi ee.

⁵⁶Büpai, “Veituh, ngei vangsho shaden aptüktü Shennyak Ha Kahvangei lakdah philei yaongshi eenyüke” shei e.

⁵⁷Shejao jomi jomei dhaong kü dhühlang hatü ngeüwong anei jom peü chemi büpa khüei heihteke.

⁵⁸Hapheikü jomi büpa chingnyü haolei shüei ngai hatü yaongi shükhen pang. Denbüthüi jomei ashakviha Saul shei menpü nethepalei la tüngei haüphong.

⁵⁹Mechem jomi Stephen kü yaongi shükpa, büpai, “SHEMBÜPA Jisu, ngelei laangha yahtuh” shei phop.

⁶⁰Hapheikü büpa aümei shatü, “SHEMBÜPA, nüngi hapa mang jom kü tehethü” shei lenei e. Mechem büpai ha eyei kempa, büpa didai.