Read Phom Naga PHONGSHANTHÜ DOU 8 Bible Online

PHONGSHANTHÜ DOU 8 - Phom Naga bible

PHONGSHANTHÜ DOU 8

¹Hatü jomi büpa jüpü kü Sauli monghamei jiüphei shei deih. Ha nyih Jerusalem leipü attoi khüei shüveidoidei nemei-i chongpang, hatü phongshanthü mü lenei peü Judea hatü Samaria kahmükei yandaikem.

²Kahvang shennyak hanei-i Stephenei mahng vü, hatü büpa kü wongmü mahng thep.

³Shejao Sauli attoi mangtükhen chongpang, hatü shem shemei peiyei nyüha baha peü shüei ngai, hatü khoklatei tuh.

⁴Shaang üam yanei daipa, hathüi shing hük kübü hük shei hapa shah baongei dai.

⁵Philip Samaria chingnyülei yiüei jom kü Messiah jung baongteke.

⁶Philipi mehe ven, ha kü khongnyü mong hük mü mong shuoh-ei bang; büpai dükpü nyangeihepü jung dan, hatü eeteke.

⁷Mang laangha nyupü shennyakthü ngeüwong anei vaüei vamteke, hatü bümphi dipü hatü lakhopüthü lebü longi meihü.

⁸Hanangkü hapa chingnyülei mongongpü longpü nyuteke.

⁹Shaang Simon shei menpü shennyak hüki shelei mebü hapa chingnyülei thihivam dou dükei nyu, hatü Samaria amü thamaei büpayü longpü shennyak hih shei eteihamteke.

¹⁰Peüi longpü kübü maanpü thahshi büpai epü kü mong shuoh-ei bang, hatü, “Hapa shennyakü ‘Ngan Longpü’ shei epü Kahvangei ngan khih” shei etei.

¹¹Jomi büpa kü mong shuohei bang; mehenangkü hepak luangi büpai thihivam dou dükpü homei thamahüei angteke.

¹²Shejao mechem Philipi Kahvang ongching hatü Jisu Khristalei men jung chongvenpü kü jomi hinglempa, nyüha baha chemi baptük.

¹³Simoni dangkao hinglem. Baptük pheikü büpai nedoh-i Philip mü nyu, hatü mechem büpai nyangeihepü hatü yashanyale longpü vampü eepa, büpa thama.

¹⁴Shaang mechem Jerusalem leipü phongshanthüi Samaria amao Kahvang shah yahteke shei danpa, jomi Peter hi Johan nyi jom touei shom.

¹⁵Jiji yiüei jomi Laangha Daülangpü yahhen shingvaishi phop.

¹⁶(Mehenangkü Laangha Daülangpü jomphong üpa kao mangbaki nyuteke; jomphongü SHEMBÜPA Jisulei men kü mon baptüktü nyuteke).

¹⁷Hahepak kü Peter hi Johan nyi-i jomphong kü laki shüng, hatü jomi Laangha Daülangpü yah.

¹⁸Shaang mechem phongshan nyilei laki shüngpü homei Laangha Daülangpü shuohnyu khih shei Simoni eepa, büpai jijinyi kü lop shuohtü,

¹⁹“Ngei üam kü ngelei laki shünghenshang hathüiyao Laangha Daülangpü danghen shingvaishi ngei kao ha ngan yahshih” shei e.

²⁰Shejao Peteri büpa kü, “Nüngei ngin nüng mü mahdaituh; mehenangkü Kahvangei thintho lopi dangnyeih shei nüngi deihpü khih!

²¹Hapa kü nüngei phaihan nevaijü hean neshiüpüh; mehenangkü Kahvang touei nüngei mongdang nejiüang.

²²Hanangkü nüngei mang kübü mong leptuh, hatü SHEMBÜPA kü, aokjema, nüngei mongdangei deihpü mang nüng kü nyemtükphanüng phoptuh.

²³Mehenangkü nüng kü shahyakpü hatü mükhakpai maei eenyüke, hatü mangei khoklatei nyüke” shei eteke.

²⁴Simoni, “Nüngi shaang epü meheyao ngei kü nedhaümhen SHEMBÜPA kü ngei shingvaishi phopshih” shei jangei e.

²⁵Shaang Peter hi Johan nyi-i denpü shuoh-ei SHEMBÜPAlei shah venpheikü jiji Samaria chingthü longi kü shahjangmei baongyaki Jerusalemei lei.

²⁶Hapheikü SHEMBÜPAlei vangsho phongshan hüki Philip kü, “Yaongtuh hatü Jerusalem leipü Gazalei yiüpü lem pehe philei daituh” shei e. (Hapayü jahpanei daipü lem.)

²⁷Hanangkü büpa layaongei dai. Shaang, halei ban tüktükpü Ethiopia am hük, Ethiopia am onglanyülei mophimo kempü kü khei vaipü lakchongbü hük nyuteke. Büpa Jerusalemei khümnüng peipü,

²⁸koyei khari kü uotü shemei leilemei Isaiah lai ieyaki leiyei nyuteke.

²⁹Hahepak kü Laanghai Philip kü, “Heih-ei hapa koyei khari kü chemi uotuh” shei e.

³⁰Hanangkü Philip halei mokei heihjashingkü Isaiah lai kübü iepü büpai dan. Büpai, “Nüngi mehe ienya, ha nyingnyüla?” shei phe.

³¹Büpai, “Hanei ami ngei kü nih-ei ne-epheikü ngei mekei nyingaokhen?” shei jangei e, hatü büpai Philip kü bakei aongei büpa mü uohen nyük.

³²Shaang büpai ieyei nyupü laiyü ha shüpü khih: “Mi keiha büpa jüshingei müei dai, mimum jappü am touei miha hük nenpü keiha, büpai laophülei ju ne-ap.

³³Büpa kü ne-ienelemi büpa kü jiüpü shahhing nedükshuoh. Üpai büpalei hühiha nang eaokhen? Mehenangkü büpalei yangnyu hapa kahdoknyü kübü yahlang.”

³⁴Hapa ban tüktükpü shennyaki Philip kü, “Hapa thibüi üpa nang enya, büpa nang hi hanei am nang enya ngei kü eshih” shei e.

³⁵Hahepak kü Philipi ehen pang, hatü laihing kübü chongpangei büpai büpa kü Jisu jung shahjangmei eshuoh.

³⁶Jiji chemi daishingkü yung nyupü shingei ngoi, hatü ban tüktükpü shennyaki, “Veihümao, hatouei yung nyüke! Ngei baptükhen mehe wongpü nyüpa?” shei e.

³⁷Philipi, “Nüngei mong kempai hinglemjema nüng baptüknüng aokhen” shei e. Büpai jangei, “Jisu Khristayü Kahvang Ha shei ngei hinglemnyeih” shei e.

³⁸Büpai koyei khari yaonghü, hatü Philip jijiphen shüh-ei yungei yiü, hatü Philipi büpa kü baptükshuoh.

³⁹Mechem jiji yung leipü vamei aongpa, SHEMBÜPAlei Laanghai Philip müei lüdai; hapa shennyaki hajük kü büpa ne-ee, hatü büpa mongongshi leidai.

⁴⁰Shejao Philip Azotuslei vam, hatü mechem büpai hapa moidoi homei daipa büpai Kasarea mangngoi thahshi jila peü kü shahjangmei baongteke.