Read Phom Naga PHONGSHANTHÜ DOU 9 Bible Online

PHONGSHANTHÜ DOU 9 - Phom Naga bible

PHONGSHANTHÜ DOU 9

¹Ha vangpan mü Sauli SHEMBÜPAlei nanglakthü jühen hih shei nyemshaoei ngongchong touei peiyei,

²ha Lem kü nyupüthü dangjü nyüha vaijao baha vaijao yepei Jerusalemei leihen shingvaishi Damaskalei nyupü Sinagogthü kü büpa jung eyei nyangpü lai yüteke.

³Shaang büpa daiyei Damaska ngoiyaki ngangahük kü vangsho leipü vangngai-i büpa shonei khang.

⁴Büpa kahdokei doei shük hatü, “Saul, Saul, mehekei nüngi ngei kü shüveinya?” shei büpa kü epü ngeü hük dan.

⁵Büpai, “Nüng üpaang, SHEMBÜPA?” shei phe. “Ngeiyü nüngi shüveipü Jisu.

⁶Shejao yaongtuh, hatü chingnyülei aongtuh, hatü nüngi mehe dükhen nüng kü ephahen” shei e.

⁷Büpa mü chemi yen daipüthü shah ne-e-i nyu; mehenangkü jomphongi ngeü dan shejao üpayao ne-ee.

⁸Saul kahdok leipü paoei yaong, hatü büpalei mük vamshi nyujao büpai meheyao ne-ee-aok; hanangkü jomphongi büpa kü laki düktü müei Damaskalei an.

⁹Nyih jem thahshi büpa müki ne-ee, nük nehah nevaijü yung neyingi nyu.

¹⁰Shaang Damaskalei nanglom hük Ananias shei menpü nyu. SHEMBÜPAi büpa kü manghkhang hük kü, “Ananias” shei e. “Ngei hammü nyüpeih, SHEMBÜPA” shei büpai jang.

¹¹SHEMBÜPAi büpa kü, “Yaongtuh, hatü Laülükpü shei epü chingshongei heihtuh, hatü Judas amei shemei Tarsus am shennyak Saul yemtuh. Büpa shaang phopnyüke,

¹²hatü büpai manghkhang hük kü Ananias shei menpü shennyak hük peiyei büpalei mük nyipabü eehen shingvaishi büpalei laki büpa kü shüngshuoh-ei eeteke” shei e.

¹³Shejao Ananias-i, “SHEMBÜPA, hapa shennyaki Jerusalemei nyupü nüngei nanglakthü kü meshük ten dükpa ha jung ngei longi leipü dantepih;

¹⁴hatü halei büpai ngongpathü leipü wong yahtü nüngei men kü nyükpüthü peü yepei shahen peipü khih” shei e.

¹⁵Shejao SHEMBÜPAi büpa kü, “Heihtuh, mehenangkü ngei büpayü Kung am, ongthü hatü Israel nanglakthü touei ngelei men nyinghühen shingvaishi ngei büpayü hadir hük vaishi jetepih.

¹⁶Ngelei men kü büpa meshük shangponghen ngei büpa kü hutepih” shei e.

¹⁷Hanangkü Ananias heih-ei shemei shü. Büpai Saul kü laki shüngtü, “Jeihinaü Saul, nüng halei heihpü lemei nüng touei vamei hupü SHEMBÜPA Jisui nüngei mük eehen hatü Laangha Daülangpü yahhen shingvaishi büpai ngei shompü khih” shei e.

¹⁸Hahepak kü ngangahük kü nyahga keiha büpalei mük leipü vü, hatü büpalei müki ee. Hahepak kü büpa yaongei daiyei baptükteke,

¹⁹hatü nük maani hahpheikü büpa wong koh-ei lei. Nyih shohük büpa nanglomthü mü Damaskalei nyu,

²⁰hatü lomi Sinagoglei, “Jisu-ü Kahvang Ha” shei Jisu jung baonghen chongpang.

²¹Büpai epü danpüthü peüi thamaei, “Jerusalemei hapa men kü vaipüthü kü shüveipeyü hapa shennyak nevaipü je, hatü büpa hatouei hathü yepei shatü ngongpathü touei deihen mükhong kü peipü nevaipü je?” shei e.

²²Saul nyeinya wong koh-ei lei, hatü Damaskalei nyupü Jehoda am mü Jisu-ü Messiah hih shei nih-ei epü nangkü jomi büpa kü meheyao shah neleiaok.

²³Nyih shohük daipheikü Jehoda ami büpa jühen phaüshah showteke,

²⁴shejao jomi shah showpü Sauli nyingdai. Jomi penyüshalei nyakhingai thüngei büpa jühen veiyei nyu;

²⁵shejao yanüng büpalei nanglomthüi mühdow kü vüi shentü büpa halei shihtü chingpe bhamvo homei kahdokei shanshih.

²⁶Saul Jerusalemei peiyei nanglomthü mü shephen khe, shejao jom peüi büpa kü nyem; mehenangkü jomphongi büpayü nanglom hük khih shei hingnelem.

²⁷Shejao Barnabas-i büpa phongshanthü touei müei deiyei mekei büpai lemei SHEMBÜPA eepa hatü büpa kü shah epa, hatü mekei büpai Damaskalei wong kohshi Jisulei men epa, ha jung jomphong kü nih-ei ejateke.

²⁸Hanangkü büpa jomphong mü Jerusalemei pei hatü daiyei SHEMBÜPAlei men kü wong kohshi eteke.

²⁹Büpai Greek am mü etei hatü shah daktei, shejao jomi büpa jününg khe.

³⁰Mechem vaipüthüi ha danpa, jomi büpa Kasarealei müei dei hatü Tarsuslei büpa shomtük.

³¹Ha vangpan mü Judea, Galil hatü Samarialei nyupü attoithü chingmei kü nyu hatü wong koh. SHEMBÜPA nyempü kü nyuei hatü Laangha Daülangpülei nyiushemmei kü nanglak bhei-ie dateke.

³²Shaang Peteri vaipüthü nyushing peülei longtei, hatü shan hük büpa Lydda leipü vaipüthü thümnüng pei.

³³Halei büpai vangbong shet thahshi lüngei lemshi bümphi didaipü Aeneas shei menpü shennyak pong.

³⁴Peteri büpa kü, “Aeneas, Jisu Khristai nüng meitüknyeih; yaongtuh hatü nüngei shinshing temlangtuh!” shei e. Ngangahük kü büpa paoei yaong.

³⁵Lydda hatü Sharonei nyupüthü peüi büpa ee, hatü SHEMBÜPA touei lepteke.

³⁶Shaang Joppalei nanglom hük Tabitha, (Greek shah mü Dorkas ) shei menpü nyu. Pinnyü-ü düngei doumei dükpü hatü taopathü kü sheühhamteke.

³⁷Hahepak kü pinnyü tüngei didai. Jomi pinnyülei mahng paütüktü jaandokpa dung-amei tuh.

³⁸Lyddayü Joppa yopailei nyupü nangkü Peter halei nyükeja shei danei nanglomthüi büpa touei shennyak nyi shomei, “Chingmeilemlingei nepheidai-i ham touei peikütuh” shei khümei e.

³⁹Hanangkü Peter layaongei jiji mü heih, hatü mechem büpa ngoijapa, jomi büpa jaandokpa dung-amei müei an. Vaümnyüthü büpa touei yaongtü pinnyü jom mü nyushi Dorkas-i thüngshuohpü bhagthuh hatü ashakviha hutü thep.

⁴⁰Peteri jom peü chingshelei antüktü büpa aümei shaei phop. Büpai büm lepei leitü, “Tabitha, paotuh” shei e. Hahepak kü pinnyü mük vam, hatü Peter eeyei pinnyü paoei uo.

⁴¹Büpai pinnyülei lak kü khaaitü pinnyü yaonghü. Hapheikü büpai nanglomthü hatü vaümnyüthü kü nyükei büpai pinnyü yemmü deiyei shuoh.

⁴²Joppa kempülei hapa jung nyingdai, hatü longi SHEMBÜPA kü hinglem.

⁴³Nyih shohük büpa Joppalei ashakshem lingbü Simon am shemei nyu.