Read Phom Naga ROM 12 Bible Online

ROM 12 - Phom Naga bible

ROM 12

¹Hanangkü jeihinaü hatü nyahinaüthü, ammei büm Kahvang touei daülangpü hatü yah-aokbenüng yemmü tuhtü jakpü moila kei shuohtuh shei ngei Kahvang phahji homei am kü khümnyeih — hapayü ammi laangha kü khümpü dou nyüke.

²Ammi hapa kahdoknyü kü tevukdai shejao ammei mong ja leipai jeilei yeiyatuh, shejüang Kahvangi mehe mong, mehe mei, mehe yah-aokbenüng hatü changpüshapü nyüpa, ha baong hanei nyingaokhen.

³Mehenangkü ammi deihhen jiüpü mü nyeishi laophü nyingi longi shaoshi tedeih shei ngei kü shuohpü phahji homei ngei am peü kü enyeih, shejao Kahvangi shuohpü hinglempü kü shettü ha aimü jiüshangpü shahphen yahhen deih-ei dangtuh.

⁴Mehenangkü büm hük kü jen kü heanlem longi nyupükei, hatü heanlem peü aihük dousho nenyu,

⁵hapa keiha jen longi nyujao Khrista kü büm hük, hatü lomja ieyei jen peü hüki hük mü heanlem nyüke.

⁶Kahvangi jen kü shuohpü phahji aimü jen kü thintho laolao nyüpeih: Shennyak hük kü thihivam thintho nyujema, büpai hinglempü kü shettü büpai ha noteituh.

⁷Hapayü chongphopü vaijema, büpai chongphotuh; nyuhpüvenpü vaijema, büpai nyuhtuh;

⁸hapayü mongnang thongpü vaijema, büpai mongnang thongtuh; hapayü mih kü shuohpü vaijema, büpai nekaungi shuohtuh; hapayü mübü hean vaijema, büpai kenhingei vanglem lemtuh; hapayü phahji hupü vaijema, büpai ha monghumei düktuh.

⁹Bampeyü hingshangpü vaihütuh. Mehe ten ha kü jiühittuh; mehe mei ha kü shoungtuh.

¹⁰Aihük bamteipai hüki hük mü bamteituh; dhüm huteipü kü hüki hük mü nyeipüba nyutuh.

¹¹Monghumpü kü taoei tenyu, laangha kü shaamlukdongi nyutuh, SHEMBÜPA chongphotuh.

¹²Monglempü kü mongongtuh, shangpongpü munentuh, phoppü kü nyakeikentuh.

¹³Kahvang shennyakthü taopü kü moilatuh; yenpa kü bampü hutuh.

¹⁴Nüng kü shüveipüthü kü moihimaneishuoh; moihimaneishuoh hatü jom kü tethaüvaü.

¹⁵Mongongpüthü mü mongongtuh; theppüthü mü theptuh.

¹⁶Hüki hük mü meiteishi nyutuh; am techangmei; phangpa kü nyupüthü mü küeijemtuh; nüngi laophü nyingi nahnyu kei tedeihhah.

¹⁷Nüngi üpa kao ten kü ten jeiyei teshuoh, shejao peü touei mepa jiüpa, ha dükhen kentuh.

¹⁸Aokjema nüngi aokpüshük peü mü chingmei kü nyutuh.

¹⁹Ngelei küphüthü, am nyingi bhüh teyem, shejao Kahvang mongshihpü kü shing tuhphongtuh; mehenangkü ha nyangei nyüke, “Bhüh yempeyü ngelei; ngei ha kü shemhen shei SHEMBÜPAi enyüke.”

²⁰Ha nang jeiyei, “Nüngei vepathü aeiyei chongküjema, jom kü ühyingtuh, jom yung leyei chongküjema yinghen lemhük shuohtuh; mehenangkü nüngi hapakei dükpai jomei shangjing kü awtao haüshuohpü vainyüke.

²¹Nüng kü teni te-aokhü, shejao mei-i ten aokhütuh.”