Read Phom Naga ROM 15 Bible Online

ROM 15 - Phom Naga bible

ROM 15

¹Jen üami hinglempü kü wong koh, wong nekohpüthü kü sheühen khih, hatü jen nyingi jen mongmeihühen nedükhen khih.

²Jen peüi jenei chingyow meipü mükhong kü linghen shingvaishi jenei chingyow mongmeihühen khih.

³Mehenangkü Khristai laophü nying mongmeihühen nedük, shejao ha nyangei nyüke: “Nüng kü naamei epüthülei naamshah ngei kü sheüteke.”

⁴Mehenangkü nenteiaokpü homei hatü Laihingi mongnang thongpü homei jen monglempü nyuhen nangkü mepa mepa shelei nyang, hayü jen kü nyuhhen nangkü nyangpeih.

⁵Munenpü hatü mongnang thongpü Kahvangi am hüki hük mü Khrista Jisu phei müpai mongjemshi nyuhen yahphahen,

⁶shejüang am chemi ngeü hük mü jenei SHEMBÜPA Jisu Khristalei Pa Kahvang müknyinshekhanghen.

⁷Kahvang müknyinshekhang shingvaishi Khristai am mongongshi yahpükei am hüki hük hapakei yahteituh.

⁸Bühipathü kü lahpüthü büpai jiühühen nangkü Kahvangei shahhing men kü Khristayü japtükpüthülei chongphobü leipeih shei ngei am kü enyeih,

⁹hatü Kung amiyao büpalei phahji nangkü Kahvang müknyinshekhanghen. Ha nyangei nyüke: “Hanangkü Kung am touei ngei nüng vihhen, hatü nüngei men vih-ei lokhen.”

¹⁰Shao büpai enyüke: “Oh Kung am, büpalei nanglakthü mü mongongtuh,”

¹¹hatü shao, “SHEMBÜPA vihtuh, am Kung am peü, hatü nanglak peüi büpa vihtuh,”

¹²hatü shao Isaiah-i enyüke: “Jesselei tünglang hük peikahen; Kung am kü vanglem lemhen hük vamkahen; büpa kü Kung ami monglemhen.”

¹³Ammi büpa kü hinglempai monglempü Kahvangi am kü mongong hatü chingmei-i am mahühen, shejüang Laangha Daülangpü ngani am kü monglempü aüh-ei yenhühen.

¹⁴Ngelei jeihinaü hatü nyahinaüthü, ngei am nangkü mong hamei deihnyeih; mehenangkü am kü meipai maei nyüke; nyingpai maei nyüke; hatü hüki hük kü nyuhhen aokshi nyüke.

¹⁵Shejoongpa shahlem hanei nangkü ammi deihhen shingvaishi ngei am kü wong kohshi nyangteke; mehenangkü hayü Kahvangi ngei kü,

¹⁶Kung am touei Kahvangei shahjang meipü kü ngongdou dükei Khrista Jisulei chongphobü vaihen phahji shuohpeih, shejüang Kung amei moilayü Laangha Daülangpai daütükpü, hatü yahaokbenüng leihen.

¹⁷Hanangkü ngei Kahvang shing dou dükpü kü Jisu Khrista kü ngei müknyinshekhangnyeih.

¹⁸Shah hatü dou dükpai Khristai mehe ngei homei Kung am leipü ven danpü danghen düktepa, ha mü lenei ngei nyingi meheyao lingei ne-epih.

¹⁹Nyangeihepü hatü yashanpü nganthü homei; Kahvang Laangha nganthü homei Jerusalem kübü daiyei Illirikum shinpü thahshi kü ngei Khrista shahjangmei changshi baongtepih.

²⁰Hanei ami lingpü chongnyiam kü ngei nevehen shingvaishi Khrista jung mechemao mangdanpü am touei shahjangmei chongvenhen düngei ngelei mongdeih nyuhampeih.

²¹Shejao ha nyangei nyüke: “Büpa jung üam kü mechemao ne-e, jomi eehen, hatü üami büpa jung mechemao nedan, jomi nyinghen.”

²²Ngei am touei peihen düngei bangpeyü ha tata kü hih.

²³Shejao shaang hapa moidoi kü dou dükhen ngei shing shinghiphei neshiüpü nangkü ngei bong longi am touei peihüei deihshi nyupükei,

²⁴ngei Spainlei heihshingkü am touei peihen monglemnyeih. Mehenangkü ngei homei daishingkü am thümhen, hatü ngei am mü shohük chemi nyupheikü ngelei yendai kü ammi sheüh-ei deishihhen shei monglempü nyüpeih.

²⁵Shejao shaang payü ngei daülangpüthü kü chongphohen ngei Jerusalemei lüdainyeih;

²⁶mehenangkü Macedonia hatü Akhaia ami Jerusalemei nyupü taopü daülangpüthü mü jomei mophimo hanteihen mongongshi nyüke.

²⁷Jomi ha dükhen mongong, hatü jomi hathü kü ha dükhenü hang nyüke; mehenangkü Kung ami Jehoda amei laangha moihimanthü hanteijema, Kung amiyao Jehoda am kü jomei mophimo hanteihen jiüpeih.

²⁸Hanangkü mechem ngei ha temhen, hatü mehe thai ha jom kü shuohhen, ngei am peih-ei Spainlei layaongei daihen,

²⁹hatü mechem ngei am touei peihen, ngei Khristalei moihimani maei peikahen shei ngei nyingnyeih.

³⁰Jeihinaü hatü nyahinaüthü, jenei SHEMBÜPA Jisu Khrista hatü Laanghai bampü homei ngelei men kü Kahvang kü phoppü kü ngei mü omkütuh shei ngei am kü khümnyeih;

³¹hapayü Judealei nevaipüthülei lak kübü ngei yanghen, hatü ngei Jerusalemei daülangpüthü kü chongphopeyü yah-aokbenüng vaihen;

³²shejüang Kahvangi mongei ngei mongongpai am touei peihen, hatü am mü nyuei mongdhüng vamhen.

³³Kahvangei chingmei am peü mü nyute. Amen.