Read Phom Naga ROM 16 Bible Online

ROM 16 - Phom Naga bible

ROM 16

¹Ngei am touei Cenkhrea attoilei chongphopü jenei nyahinaü Phoebe nangkü mongmeipü danhünyeih.

²Daülangpüthüi dükhen jiüpükei amphongi SHEMBÜPA kü pinnyü mongongshi yahtuh, hatü pinnyüi am leipü mehe yüphahen yah-eishuoh; mehenangkü pinnyü-ü longi kü hatü ngei kao nanglei shuohhampeih.

³Khrista Jisu kü ngei mü chongphopü Priscilla hatü Aquila nyi kü selam ete,

⁴hatü jijinyi-i ngei shing yangnyu lanei shuohpeih; hanangkü ngei mon nevai, shejao Kung am attoithü peüi menvih shuohnyeih.

⁵Jomei shemei nyupü attoi am kao selam ete. Asia kü Khrista touei shongei mong leppü ngei kenpü Epaenetus kü selam ete.

⁶Am mü dou kheyei dükpü Mary kü selam ete.

⁷Ngei mü khoklatei nyupü ngelei shem am Andronikus hi Junias nyi kü selam ete; jijiyü phongshanthü khongkü shongnyü, hatü ngei shekü jijiyü Khrista kü nyuhampeih.

⁸SHEMBÜPA kü ngei bampü Ampliatus kü selam ete.

⁹Khrista kü jen mü chemi chongphopü Urbanus hatü ngei bampü Stakis nyi kü selam ete.

¹⁰Khrista kü yah-aokpü Apelles kü selam ete. Aristobulus am shem kü selam ete.

¹¹Ngelei shem am Herodion kü selam ete. SHEMBÜPA kü nyupü Narcissus am shem kü selam ete.

¹²SHEMBÜPA kü chongphopü Triphaena hi Triphosa nyi kü selam ete. SHEMBÜPA kü kheyei dou dükpü bampü Persis kü selam ete.

¹³SHEMBÜPA kü jelangpü Rufus hatü chenyü kao — ngeleiyao nyü kao selam ete.

¹⁴Asincritus, Phlegon, Hermas, Patrobas, Hermes hatü jomphong mü nyupü jeihinaü nyahinaüthü kü selam ete.

¹⁵Philologus, Julia, Nereus hatü büpalei chenaü, hatü Olimpas, hatü jomphong mü nyupü daülangpüthü peü kü selam ete.

¹⁶Daülangpü om kü jüpteipai hüki hük mü selam shihteituh. Khristalei attoithü peüi am kü selam enyeih.

¹⁷Jeihinaü hatü nyahinaüthü, ammi danpü nyuhpüvenpü khüei neshetnephen dehilao hatü huluh shuohpü vamhüpüthü kü mükhingshi veituh shei ngei am kü enyeih; hathü kübü yanei nyutuh.

¹⁸Mehenangkü hapa keipü shennyakthüi jenei SHEMBÜPA Khrista chongnephonyih, shejao jomei shünyü chongphonyeih, hatü inyainyemi epai hatü yawhshah-i lapja-i nyupüthü luhahnyeih.

¹⁹Peüi am ven danpü jung danteke, hanangkü ngei am nangkü mongongpai maei nyüpeih, shejao ngei napeyü mehe mei, ha nangkü nahshilangshi hatü nemeipü phikü mang neshiüi nyemnyu shei deihnyeih.

²⁰Chingmei Kahvangi meshük ne-angi ammei la phangkü kahshih ngümtükhen. Jenei SHEMBÜPA Jisu Khrista phahji am mü nyute.

²¹Ngei mü chemi chongphopü Timoti-i selamja; hapakei ngelei shem am Lucius, hatü Jason hatü Sosipater hathüi selam ja.

²²Ngei, Tertius, ha lai nyangbüi SHEMBÜPA kü am peü kü selam.

²³Gaius, üpai ngei hatü haleipü attoi am peü haümnya, am kü selamja. Chingnyü leipü shemchongbü Erastus, hatü jenei jeihinaü Quartus nyi-i am kü selamja.

²⁴SHEMBÜPA Jisu Khrista bampü am peü mü nyute. Amen.

²⁵Shaang büpa, üpai ngelei shahjangmei aimü, hatü den luangi joshi angpü shahjo shakei vampü aimü Jisu Khrista jung baongpai am wong kohhühen aok,

²⁶shejao shaang shakei vam, hatü ven danei hinglempü kü mühen shingvaishi vanyangyem Kahvangei shahkung aimü thihivamthüi nyangpü homei Kung am peü kü nyinghütepa,

²⁷hapa Jisu Khrista homei kon kohpü Kahvang kü düngei müknyinshekhang vaituh! Amen.