Read Phom Naga ROM 2 Bible Online

ROM 2 - Phom Naga bible

ROM 2

¹Hanangkü üpa vaihenshang vaijao ammi mih kü shahphenpü kü mang tükpü neshiü; mehenangkü mih kü shahphen shuohpai ammi laophü nyingi nyonghahnyüke; mehenangkü am shahphenpüthüi aihük douthü düknyüke.

²“Hapa keipü dou dükpüthü kü Kahvang shahphenpeyü shahhing kü jiüpü aimü nyüke shei hami nyingnyeih shei ammi enyüke.”

³Hanangkü am shennyakthü, ammi hapa keipü dou dükpüthü kü shahphennyüke, shejao ammi-üng hathü dükyaki Kahvangi shahphenpü kübü yangaokhen shei ammi deihnyu je?

⁴Nevaijü büpai am kü phahjipü mop, büpa munenpü hatü nenteiaokpü kü ne-ienelemnyu je? Kahvang phahjiyü am mong leppü touei mühen shingvaishi shei deihei nedangnyu je?

⁵Shejao mechem Kahvangei shahhing shahphenpü shakei vamhen, vaanpü hatü mong neleppü mongdangi mongshihpü nyih shingvaishi ammi laophü shing mongshih jaoei tuhhahnyüke.

⁶Mehenangkü büpai laophü laophülei dou aimü shuohhen:

⁷Üami nenteipai mei düknya müknyinshekhang, dhüm hatü nemahnemenpü yangnyu yemnyüke; hathü kü büpai nedohnetenpü yangnyu shuohhen;

⁸shejao üami laophü shing mon yemnya, hatü shahhing yaktüktü mang phei münya, Kahvangi büpalei mongshih hatü mongpuk show laihen.

⁹Mang dükpü peü kü mongmang hatü hanghi nyuhen: Shongpü kü Jehoda am shingvaishi, hapheikü Kung am shingvaishi,

¹⁰shejao mei dükpüthü peü shingvaishi müknyinshekhang, dhüm hatü chingmei nyuhen: Shongpü kü Jehoda am shingvaishi, hapheikü Kung am shingvaishi.

¹¹Mehenangkü Kahvangi baong hanei nenonyih.

¹²Üami shahkung neshiüi mang thah, shahkung neshiüi mahhen, hatü üami shahkung phangkü mang thah, shahkungnyüi shahphenhen.

¹³Mehenangkü shahkungnyü danpüthü Kahvang touei daülangpü nevai, shejao shahkungnyü noteipüthü dahshakhen.

¹⁴Kung ami shahkungnyü neshiüjao shahkungi mehe yünya ha jomei mong kübü vamei düknyüke, hathüyü jom shingvaishi shahkungnyü nyüke.

¹⁵Jomei dükhiling homei shahkungnyüi mehe yiü, ha jomei mongdangei nyangei nyüke shei hunyüke, hatü sholi mongdangi hapayü jiüpeih shei denpü shuohnyüke, hatü jomei mongdeih-i hathü kü thaüvaünyüke nevaijü shao khüambakei tuhnyüke.

¹⁶Hapayü ngei venpü shahjangmei aimü Jisu Khrista homei Kahvangi joshi deihpü peü shahphenpü nyih nyukahen.

¹⁷Shejao am nyingi Jehoda am shei nyükhahtü shahkungnyü kü mongnyangtü Kahvang mü shenteipü nangkü changmeijema,

¹⁸hatü büpai mongpü nyingnyeih shei, hatü am kü shahkungnyüi mongpükei nyuhpü nangkü mehe meipü nyüpa, ha nyingei yahaoknyeih shei deihjema,

¹⁹hatü amphongü mükphüngpathü kü lem mübüthü, vangnyak kü nyupüthü kü vangngai,

²⁰ngapathü kü yeanbü hatü nenyingpüthü kü nyuhbü hatü shahkungnyülei kihikon hatü shahhing changei nyüpeih shei deihjema,

²¹amphong üami mih kü nyuhnya, am nyingi nenyuhhahnyu je? Gühpa khüei chongventü ammi gühnyu je?

²²Ammi nanglakthü kü mükbongjuyung tedük shei etü ammi ha düknyu je? Ammi lajeithü yaktüktü ammi phopshem leipü gühnyu je?

²³Shahkungnyü nyüpeih shei changmeipüthü, ammi hapa mangei Kahvang kü dhüm neshuohnyu je?

²⁴Mehenangkü ha nyangei nyüke: “Am tata kü Kung am touei Kahvangei men ne-ienelemi leitükteke.”

²⁵Ammi shahkungnyü bangjema japtükpü kü nanglei nyüpeih, shejao ammi shahkungnyü mangtükjema am japtükpeyü nejappükei leidainyüke.

²⁶Hanangkü nejaptükpüthüi shahkungi yüpü dükjema, jom nejappeyü japtükpü kei neleihen je?

²⁷Hahepak kü üami büm kü nejaptük shejao shahkungnyü noteinya, hathüi am kü nyangtükpü shahkungnyü angpü hatü japtüktü tuhtü shahkungnyü mangnyüke shei am nyonghühen.

²⁸Mehenangkü shakdok dou moni shennyak hük Jehoda am nevainyih, nevaijü lemhük shakdokei büm kü lingpai hingshangpü japtükpü am neleinyih.

²⁹Halangmao üpai monglei nyu büpayü hingmeipü Jehoda am, hatü hingshangi japtükpeyü mongdangei shahhidou; hapayü nyingnyoi dou nevai laangha dou. Hapa keipü shennyakü mih leipü nevai Kahvang leipü dupü-oupü dangnyeih.