Read Phom Naga ROM 4 Bible Online

ROM 4 - Phom Naga bible

ROM 4

¹Shejema phai kü jenei bühipa Abrahami mehe nanglei dangpeih shei jeni eaokhen?

²Abrahami paoh dou homei dahshakpü vailangmeyü büpa changmeihen lemhük nyüke, shejao Kahvang touei nevai.

³Mehenangkü Laihingi mehe enya? “Abrahami Kahvang kü hinglem, hatü büpa kü daülangpü shei ieyeilem.”

⁴Shaang mechem shennyak hük dou dükhen, hapalei latü thintho nevai, shejao hapayü büpai lathahpü hean.

⁵Shejao dou ne-omi nemeipüthü dahshakhüpü Kahvang kü üami hinglemnya, hapakei hinglempü kü daülangshemshepü shei ieyeilemnyeih.

⁶Hapa keiha Kahvangi üam kü dou ne-omi daülangshemshepü shei ieyeilem, Davidiyao hathü kü moihimanpü jung enyüke:

⁷“Üamei mangthü tüktük, hatü üamei mangthü küptük moihiman;

⁸üam khüei SHEMBÜPAi mang shei ne-ie, jom moihiman.”

⁹Shejema hapa moihimanü japtükpüthü kü mon hi nevaijü nejappüthü kao epa? “Abrahami hinglempü nangkü büpa kü daülangpü shei ieyeilempü” jeni enyeih.

¹⁰Shejema mekei etü büpa kü ha vampa? Hapayü büpa japshekü hi nevaijü jappheiküang? Hapayü jappheikü nevai, japshekü kü nyuteke!

¹¹Büpa shao-üng mangjapi nyushi hinglempai dangpü daülangshemshepü füoshang vaishi japhen nyangeihepü dangpeih. Hapalei mükhongü üami nejapjapi hinglem, hatü üam kü daülangshemshepü shei ieyeilem, hathü peüei pa leihen,

¹²hatü hapa leshi japtükpüthülei pa vaihen, üam jappü mon nevai, shejao jenei bühipa Abrahami büpa japshekü nyupü hinglempü nyu, ha lappü phei müpüthü shingvaishi nyüke.

¹³Mehenangkü büpai kahdoknyü mükjüp danghen shei lahpeyü Abraham kü nevaijü büpalei hühihathü kü shahkung homei nepei, shejao hinglempü daülangshemshepü homei pei.

¹⁴Hapa lahpeyü shahkung phei müpüthüi mükjüp danghen shei vailangmeyü hinglempeyü nanglei neshiü, hatü lahpeyü angsha vaidaihen.

¹⁵Mehenangkü shahkungnyüi mongshih koei peinyeih, shejao melei shahkung nenyu, halei shahkung shaipü neshiü.

¹⁶Hanangkü lahpeyü hinglempai peinyüpeih, shejüang lahpeyü phahjipü shangkü nyuhen hatü hapayü Abrahamei hühihathü peü kü shuohhen lah-ei nyüke; hayü shahkung phei müpüthü kü mon nevai, shejao Abrahami hinglempü kü hean yahpüthü kao nyüke. Büpayü jen peüei pa nyüke.

¹⁷Ha nyangei nyüke: “Ngei nüngü jat longilei pa leihütepih.” Büpai hinglempü Kahvang touei büpayü jenei pa — ha Kahvangi didaipüthü kü yangnyuyem shuohnyeih, hatü nenyupü douthü vamei nyuhen büpai nyüknyeih.

¹⁸Monglem neshiüpü khüei monglemei büpai jatthülei pa leihen shei büpai hinglem. Laihingei, “Nüngei hühihathü longi nyuhen” shei nyangei nyüke.

¹⁹Büpa vangbong kho hük shing ngoidai; büpalei büm deihshuohjü didaipü dan nyujao, nevaijü Sarah-ü nyülan shei deihjao büpai hinglempü kü juwei nelei.

²⁰Kahvangi lahpü nangkü hingnelempai büpa nejü-ü, shejao büpai Kahvang kü müknyinshekhang shuoh-ei büpa hinglempü kü wong koh-ei lei.

²¹Kahvangi mehe lah, ha büpai dükhen ngan nyüpeih shei mongkü pongteke.

²²Hanangkü büpa hinglempü homei büpa kü daülangshemshepü shei ieyeilem.

²³Shaang hapa shah, “Ha büpa kü ieyeilem” shei nyangpeyü büpalei men kü mon nevai,

²⁴shejao jen shingvaishiyao khih. Büpai Jisu, jenei SHEMBÜPA dipü kübü yangei leishihpeih shei üami büpa kü hinglemhen, jen kao hapakei ieyeilemhen.

²⁵Jenei mang nangkü büpa dipü kü lanei shuoh, hatü jen dahshakhühen nangkü yangei leishihteke.