Read Phom Naga ROM 5 Bible Online

ROM 5 - Phom Naga bible

ROM 5

¹Hanangkü hinglempai jen dahshakhüpü nangkü jenei SHEMBÜPA Jisu Khrista homei Kahvang mü jen chingmei nyüpeih.

²Büpa homei hinglempai jeni hapa phahji dangei ha kü jen shaang nyunyeih, hatü Kahvang müknyinshekhang kü jen hanteihen monglempü kü jen changmeinyeih.

³Ha mon nevai, shejao shangpongpai munenpü vamnyeih shei nyingei jeniyao jen shangpongpü kü changmeinyeih,

⁴hatü munenpai dei-aei meipü, hatü dei-aei meipai monglempü vamhünyeih,

⁵hatü monglempai jen mongnemanghünyih; mehenangkü jen kü shuohpü Laangha Daülangpü homei Kahvang bampü jenei mongdang kü shihteke.

⁶Mechem jen wong nekoh-i nyupa, hepak jiüpü kü Khrista mangthü shingvaishi dipeih.

⁷Daülangpü shennyak shojei hanei am dihen kaungshi nyunyeih, shennyak mei am nangjei hanei am dihen vamhen aok.

⁸Shejao Kahvangi bampü jen kü büpai hupeyü jen nedoh-i mang kü nyushi Khrista jen shingvaishi dipeih.

⁹Shaang jeni büpalei iy homei dahshakhüteke, meshükpa büpa homei jen Kahvangei mongshih kübü yangphahen!

¹⁰Mehenangkü jen Kahvangei vepa vaishi dangkao büpalei Ha dipü homei jen büpa mü mongjem pongpü vaijema, meshük nyeishi mongjem pheikü büpalei yangnyu homei jen yanghen!

¹¹Shejao hapa mü nyeishi jen shaang mongjem pongpü jenei SHEMBÜPA Jisu Khrista homei jen Kahvang mü shepei shahüteke.

¹²Hanangkü shennyak hük homei kahdoknyülei mang peipü keiha hatü mang homei dipü peipü keiha, hatü hapakei peüi mang thahpü nangkü peü touei dipü yanei daiteke.

¹³Shahkungnyü shuohshekü mangü kahdoknyülei nyuteke, shejao shahkungnyü nenyupü thahshi mang shei ne-ienelem.

¹⁴Shejao Adam kübü Mosa thahshi Adami pungpükei mang nethahpüthü shak kao mangi vanglem lem. Adamü peikahen nyupü hükei lajei nyuteke.

¹⁵Shejao ang kübü thintho-ü mang kei nevai. Mehenangkü shennyak hükei mang homei longi dipü vaijema, hingmei Kahvang phahji hatü shennyak hük, Jisu Khristalei phahji kü ang kübü thintho longi shingvaishi nyeinya changshi nyüpeih.

¹⁶Shao, hapa ang kübü thintho-ü shennyak hükei mang kübü vampü kei nevai. Mehenangkü mang hük pheikü shahphenpai nyonghüpü koei peinyeih, shejao mang pheikü ang kübü thintho-i dahshakpü longi koei peinyeih.

¹⁷Mehenangkü shennyak hükei mang homei dipai hapa shennyak hük homei vanglem lempü vaijema, meshük nyeishi Kahvangei bhashahpü phahji, hatü daülangshemshepü thintho dangpüthüi shennyak hük, Jisu Khrista homei yangnyu kü vanglem lemhenang!

¹⁸Hanangkü shennyak hükei mang homei peü nyonghüpü lemei müpü keiha, shennyak hüki daülangshemshepü dükpü homei peü dahshakpü hatü yangnyuyem touei münyeih.

¹⁹Shennyak hük ven nedanpü homei longi mang shennyakthü leihüpü keiha, shennyak hüki ven danpü homei longi daülangi leihühen.

²⁰Shejao mang nyeinya dahühen shingvaishi shahkungnyü vamhü; shejao melei mang dapa, nyeinya phahji dapeih.

²¹Hanangkü mangi dipü kü vanglem lempükei, Jisu Khrista, jenei SHEMBÜPA homei daülangshemshepai yangnyuyem touei müpü homei phahjipai vanglem lempeih.