Read Phom Naga ROM 9 Bible Online

ROM 9 - Phom Naga bible

ROM 9

¹Ngei Khrista kü shahhing enyeih — ngei shahshem neenyih; Laangha Daülangpü homei ngelei mongdeih-i ha lekhünyüke.

²Ngei kü mongmang longpü hatü nedoh-i mongkü tüngpü ngelei mongkü nyüpeih.

³Ngelei iy hatü ngelei phai jeihinaüthülei men kü ngei kü Kahvangei thaüvaü nyemhet, hatü Khrista toueipü nyemkatitük shei deihpeih.

⁴Jomphongü Israel am, hatü hapeü kei ungei yahpü, müknyinshekhang, vangpüshuwpü, shahkungnyü shuohpü, khümpü hatü lahpüthü peü jomphongei;

⁵Hebrew am pathüyü jomei, phai keyü peü shak kübü Messiah-ü jom kübü, Kahvang den kü moihimantuh, Amen.

⁶Hapayü Kahvang shah aokpü nedangpü nevai. Mehenangkü Israel am peü hingshangpü Israel am nevai,

⁷hatü Abrahamei hühihathü peü payü hingshangpü büpalei hüpeüthü nevai, shejao Isak homei mon nüngei lihila shei iehen.

⁸Hapa lappeyü iy hi phai kübü hapeüthüyü Kahvangei hapeüthü nevai, shejao lahpü kübü vampü lihila kü mon Abrahamei hühihathü shei iehen.

⁹Mehenangkü lahpeyü hapakei eteke: “Hapa hepak kü ngei nyokei leikahen, hatü Sarah-i yeshang hük angei nyuhen.”

¹⁰Nevaijü hajük mon nevai; mechem baha hük, jenei pa Isak homei Rebekka-i hapeü nyi kotü büm nekongi leipa, hapa lepü lemhük vampeih.

¹¹Kahvangi jepü nedoh-i daihen mükhong kü hapa yeshang nyi bühshekü nevaijü mei nevaijü ten dükshekü,

¹²doui nevai, shejao büpai nyükpü homei pinnyü kü, “Chejei-i chenaü chongphohen” shei etüktü nyu.

¹³Ha nyangei nyüke: “Ngei Jakob kü bampeih, shejao ngei Esau kü jiühitpeih.”

¹⁴Shejema jeni mehe ehenang? Kahvang kü shahhing ne-epü nyüpü je? Lanshei nevai!

¹⁵Mehenangkü büpai Mosa kü enyüke: “Ngei phahjihüpüba kü ngei phahjihen; ngei shinshanghüpüba kü ngei shinshanghen.”

¹⁶Hanangkü hapayü hangkui mongpü nevaijü khepü kü nevai, shejao phahji hupü Kahvang kü kohshi nyüke.

¹⁷Mehenangkü Laihingi Pharaoh kü hei eteke: “Ngelei men kahdoknyü peülei baonghen nangkü nüng kü ngelei ngan huhühen mükhong kü ngei nüng longei anshihpeih.”

¹⁸Hanangkü Kahvangi büpai jepü shennyak kü phahji hunyeih, hatü büpai mong vaantükhüpü shennyakei mong vaantüknyeih.

¹⁹Shejema amphongi ngei kü, “Shejema mehekei büpai shaang thahshi mang yepnya? Kahvangi mongpü üpai bangtükaokhen?” shei ehen.

²⁰Shejao Kahvang mü shah dakteihen hangku nüng üpaang? Ashemi dük shükbü kü, “Mehekei nüngi ngei hapakei shükpa?” shei eaokhen je?

²¹Dük shükbüi aihük ashem yah-ei hükü hayaoha noteihen doumei shingvaishi, hatü hükü jiüjiü noteihen shingvaishi dük shükhen jiüpü neshiüpü je?

²²Kahvangi büpalei mongshih huhen, hatü büpalei ngan nyinghühen nangkü büpa mongshihpai mahtükhen shingvaishi lingpüthü touei nenteipai nyujao meheang?

²³Müknyinshekhang shingvaishi büpai yeihshi mebü phahji huhen shei lingpüthü kü büpalei müknyinshekhang mop nyinghühen nangkü büpai ha dükjao meheang?

²⁴Jenphongao büpai nyüklangpüthü, Jehoda am mon nevai, shejao Kung amao omshi jeyei nyüklangpüthü.

²⁵Büpai Hosea lai kü hei enyüke: “Üam ngelei nanglak nevai, ngei jom kü, ‘Ngelei nanglak’ shei nyükhen; ngei bampü hük nevaijao ngei pinnyü kü, ‘Ngei bampü’ shei nyükhen,”

²⁶“hatü jomphong kü, ‘Amphongü ngelei nanglak nevai’ shei epü shing kü jomphong kü, ‘Vanyangyem Kahvangei hathü’ shei ehen.”

²⁷Israel am nangkü Isaiah-i hapakei lennyüke: “Israel nanglak yungching bhihhiphang kei nyujao aopüthü mon yanglanghen.

²⁸Mehenangkü SHEMBÜPAi kahdoknyü kü lomi dokei shahphenhen.”

²⁹Hapayü Isaiah-i shelei epükei: “Jeiyong SHEMBÜPAi jen kü hühihathü netuhlang meyü, jenü Sodom hatü Gomorrah am kei leidaihah shepeih.”

³⁰Shejema jeni mehe ehen? Kung am üami daülangshemshepü yemei nedai, hathüi hinglempai daülangshemshepü dangteke;

³¹shejao Israel am üami shahkungnyü kübü daülangshemshepü changei dai, jomi shahkungnyü jiühühen neaok.

³²Mehekei nedangpa? Mehenangkü jomi ha hinglempü kü la shouptü neyem, shejao jomi dou kü mongnyang. Jomi huluh yaong kü huluh shuohteke.

³³Ha nyangei nyüke: “Veituh, ngei Zionlei nanglakthüi huluh shuohhen yaong hük, jom dohühen yaongnyü hük tuhnyüpeih; hatü üami büpa kü hinglem, neveühühen.”