Read Phom Naga 1 KORINT 1 Bible Online

1 KORINT 1 - Phom Naga bible

1 KORINT 1

¹Kahvangi mongpü homei Khrista Jisulei phongshan vaihen nyükpü Paul, hatü jenei jeihinaü Sosthenes leipü,

²Korintlei nyupü Kahvangei attoi, Jisu Khrista kü daütükpüthü, daülangpüthü vaihen nyükpüthü mü chemi shing peülei jenei SHEMBÜPA Jisu Khrista — jomei hatü jenei SHEMBÜPA men kü nyükpüthü touei,

³Jenei Pa Kahvang hatü SHEMBÜPA Jisu Khrista leipü phahji hatü chingmei nyute.

⁴Jisu Khrista kü Kahvangi am kü phahji shuohpü nangkü ngei am shing düngei Kahvang kü menvih shuohnyeih;

⁵mehenangkü lem peü kü — epü kü, nyingpü kü hatü lemphü kü büpa mü mongjemei am shemmei leiteke.

⁶Khristalei shahjangmei denpü am mü chongwongei nyüke.

⁷Hanangkü jenei SHEMBÜPA Jisu Khrista shakei vamküpü omdanpai am laangha thintho mepayao taoei nenyu.

⁸Jisu Khristalei nyih kü am kawhikang neshiüi nyuhen shingvaishi büpai am dohpü ngoishi wong kohhühen.

⁹Kahvangü shahhing; büpai laophülei Ha Jisu Khrista jenei SHEMBÜPA mü mongjemhühen am kü nyükpeih.

¹⁰Jeihinaü hatü nyahinaüthü, shaang am peü mongjemei am khongkü hanteipü neshiüi, shejao mong hük, mükhong hük kü mongjemei nyukütuh shei jenei SHEMBÜPA Jisu Khristalei men kü ngei am kü khümnyeih.

¹¹Ngelei jeihinaü hatü nyahinaüthü, am khongkü dehilao nyüke shei Khloe am shemi ngei kü eküpeih.

¹²Ngei ehüpeyü ha hih, am peüi, “Ngeiyü Paul khong,” nevaijü “Ngeiyü Apollos khong,” nevaijü “Ngeiyü Cephas khong,” nevaijü “Ngeiyü Khrista khong” shei enyüke.

¹³Khristayü hanteitü nyüpü je? Am shing Paul shophang kü apphei je? Nevaijü amphong Paulei men kü baptükpü je?

¹⁴Ngei Krispus hatü Gaius nyi mü lenei amphong üpa kao bapnetükpü nangkü ngei Kahvang men vihnyeih.

¹⁵Hanangkü amphong üpaiyao ngelei men kü baptükpeih shei ne-eaokhen.

¹⁶Ngei shao Stephanas am shem baptükpeih; ha mü lenei am üpa kao baptüklashang ngei nenyingang.

¹⁷Mehenangkü Khristai ngei baptüknüng shompü nevai, shejao hapayü Khristalei shophang ngan kong neleihühen shingvaishi hangkulei kihikon shah nevai, shejao shahjangmei baonghen ngei shompeih.

¹⁸Mehenangkü shophang jung shahjangmeiyü mah-ei nyupüthü shingvaishi ngashah, shejao jen yangei nyupüthü shingvaishi hapayü Kahvangei ngan nyüke.

¹⁹Mehenangkü ha nyangei nyüke: “Ngei nahpüthülei kihikon mahtükhen, hatü yaopüthülei kon ngei küptükhen.”

²⁰Shejema nahpülangpü shennyak melei nyüpa? Lai longi manpü melei nyüpa? Hapa den jung nih-ei khoei nyingpü melei nyüpa? Kahvangi hapa kahdoknyülei kihikon ngadou neleitükangpü je?

²¹Mehenangkü Kahvangei kihikonü kahdoknyüi laophülei kihikon homei Kahvang nenyingpü nangkü, ngapükei chongvenpai hinglempüthü yanghen Kahvangi temtükpü nyuteke.

²²Mehenangkü Jehoda ami nyangeihepü yünyüke, hatü Greek ami kihikon nanyüke,

²³shejao hami Khrista shophang kü appü jung chongvenpeyü Jehoda am shing huluh yaong, hatü Kung am shing ngashah leidaiteke,

²⁴shejao üamphong nyüklang, Jehoda hatü Greek am nyiphen kü Khristayü Kahvangei ngan, hatü Kahvangei kihikon nyüke.

²⁵Mehenangkü Kahvang ngapeyü shennyakei kihikon mü nahpüba, hatü Kahvang wong nekohpeyü hangkulei wong mü wong kohpüba.

²⁶Jeihinaü hatü nyahinaüthü, laophü kü nyükpü deih-ei dangtuh: hangkulei laphen aimü am longshi shing nahpü am nevai, longshi shing wong kohpü am nevai, hatü longshi shing shamei shemmei kü bühpü am nevai.

²⁷Shejao Kahvangi nahpüthü veühühen hapa kahdoknyü kü nenying nehingpüthü jepeih, hatü Kahvangi wong kohpüthü veühühen hapa kahdoknyü kü wong nekohpüthü jepeih;

²⁸hatü Kahvangi hapa kahdoknyü kü nyupü douthü neshiüi leitükhen shingvaishi maanpü, hatü yaktükpü hatü nadang neshiüpü douthü jepeih.

²⁹Ha vaipü nangkü Kahvang touei üpayao changmeihen neshiü.

³⁰Büpayü Jisu Khrista kü ammei yangnyu ngamshing; büpayü jen shing Kahvang leipü kihikon, daülangshemshepü, daühüpü hatü angei leibü leipeih;

³¹shejüang nyangei nyupü keiha, “Üpai changmeinya, SHEMBÜPA kü changmeituh.”