Read Phom Naga 1 KORINT 12 Bible Online

1 KORINT 12 - Phom Naga bible

1 KORINT 12

¹Jeihinaü hatü nyahinaüthü, shaang laangha thinthothü nangkü ngei ammi ha nenyingi nyemtenyu shei deihnyüke.

²Mechem am nevaipü am nyupa, amphongü shah ne-eaokpü lajeithü lemei yawh-ei lemnyongei deilangpeih.

³Hanangkü ngei am kü nyinghüpeyü Kahvang Laangha homei epü üpaiyao mechemao, “Jisu kü thaüvaü hettuh!” shei ne-enyih, hatü Laangha Daülangpai nevai pheikü “Jisu-ü SHEMBÜPA” shei üpaiyao ne-enyih.

⁴Shaang thinthothü lem laolao nyüpeih, shejao Laangha hük mon;

⁵hatü chongphopü lem laolao nyüpeih, shejao SHEMBÜPA hük mon;

⁶hatü dükhiling lem laolao nyüpeih, shejao hapa Kahvang hüki peü kü hathü kemei dükhünyeih.

⁷Laangha shakei vampai pabüm ieyei kü peü meihen shingvaishi shuohpeih.

⁸Hapa Laangha homei hük kü kihikon shah ehen, hatü hükpa kü aihük Laanghai mongpükei nyingpühingpü shah ehen,

⁹aihük Laanghai hükpa kü hinglempü; hapa Laangha hüki hükpa kü meihüpü thintho,

¹⁰hükpa kü yashanyale douthü dükhen, hükpa kü tetpüvenpü, hükpa kü laanghathü yao-aokpü, hükpa kü shahlem laolao ehen, hükpa kü shahlem laolao nih-ei eaokpü thintho shuoh-ei nyüke.

¹¹Hathü peü Laanghai mongpükei pabüm ieyei kü hapa aihük Laangha hüki shuoh-ei dükhünyeih.

¹²Mehenangkü büm hük kü phaihan laolao nyupü keiha, hatü büm hük kü phaihan peü, longi nyujao, büm hük mon nyupükei Khrista kao hapakei nyüke.

¹³Mehenangkü Laangha hük kü Jehoda am nevaijü Greek am, aa nevaijü bümei vaijao büm hük kü jen peü baptük, hatü jen peü kü Laangha hük yinghen shuoh.

¹⁴Büm hük kü phaihan hük mon nenyu shejao longi nyüke.

¹⁵La-i, “Ngei lak nevaipü nangkü ngei büm kü ompü nevai” shei ejema, ha vaipü nangkü büm kübü phaihan vaipü nedohdaihen.

¹⁶Hatü dhaongi, “Ngei mük nevaipü nangkü ngei büm kü ompü nevai” shei ejema, ha vaipü nangkü büm kübü phaihan vaipü nedohdaihen.

¹⁷Büm kemei mük vaidaijema, menüngi danhen? Büm kemei dhaong vaidaijema, menüngi bühen?

¹⁸Shejao Kahvangi mongpükei büm kübü phaihan kuk ieyei shaang nyupükei lingteke.

¹⁹Peü kemei phaihan hük mon vaidaijema, büm melei nyuhen?

²⁰Phaihan longi nyüke shejao büm hük mon.

²¹Müki lak kü, “Ngei nüng nenanyih” nevaijü shao shangjingi la kü, “Ngei nüng nenanyih” shei ehen neaok.

²²Halei meyü büm kü wong nekohpü phaihanang longi shongnyü,

²³hatü jeni ahshi dhüm kohbenüng nevai shei deihpü büm kübü phaihan küang jeni nyeishi dhüm shuohnyeih, hatü komshi dhüm shuohpü veihen ahshi nemeipü jenei phaihan küang nyeishi jungnyüpeih,

²⁴shejao dhüm kohbenüng jenei phaihan küang hayaoha junghen nadang neshiü. Shejao Kahvangi maanpü phaihanthü küang nyeishi dhüm shuohhen mü lingpeih.

²⁵shejüang büm kü hanteipü nenyuhen, shejao phaihanthüi hüki hük mü aihük mü jungteihen.

²⁶Phaihan hük kü tüngjema, ha mü peü chemi tüngdainyeih; phaihan hük kü dhüm shuohjema, kemei hapa mü mongongnyeih.

²⁷Shaang amphongü Khristalei büm, hatü pabüm ieyei hapalei phaihan.

²⁸Kahvangi attoi kü shongpü kü phongshanthü, nyipabü kü thihivamthü, jempabü kü nyuhbüthü; hapheikü yashanpü dou dükpüthü, hapheikü meihüpü thinthothü, mih kü sheühpü, vanglem lempü thintho, hatü shahlem laolao epü jepeih.

²⁹Peü phongshanthü je? Peü thihivamthü je? Peü nyuhbüthü je? Peüi yashanpü douthü düknyu je?

³⁰Peü kü meihüpü thintho nyupü je? Peüi shahlem laolao enyu je? Peüi nih-ei enyu je?

³¹Shejao longpü thinthothü kü kentuh. Ngei shao nyeinya chah-ei meipü lem am kü huphahen.