Read Phom Naga 1 KORINT 14 Bible Online

1 KORINT 14 - Phom Naga bible

1 KORINT 14

¹Bampü phei mütuh hatü laangha thinthothü kü kentuh, anyei vaishi chongvenlemlingpü thintho kü kentuh.

²Mehenangkü üpai shahlem laolao enya, hayü shennyak kü nevai, Kahvang kü enyeih. Mehenangkü üpaiyao büpai epü nenyingnyih; büpai hathüyü shahjo-i Laangha mü eteinyeih.

³Shejao üami chongvennya, hayü nanglakthü kü jom linghen, nangthonghen hatü nyiumeihen nangkü enyeih.

⁴Shahlem laolaoi epüthüyü laophü nying linghahnyeih, shejao chongvenpüthüi attoi lingnyeih.

⁵Shaang am peüi shahlem laolaoi nyem-e shei ngei deihnyüke, shejao nyeinya ammi chongnyemven shei deihnyüke. Hanei ami lepei ne-epheikü shahlem laolao epü meyü chongvenpü longpeih; hapai attoi linghen.

⁶Shaang, jeihinaü hatü nyahinaüthü, ngei am touei shahlem laolao eshi peiküjema, ngei am kü ha shakei vamei nevaijü nyingpühingpü nevaijü chongvenpü nevaijü nyuhpü homei mang-e thahshi ngei mekei etü am nanglei danghühen?

⁷Hapayü yangnyu neshiüpü ngeü mon vampü liping kongkoih leangke. Hathüi kesho üng baong hanei nevamjema, hapa vüngnyu khih shei mekei etü hanei ami nyinghen?

⁸Amit ngeü lekei nevüngjema, üpai vehokei daihen temhen?

⁹Hapa keiha amphongao lebü shahlem mü nenyingbenüng ejema, mekei etü etükpü hapa shah hanei ami nyinghen? Mehenangkü hayü ammi vanglük kü eteipü vaidaihen.

¹⁰Kahdoknyü kü ngeü laolao longi nyüpeih, hatü ngeü neshiüi meheyao neshiüpih.

¹¹Shejema ngei hapa shah lappü nenyingjema, shah ebü touei ngeiyü kungpa shennyak kei hatü ngei touei shah ebüyü kungpa shennyak kei leidainyüke.

¹²Hanangkü amphongao laangha thinthothü kü kenpü nangkü attoi linghen shingvaishi hathü kü chah-ei meihen kentuh.

¹³Hanangkü üpai shahlem laolao enya, hapa lephen ngan yüei phoptuh.

¹⁴Ngei shahlem laolaoi phopjema, ngelei laanghai phopnyüke, shejao ngelei mongkü nanglei neshiü.

¹⁵Shejema ngei mehe dükhen? Ngei laanghai phophen, shejao ngei mongiyao phophen; ngei laanghai vih-ei lokhen, shejao ngei mongiyao vih-ei lokhen.

¹⁶Hei nevaijema, nüngi laangha kü Kahvang kü menvih shuohjü nüng mü nyupü hanei ami ha nenyingnyingi mekei etü nüngi menvih shuohpü kü, “Amen” shei ehen? Mehenangkü nüngi mehe enya büpai ha nenyingnyu.

¹⁷Nüngiyü longi meishi menvih shuohhen aok, shejao lebü shennyak hük nelingnyu.

¹⁸Am peü mü ngei-üng nyeishi shahlem laolao epü kü ngei Kahvang men longnyeih;

¹⁹shejoongpa, phopshemei shahlem laolao kü shahpha haja an elei meyü mih kü nyuhhen shahpha nga mon ehen.

²⁰Jeihinaü hatü nyahinaüthü, chudeih kü hashih kei tenyu; ten nangkü hashih kei nyutuh, shejao chudeih kü behe kei nyutuh.

²¹Shahkungnyü kü ha nyangei nyüke: “Nenyingpü shah epü nanglakthü homei, hatü kung amei ju homei, ngei hapa nanglakthü kü ehen; shejao jomi ngei epü kü nebanghen.” shei SHEMBÜPAi enyüke.

²²Shahlem laolao epeyü vaipü am shing nevai, shejao nevaipü am shing nyangeihepü hük; tetpüvanpü shah-ü vaipü am shing, shejao nevaipü am shing nevai.

²³Hanangkü attoi am kemei chemi thaitü peüi shahlem laolaoi ejü haolei nyupü am nevaijü nevaipü am hanei shüjü jomi sholi nebaongpü am khih shei am kü ne-ehen je?

²⁴Shejao peü teteivanei nyujü haolei nyupü am nevaijü nevaipü am hanei shüei ha danjü büpayü mang shennyak shei mongkü ponghen, hatü büpai mehe dan, hapai büpalei shahphenhen,

²⁵hatü büpalei mongdangei joshi nyupü peü shakei nyingdaihen. Hanangkü büpa aümei shatü, “Hingmei, Kahvangü am khong mü nyüke” shei eyei Kahvang kü khümhen.

²⁶Shejema, ngelei jeihinaüthü, mehe dükhenang? Mechem am chemi thaihenshang, am peülei kesho, nyuhhen shah, shakei vampü, shahlem laolao epü nevaijü hapa nih-ei epü nyüke. Dou peü linghühen shingvaishi düktuh.

²⁷Hanei ami shahlem laolao epü nyujema, hepak hük kü nyi nevaijü ahpeih shei jem jeijeileiyei etuh, hatü hüki ha nih-ei etuh.

²⁸Shejao hapa nih-ei ehen hükao nenyujema, phopshemei jom nenmü nyuhütuh hatü laophü nying kü hatü Kahvang mü eteituh.

²⁹Shah ebü nyi-i nevaijü jemi etuh hatü mehe enya, ha kü lebüthüi dokei veituh.

³⁰Hatü uoshi nyupü khong kübü hanei am kü Kahvang leipü shahjang peijema, shongpü shah ebü dohtuh.

³¹Peüi nyinghen hatü peü kü nangthonghen shingvaishi am peü hük pheikü hük etuh.

³²Thibüthülei laanghayü thibüthü phangkü nyüpeih,

³³mehenangkü Kahvangü podongpolong Kahvang nevai, shejao chingmei Kahvang.

³⁴Vaipü attoi am thaihiyu peü kü phopshemei nyühathüi nenmü nyinghahtuh. Mehenangkü jomphong kü shah ehen nemongnyih, shejao phangkü shühen vongbong; shahkungiyao hapakei enyüke.

³⁵Jomi lemhük nyinghüjema jomi shemei laophülei baha kü phetuh. Mehenangkü nyüha hüki phopshemei shah ehenü veübenüng.

³⁶Nevaijü Kahvang shah am mü vampü je? Nevaijü hapa peiküpeyü am kü mon je?

³⁷Hanei ami thibü hük hih shei, nevaijü laangha nganthü nyüpeih shei ejema, ngei mehe nyang, hayü Kahvang leipü shahkung hih shei nyingei yahtuh.

³⁸Üpai hapa neyahhen, büpaao neyahhen vongbong.

³⁹Hanangkü ngelei jeihinaüthü, chongvenhen kentuh hatü shahlem laolao epao tetuhphong;

⁴⁰shejao dou peü ai jiüei hatü kengei dükhen vongbong.