Read Phom Naga 1 KORINT 7 Bible Online

1 KORINT 7 - Phom Naga bible

1 KORINT 7

¹Shaang ammi nyangpü nangkü eshah: “Baha hüki shem neyempü-üng meipeih.

²Shejao mükbongjuyungpü mongshang vampü nangkü baha ieyei laophülei nyüha hatü nyüha ieyei laophülei baha nyuhen vongbong.

³Baha hüki laophülei nyüha kü shuohhen jiüpü shuohhen vongbong hatü hapakei nyühai laophülei baha kü shuohtuh.

⁴Mehenangkü nyüha hüki laophülei büm kü laophü shembü nevai, shejao baha shembü; hapa keiha bahayao laophülei büm kü laophü shembü nevai, shejao nyüha shembü.

⁵Phoppü kü hepak tükhen shingvaishi mongteitü hepak ittü khaatei nyupü mü lenei hüki hük mü khaatei tenyu, hatü am ungei neaokpü nangkü Kahshih-i am kü nedokhen shingvaishi shao chemi thaituh.

⁶Ngei hapayü shahkung kei nevai, shejao mongpü hük kei enyeih.

⁷Peüi ngei kei nyemnyu shei deihnyüke. Shejao peü kü Kahvang leipü thintho laolao nyüpeih; hük kü lemhük hatü hükpa kü lebü lemhük nyüpeih.”

⁸Shem neyempü hatü vaümnyüthü kü ngei kei shem neyemi nyupü-üng jom shingvaishi meipeih shei ngei enyeih.

⁹Shejao jom nyingi ungei neaokjema shem yemtuh. Mehenangkü iyjeiphailei aw vamlei meyü shem yempü-üng meipüba.

¹⁰Shem yempüthü kü ngei hapa shahkung shuohnyeih (ngei nevai, SHEMBÜPAi): Nyüha hüki laophülei baha mü teyanhen vongbong.

¹¹Shejao pinnyü yandaijema, shem neyemi nyuhen vongbong, hei nevaijema shao laophülei baha mü mongjemei thaituh. Baha hüki laophülei nyüha mü neyanhen vongbong.

¹²Aopüthü kü — SHEMBÜPAi nevai, ngei enyeih — vaipü am hanei-i nevaipü am nyüha yah-ei nyujema, hatü pinnyüi büpa mü nyuhen mongjema, büpai pinnyü teyantükhü.

¹³Hatü nyüha hanei-i nevaipü baha nyujema, hatü büpai pinnyü mü nyuhen mongjema, pinnyüi büpa teyantükhü.

¹⁴Mehenangkü nevaipü bahayü büpalei nyüha homei daühünyeih, hatü nevaipü nyühayü pinnyülei baha homei daühünyeih. Hei nevaijema ammei hapeüthüyü nedaüpü vaihen, shejao hapakei vaijema jomphongü daüdaiteke.

¹⁵Shejao nevaipü nyüha nevaijü baha yandaijema, hapayü hei-üng tuhtuh; hapa keipü shahhidou kü jeihinaü nevaijü nyahinaü shashi neshiü. Chingmei touei Kahvangi jen nyükpeih.

¹⁶Shembünyü, nüngei baha nüngi yanghen hi neyanghen nüngi mekei nyingpa? Nevaijü shembüpa, nüngei nyüha nüngi yanghen hi neyanghen nüngi mekei nyingpa?

¹⁷Shennyak peüi laophü kü Kahvangi mepa nangkü am kü nyükpa hapakei SHEMBÜPAi shuohpü yangnyu aimü nyuei daituh. Hapayü ngei attoi peülei shuohpü shahkung hih.

¹⁸Shennyak hük büpa kü nyükshingkü japtüktü nyupü je? Büpa nejappü am neleihen vongbong. Shennyak hük büpa kü nyükshingkü nejapi nyupü je? Büpai nejaphen vongbong.

¹⁹Japtükpao nejapao meheyao nevai, shejao Kahvangei shah bangpü mon lemphü hih.

²⁰Kahvangi nyükshingkü mehe laphen kü nyupa, peüi hapa kü lakshing nyutuh.

²¹Am kü nyükshingkü am aa vaishi nyupü je? Hapai am mongteshanghü. Am bümei paoh dangjao sheleipü mao nyeishi shaang hapa laphen kü meipüba kü nyutuh.

²²Mehenangkü üpa aa vaishi nyushi SHEMBÜPAi nyük, büpayü SHEMBÜPA kü bümei shennyak; hapa keiha üpa kü bümei vaishi nyushi nyüktepa, büpayü Khristalei aa nyüke.

²³Amphongü bhei shuohtü shakpeih; am hangku shembülei aa telei.

²⁴Jeihinaü hatü nyahinaüthü, mepa laphen kü am kü nyükpa, ha laphen kü Kahvang mü nyutuh.

²⁵Shaang shem neyempüthü nangkü ngeilei SHEMBÜPAlei shahkung neshiü, shejao SHEMBÜPAlei phahji homei monglemaokpü shennyak hük keiha ngei am kü ngelei chudeih shuohnyeih.

²⁶Shaangpü shanghah eejü am shingvaishiyü shaang nyupükei nyupü meihen khih shei ngei deihnyüke.

²⁷Am shem yemphei je? Yanhen tekhe. Am shem mangyempü je? Nyüha teyem.

²⁸Shejao am shem yemjema, hapai am mang nethahnyih, hatü nela hük shem yemjema, pinnyüi mang nethahnyih. Shejao üami shem yemnya, hapa yangnyu kü shanghah ponghen, hatü am ha kübü yanghüei deihnyüke.

²⁹Jeihinaü hatü nyahinaüthü, ngei ehüpeyü ha hih; hepak shohdaiteke. Shaang mü leitü üami nyüha nyu, nenyupükei,

³⁰hatü mahng theppüthüi netheppükei; mongongpüthüi mongneongpükei, dou shakpüthüi meheyao ne-angpükei,

³¹hatü üami kahdoknyü douthü noteinya, jomi ha deihshi mon nenyupükei nyutuh. Mehenangkü shaangpü hapa kahdoknyü-ü peihdainyüke.

³²Am mongshang neshiüi nyemnyu shei ngei deihnyeih. Shem neyempü shennyakü SHEMBÜPAlei dousho aokhen, mekei etü SHEMBÜPA mongmeihühen deihshi nyunyeih;

³³shejao shem yempü shennyakü kahdoknyü shahhidou kü mekei etü nyüha mongmeihühen deihshi nyunyeih,

³⁴hatü büpalei chudeih nyi hantü nyunyeih. Shem neyempü nyüha hatü nelayü büm hatü laangha kü daülangi nyuhen nangkü SHEMBÜPAlei dousho deihshi nyunyeih; shejao shem yempü nyühayü kahdoknyü shahhidou kü mekei etü baha mongmeihühen deihshi nyunyeih.

³⁵Ngei hayü am meihen nangkü enyeih; hayü am kü khüamhen nangkü nevai, shejao jiüpü hatü mei dükei mong aampü neshiüi SHEMBÜPAlei dousho longhühen yangnyu lanei shuohhen nangkü enyeih.

³⁶Hanei ami laophüi doi phepü nela touei yemya jiüshi nenyujema, hatü büpa shem yemhüei deihjema, büpa shem yemtuh; hapayü mang nevai. Jiji shem yemhütuh.

³⁷Shejao üpa shennyaki laophülei mong theanei leitü, kangpü nangkü nevai, shejao laophülei iyhiphai ungei leitü hapa nela mü shem neyemhen mongkü deihhenshang hapa shennyakao jiüpü düknyüke.

³⁸Hanangkü üpai shem yemnya, büpai meipü düknyüke, shejao üpai shem neyem, büpai meipüba düknyüke.

³⁹Nyüha hük laophülei baha yemmü nyupü thahshi shashi nyüke. Shejao pinnyülei baha didaijema, SHEMBÜPAlei men kü mon pinnyüi lümpüba mü shem yemaokhen.

⁴⁰Shejao ngelei shahphen aimeyü pinnyü shaangpükei nyupü-üng nyeinya moihiman. Hatü ngei kao Kahvang Laangha nyüpeih shei ngei deihnyeih.