Read Phom Naga 1 KORINT 9 Bible Online

1 KORINT 9 - Phom Naga bible

1 KORINT 9

¹Ngeiyü bümei nevaipü je? Ngei phongshan hük nevaipü je? Ngei Jisu, jenei SHEMBÜPA ne-eeangpü je? SHEMBÜPA kü amphongü ngeilei dou nevaipü je?

²Ngei mih touei phongshan nevaijao ngeiyü ammei phongshan hih; mehenangkü amphongü SHEMBÜPA kü ngei phongshan vaipü füoshang.

³Ngei kü shahphenei uopüthü kü ngei nang ha enyeih.

⁴Hamphong hahhen yinghen jiüpü neshiüpü je?

⁵Lebü phongshanthü, hatü SHEMBÜPAlei chenaüthü hatü Cephas kei vaipü nyüha mühahhen hamphong kü jiüpü neshiüpü je?

⁶Nevaijü Barnabas henji mon shünyü shing dou dükpü kübü dohhen jiüpü neshiüpü je?

⁷Üpai laophülei lop tükei veshan dou düknya? Üpai nyalingngupai sheitü haleipü betjük nehah-i nyunya? Nevaijü üpai mi haümtü haleipü amma neyingi nyunya?

⁸Ngei hapayü hangkulei wong noei enyu hiang? Shahkungiyao ha aihük ne-enyu je?

⁹Mehenangkü Mosa shahkung kü ha nyangei nyüke: “Hah tenpü hepak kü mohohlei ju kü tuw tethuh.” Hapayü mohoh nangkü Kahvangi enyu je?

¹⁰Büpai hayü jenei men kü epü nevaipü je? Hih, hapayü jen shing nyangpeih; mehenangkü üpai han hoknya hatü üpai hah tennya, hapa hah kübü phaihan danghen monglempü kü dükhen vongbong.

¹¹Hami am kü laangha li haiphei vaijema, hami am leipü mop danghenü ahshi ahdaipü je?

¹²Lebüthüi am leipü ha danghen jiüpü yüjema, hami nyeishi yühen jiüpü neshiüpü je? Shejao hami ha jiüpü nenotei, shejao Khristalei shahjangmei lem bangtük leimeyü shei hami lemphü munennyeih.

¹³Phopshemei chongphopüthüi phopshem leipü hahying dangnyeih, hatü moidülei chongphopüthüi moidülei moila shuohpü kübü phaihan dangnyeih shei ammi nenyingnyu je?

¹⁴Ha aihük mü üami shahjangmei baongnya, hathüi shahjangmei baongpai jomei yangnyu haümhen SHEMBÜPAi shahkung shuohteke.

¹⁵Shejao ngei hathü jiüpü hükao nenoteinyih, nevaijü hathü jomi ngei kü nyemnopha shei ngei nenyangnyih. Ngei changmei shah kei epü kü ngei nyonghü leimeyü ngeiyü didaipü meipüba.

¹⁶Ngei shahjangmei baongjema, ngei changmeihen laphen neshiü; mehenangkü chongvenhenü ngei kü nangtükpü dou, hatü ngei ha shahjang meipü nevenjema ngei onyükei!

¹⁷Ngei hayü ngei nyingi mongei dükjema, ngei shing laklei nyüpeih; shejao ngei nyingi mongei dükpü nevaijema, ngei kü kangpü dou hük shuohpü khih.

¹⁸Shejema ngelei laklei meheang? Ha khih: ngei shahjangmei baongpü kü bhei neyah-i angkü vennyeih; shahjangmei nangkü ngei ngelei hean jiüpü neyünyih.

¹⁹Ngeiyü üpalei aayao nevai, bümei vaijao, jom nyeishi müei leihen shingvaishi ngei jom peülei aa leipeih.

²⁰Jehoda am müei leihen nangkü Jehoda am touei ngei Jehoda am leipeih. Shahkung phangkü nyupüthü müei leihen nangkü shahkung phangkü nyupüthü touei (ngei shahkung phangkü nenyujao) ngei shahkung phangkü nyupü am kei leipeih.

²¹Shahkung haolei nyupüthü müei leihen shingvaishi shahkung haolei nyupüthü touei (ngei Kahvangei shahkung kübü bümei leiyei nenyu shejao ngei Khristalei shahkung phangkü nyujao) ngei shahkung haolei nyupüthü kei leipeih.

²²Wong nekohpüthü müei leihen shingvaishi wong nekohpüthü touei ngei wong nekohpü am kei leipeih. Mehe vaihen vaijao hanei am dangkao yanghen nangkü ngei nanglak peü touei lemphü kei leipeih.

²³Ngei hapalei moihiman hanteihen shingvaishi ngei ha peü shahjangmei men kü düknyeih.

²⁴Mokei dokteipü kü peüi mokei dokteinyeih, shejao hüki mon thintho dangnyeih shei ammi nenyingnyu je? Thintho danghen mü moktuh.

²⁵Ngapüthüi longi ungei-aeiyei nyuh-ei mannyüpeih; jomi hapayü mahdaihen chüyük danghen shingvaishi düknyüpeih, shejao jenü nemahbenüng hük danghen shingvaishi düknyüpeih.

²⁶Hanangkü ngei mükhong neshiüi nemoknyih, nevaijü vanglük kü shühpükei ngei nenganyih;

²⁷Shejao ngei mih kü nyuhtüktü ngeiang vühen khih shei ngei ngelei büm yepei tuhlangnyeih hatü aa leihünyeih.