Read Phom Naga 2 KORINT 12 Bible Online

2 KORINT 12 - Phom Naga bible

2 KORINT 12

¹Hapa kübü mehe nangleiyao nedangjao ngei changmeihen nadang khih, shejao ngei SHEMBÜPAleipü manghkhang hatü shakei vampü kü nedoh-i daihen.

²Bong anpüali daiteke, Khrista kü shennyak hük jempabü vangsholei yepei anteke — hapayü büm kü hi manghkhang kü shangkü ngei nenying; Kahvangi nyingnyeih.

³Ngei nying, hapa keipü shennyak hük, büm mü hi nevaijü manghkhang kü shangkü ngei nenying; Kahvangi nyingnyeih, hapa keipü shennyak,

⁴Paradiselei müei an, hatü ne-eteihen douthü, hangku üpaiyao leiyei ne-ehen douthü jung büpai danteke.

⁵Hapa keipü shennyak hük men kü ngei changmeihen, shejao ngei wong nekohpü jung mü lenei ngei ngei nangkü nechangmeipih.

⁶Ngei changmeihen jehahjao ngeiyü ngapa nevai; mehenangkü ngei shahhing ehen. Shejao ngei nyingi henüng kübü yepei tuhlangnyeih, shejüang ngei kübü eepü nevaijü ngei kübü danhahpü mü lenei üpaiyao ngei nang meinyu kei nedeihhen.

⁷Hanangkü ahshi longpü shakei vampü ngei eepü nangkü ngei changmeihen kübü yepei tuhhen shingvaishi ngelei phai kü hüh hük, ngei kü shüveihen Satanei phongmokbü hük ngei kü shuohpeih.

⁸Jempa thahshi ngei kübü ha yahlangshih shei ngei SHEMBÜPA kü khümei epeih.

⁹Shejao büpai ngei kü, “Ngelei phahji nüng shingvaishi changshi nyüpeih; mehenangkü ngelei wongü wong nekohpü kü changpüshapü leihünyeih” shei eteke. Hanangkü Khristalei ngan ngei kü nyuihen shingvaishi ngei wong nekohpü kü ngei nyeinya mongongshi changmeihen.

¹⁰Ha vaipü nangkü Khristalei men kü, wong nekohpü kü, yaüeilungpü, ponghahpü, shüveidoidei hatü vongshüh kü ngei mongongnyeih. Mechem ngei wong nekoh, shejüang ngei wong kohnyeih.

¹¹Ngeiyü ngapa hük kei nyupeih; hayü ammi ngei hapakei leihüpeih. Ngei nang meipü ehenü amphong vaipeih. Ngei meheyao nevaijao ngeiyü longpü phongshanthü mü melemeiyao maanpü nevai.

¹²Hingshangpü phongshan hük sheiyü yashanyale, thamapü hatü nyangeihepü longi dükpai lekei hutepih, hatü ngei hathüyü longi nenteiaokpai dükpeih.

¹³Ngei am kü hanggovih neshuohpü nangkü lebü attoithü mü am nyeishi nemeipükei deihnyu je? Hapakei deihjema ngei kü mang tükshih.

¹⁴Jempabü am touei peihen ngei hatouei temei nyüpeih hatü ngei am kü hanggovih nevaihen; mehenangkü ngeiyü ammi angpü mop nevai, am nanyeih; mehenangkü hashihthüi nyühipa shing yowhen napü neshiü, shejao nyühipathüi hashihthü shing yowhen nadang nyüke.

¹⁵Am shingvaishi ngei angpü lemphü hatü ngeiyao omshi tükhen. Ngei am kü longi bampü nangkü ammi ngei kü maani bamhen je?

¹⁶Ngei am kü hanggovih nevai shei ammi lekei nyingnyüke. Shejao hanei ami ngei glüp kohpü nangkü ngei am lueilemei yahlangpeih shei ehen.

¹⁷Ngei am touei shompü shennyak hanei ami am kü lueilempü je?

¹⁸Ngei Titus kü daihen eshuohpeih hatü lebü jeihinaü hük büpa mü shompeih. Titus-i am kü lueilempü je? Aihük laanghai ham nyingi dou nedükpü je? Hami aihük laphen neyahpü je?

¹⁹Nyuyang kemei kü am touei ham nyingi yanglem yempükei deihpü je? Khrista kü Kahvang touei hami enyüpeih, hatü hami dükpü lemphü, bampü küphüthü, am wong kohhühen nangkü dükpeih.

²⁰Mechem ngei peihenshang, ngei napükei am nenyuphahen, hatü ammi napükei ngei nenyukahen vaaishang shei yingei deihnyüke; Üpai nyingpa, depülaopü, mükhühteipü, mongshih anpü, laophü shing mon deihpü, yaüeilungpü, mihla epü, changmeipü hatü bukpüshaanpü nyuhen khih shei ngei yingei deihnyüke.

²¹Shao mechem ngei am touei peihenshang, ngelei Kahvangi ngei am touei maanei leihühen, hatü üami shelei mang thahtü jomi dükpü nedaünelang, mükbongjuyung, shahkung mangpü kübü mong nelep, hathü longi nangkü ngei mongkü tünghen mü shiühen khih shei ngei yingei deihnyüke.