Read Phom Naga 2 KORINT 3 Bible Online

2 KORINT 3 - Phom Naga bible

2 KORINT 3

¹Shao hami ham nang changmei shah ehahnüng chongpangnyu hiang? Hanei am keiha, hami am leipü nevaijü ammi ham leipü nyingteipü lai nahen je?

²Amphongü peüi nyingpü hatü iepü hamei mongdangei nyangpü hamei lai.

³Amphongü ham chongphopü homei shompü Khristalei lai shei hunyüke; hapayü shiai yah-ei nenyang, shejao vanyangyem Kahvang Laanghai yaongba kü nevai, shejao hangkulei mongdang kü nyangpeih.

⁴Hapa keiha hami Khrista homei Kahvang touei monglempü nyüpeih.

⁵Hapa dükaokpeyü ham kübü vampeih shei ham nyingi meheyao ehen neshiü; hami dükaokpeyü Kahvang leipü nyüpeih.

⁶Büpai ham vangpüshuwpü ja hükei chongphobüthü leihüei hapa dou dükaokhen mü leihüpeih; hayü nyangpü shahkungi nevai, shejao Laanghai; mehenangkü shahkungi jütüknyeih, shejao Laanghai yangnyu shuohnyeih.

⁷Shaang dipü koei peipü chongphopü dousho mepa yaong kü kukei nyangtepa, hapa müknyinshekhang kü peishingkü hapalei müknyinshekhang shaang yimdaiyaki Israel ami Mosalei dhe kü ngangei neveiaokjema,

⁸Laanghalei chongphopü dousho meshük nyeishi müknyinshekhang kü peikahen?

⁹Nyonghüpü dousho kü müknyinshekhang nyujema, hangku dahshakhüpü dousho kü meshük nyeishi müknyinshekhang bhashahshi nyuhen!

¹⁰Mepa kü chem müknyinshekhang nyutepa, hapalei müknyinshekhangü ha mü nyeipü müknyinshekhang nyupü nangkü mahdaiteke.

¹¹Mehenangkü mepa kanja nyutü mahdai, ha müknyinshekhang kü peijema, den kü nyuhen müknyinshekhangü meshük longshi peihenang!

¹²Hanangkü ham kü hapa keipü monglem nyupü nangkü ham monglongshi düknyüpeih.

¹³Hamphongü müknyinshekhang yimei lüdaiyaki Israel ami ha kü neveihühen shingvaishi dhe kü ashaki jümlangpü Mosa kei nevai.

¹⁴Shejao jomei mong vaanei leiteke, hatü shinnyih thahshi mechem jomi hapa vangteipü chang iehenshang hapa aihük ashaki jümlangnyüke. Hapa ashakü shennyak hük Khrista kü nyujü mon tük-aokhen.

¹⁵Shinnyih thahshi mechem hapa Mosa shahkung iehenshang jomei mongdang kü hapa ashaki jümlangnyüke;

¹⁶shejao mechem shennyak hük SHEMBÜPA touei lepei leihen, hapa ashak nyuktüknyeih.

¹⁷Shaang SHEMBÜPAyü Laangha, hatü melei SHEMBÜPAlei Laangha nyu, halei bümei nyüpeih.

¹⁸Jen peüi dhe kü ashaki nejümi SHEMBÜPAlei müknyinshekhang aina kü kei khangei leihünyeih, hatü SHEMBÜPA, üpa Laangha nyu, büpa leipü peipü aihük müknyinshekhangi nyeinya shaopü müknyinshekhang kü büpa lepü kü jen yeiyahünyeih.