Read Phom Naga 2 KORINT 7 Bible Online

2 KORINT 7 - Phom Naga bible

2 KORINT 7

¹Bampü küphüthü, jen kü lahpü hathü nyupü nangkü jen nyingi büm hatü laangha nedaüpü peü kübü daüei Kahvang nyempü kü daülangpü changpüshapü leihüshah.

²Ammei mongdangei ham shingvaishi shing lingtuh. Hami üpayao nepunghü, hami üpayao netentük, hami üpa kao ne-ühing.

³Ngei hayü am nyonghühen nangkü ne-enyih; mehenangkü chemi dihen, chemi nyuhen mü amphongü hamei mongei nyüpeih shei ngei shelei ephei.

⁴Ngei düngei am nangkü changmeinyeih; am nangkü ngei maühepü longpü nyüpeih; ngei mong nyiushem meipai maei nyüpeih; ham shangpongpü peü kü ngei longi mongongnyeih.

⁵Mechem ham Macedonialei peipa, hamei büm nyiumei kü nenyu, shejao hamphongi lem peü philei shangpongpeih — shakei dehilao, mongei nyempü nyupeih.

⁶Shejao Kahvang, üpai mongshangpüthü nyiushem meihünya, Titus peihüpai ham nyiushem meihüpeih,

⁷hatü hayü büpa peipai mon nevai, shejao büpai am jung eshi nyiushem meihüpü shah homeiyao ham nyiushem meihüpeih. Büpai hamphong kü am ongyangpü, am theppüyoungpü, ammi ngei kü nyakpükenpü eküpü nangkü ngei nyeishi mongongpeih.

⁸Ngelei lai homei am mongmanghüjao ngei ha kü mongshangei nedeihnyih (ngelei hapa lai homei am mongmanghüpü kü ngei mongshangei deihjao hayü kanja shing mon shei ngei veiaoknyeih).

⁹Shaang ngei mongongnyeih; hapayü am mongmanghüpü nangkü nevai, shejao am mongmangpai mong leppü lemei müteke; mehenangkü hami am kü mongdin vaihen mü meheyao ten nedük; am mongmangpeyü Kahvangi mongpü hük nyuteke.

¹⁰Mehenangkü Kahvang deihshi mongmangpeyü yemleipü touei mühen mong leppü vamhünyeih, hatü mongmangei nenyunyih, shejao kahdoknyü mongmangi dipü vamhünyeih.

¹¹Kahvang deihshi mongmangpai meshük mong kü ketpü, meshük am daülangi nyuhen monghumpü, meshük ten khüei mongshihpü, meshük thaeimapü, meshük ongyangpü, meshük nyakpükenpü, meshük shahhing dükpü eehen tempülempü vamhüpa, ha kü veituh. Lemphü phikü am nyingi pungpü neshiü shei huteke.

¹²Hanangkü ngei am kü nyangjao hayü nejiüi dükpüba nangkü nevai, nevaijü mongkü ma yahpüba nangkü nevai, shejao Kahvang touei ammi ham shing nyakpükenpü am kü nyinghühen nangkü nyangpeih.

¹³Hapa kü jen nyiushemmei dangnyeih. Ham mong nyiumeipü kü üei hami shao Titus mongongpü kü mongongpeih; mehenangkü amphong kempai büpalei mong nyiumeihüpeih.

¹⁴Am nangkü ngei büpa touei changmeipeih, hatü ammi ngei mongnemanghü, shejao hami am kü epü lemphü shahhing vaipü keiha hami am nangkü Titus touei changmeipeyü shahhing nyüke.

¹⁵Am peü ven danei nyemei kheüei büpa yahpü deih-ei büpai am peü kü bampü nyeishi nyüke.

¹⁶Ngei am kü dhao mü monglempü nyupü nangkü ngei mongongnyeih.