Read Phom Naga GALATIA 2 Bible Online

GALATIA 2 - Phom Naga bible

GALATIA 2

¹Hapheikü bong anpüali angtü ngei mü Titus müei Barnabas mü shao Jerusalemei aongpeih.

²Ngei touei shakei vamei hupü nangkü ngei aongpeih, hatü ngei Kung am touei venpü shahjangmei mübüthü mon thaipü touei ngei angkü mokei nenyu nevaijü nemok shei lekhühen nangkü nih-ei eshuohpeih.

³Shejao ngei mü nyupü Titus, büpa Greek am vaijao japhen nenyeanshuoh.

⁴Ham aa leihühen shingvaishi Khrista kü hami dangpü bümei hean kü gühshukhen nangkü shahshem vaipüthü hanei ham touei peipeih.

⁵Shahjangmei shahhing am touei yangei nyuhen shingvaishi hami jom kü hepak shohükao neshuoh.

⁶Shejao üamphong mübüthü shei nyu, jom mehe mehe vaijao ngei shingvaishi meheyao hayaoha neshiü; (Kahvangi shakdokei eepü kü shahnephennyih — hathüi ngei kü mehe chudeih-ao ne-ephaangpih,) hathü mübüthüi ngei kü meheyao nesheühphaangpih.

⁷Haleimü Peter kü Jehoda am kü chongvenhen shuohpükei Kung am touei ngei kü chongvenhen dousho shuohpü jomi eteke.

⁸Jehoda am touei Peter phongshan vaiyei shomhen Kahvangi dou dükpü keiha ngeiyao Kung am touei phongshan vaiyei shomhen büpai dou dükpeih.

⁹Jakob, Peter hatü Johan hathüi ngei kü shuohpü phahji nyingei pei, hatü jomi Barnabas henji kü chemi lak kü dükteitü Kung am touei daihen, hatü jomphongü Jehoda am touei daihen mongteiteke.

¹⁰Jomi phepü dou hükü, ngei hingmei dükhüei nyupü keiha henjinyi-i taopathü deih-ei danghen eteke.

¹¹Shejao mechem Peter Antiokhlei peiküpa, ngei dhe kü khangshi büpa kü lohshuohpeih; mehenangkü büpai nyingshi nejiüi nyupü khih;

¹²mehenangkü Jakobi shompü shennyak hanei hatouei ngoishekü Peter-ü Kung am mü hahyingei nyupü khih. Shejao mechem jomphong ngoijapa, büpai Jehoda am khongkü nyempü nangkü haleipü yaongei khaatei daiyei nyupü khih;

¹³hatü büpalei akhümmong-üm kü lebü Jehoda amao ompü khih, hatü Barnabas dangkao jomei akhümmong-ümi lemnyongei müpü khih.

¹⁴Mechem jomphongü shahjangmei kü nyupü shahhing lem kü jiüshi nedüknyu shei ngei veiaokpa, ngei jom peü touei Peter kü, “Nüngü Jehoda am, shejao Jehoda am kei nevai, Kung am kei nyunyüke. Shejema, mekei etü nüngi Kung am kü Jehoda am kei nyutuh shei nyeanshuohnya?” shei eshuohpeih.

¹⁵Jomphongü nyübüh-i Jehoda am, hatü Kung am mangthü nevai;

¹⁶shejao shennyak hüki shahkungnyü dükpai nevai, shejao Jisu Khrista kü hinglempü homei dahshaknyeih shei jeni nying. Khrista kü hinglempai jen dahshakpü danghen shingvaishi jeni Jisu Khrista kü hinglemei peiteke, hatü hayü shahkungnyü douthü dükpai nevai; mehenangkü üpaiyao shahkungnyü douthü dükpai dahshakei neaokpih.

¹⁷Shejao mechem jen Khrista kü dahshakhen khenya, jenphong mangthü vaidaitü nyunyüke; shejema Khristayü mangei chongphobü je? Lanshei nevai!

¹⁸Ngei mangtükpü dou shao ngei lingei leijema, ngeiyü shahkung benbü shei hunyüke.

¹⁹Ngei Kahvang kü nyuhen shingvaishi ngei shahkungnyü homei shahkungnyü kü didaishuohpeih. Ngei Khrista mü shophang kü aptüktih;

²⁰hatü hajük kü shaang nyupeyü ngei nevai, shejao ngei kü nyupeyü Khrista, hatü shaang ngei phai kü nyupü yangnyu-ü ngei kü bampü ngei shingvaishi yangnyu shuohpü Kahvang Ha kü hinglempai nyunyeih.

²¹Ngei Kahvang phahji wong neshiüi neleitüknyih; mehenangkü dahshakpeyü shahkungnyü homei peipü vaijema, Khristayü angsha kü dipü vainyüke.