Read Phom Naga GALATIA 3 Bible Online

GALATIA 3 - Phom Naga bible

GALATIA 3

¹Am Galatia am ngapathü! Üpai am nganlangpa? Jisu Khrista shophang kü appü ammei müki lekei eeshi huteke.

²Ngei am leipü nyinghüpü dou hükü ha hih: Ammi Laanghayü shahkungnyü douthü dükpai dangpü hi nevaijü ammi danpü kü hinglempai dangpa?

³Amü hajükjük nganyu je? Laanghai pangtepü am shaangü phai-i dohnyu je?

⁴Ammi angsha kü hajükjük nyingpü je? Hayü hingmei angkong kü je?

⁵Ammi shahkungnyü dükpü nangkü Kahvangi am kü Laangha shuoh-ei yashanpü douthü dükpü hi nevaijü ammi danpü kü hinglempü kü dükpa?

⁶Abrahami Kahvang kü hinglempü nangkü büpa kü daülangpü shei epeih.

⁷Hanangkü veituh, üami hinglem, hathüyü Abrahamei hühihathü.

⁸Kung amao hinglempai Kahvangi dahshakhühen shei Laihingi yeihshi eeyei sheleiüng hapa shahjangmei Abraham kü, “Kung am peü nüng homei moihimanhen” shei baongei eteke.

⁹Ha vaipü nangkü üami hinglem, hathüyü hinglempü shennyak Abraham mü moihiman dangnyüke.

¹⁰Mehenangkü shahkungnyü douthü kü mongnyangtü nyupüthü peü thaüvaü phangkü nyüke; mehenangkü, “Shahkungnyü lai kü nyangei nyupü douthü peü üpai nedük nevaijü nebangnya, büpa thaüvaü phangkü nyüke” shei nyangei nyüke.

¹¹Shahkung dükpai üpaiyao Kahvang touei dahshakei neaokpih shei shaang lekei eenyüke; mehenangkü, “Daülangpü shennyak hinglempai mon nyuhen.”

¹²Shejao shahkungnyü-ü hinglempü shangkü haüshi neshiü; halei meyü, “Üami shahkungnyülei douthü düknya, jomü ha homei nyuhen.”

¹³Shahkungnyü thaüvaü kübü büpa jen shing thaüvaü hük leiyei Khristai jen angei leiteke; mehenangkü hapa nyangei nyüke: “Pü shangkü üpa aphenshang, büpayü thaüvaütükpü.”

¹⁴Khrista Jisu homei Abraham kü shuohpü moihiman Kung am touei peihen; shejüang hinglempü homei Laanghai lahpü danghen.

¹⁵Jeihinaü hatü nyahinaüthü, nyihjeih yangnyu nyuhichong kübü lappü hük shuohshah: Shennyaki lemhük shojung kü vangteipheikü üpaiyao ha mangtükhen neaok, nevaijü hapa kü meheyao ühen neaok.

¹⁶Shaang Abraham hatü büpalei li kü lahpüthü ling; “Nüngei lihilathü kü” shei longi nyupükei eyei neshiü, shejao, “Nüngei li kü” shei eyei nyüke, lappai, shennyak hük, hapayü Khrista.

¹⁷Ngei ehüpeyü ha hih: Vangbong 430 pheikü peipü shahkungi ha shekü Kahvangi vangtükpü mangtükhen neaok, hatü lahtükpü katitükhen neaok.

¹⁸Mükjüpü shahkung leipü peijema, hayü lahpü kübü peipü nevai, shejao hayü lahpü homei Abraham kü Kahvangi shuohpeih.

¹⁹Shejema shahkungnyülei mükhongü meheang? Pungpeyü meheang ha huhen shingvaishi shuohpeih, hatü hapayü lahpü shuohpü Abrahamei Li peipü thahshi nyuhen. Hapa shahkungü vangsho phongshani lembü hük homei shuohhen shuohpeih.

²⁰Shejao mechem khong hük mon nyuhen, lembü nadang neshiü, shejao Kahvangü hük mon.

²¹Shejema shahkungü Kahvangi lahpüthü khüei nyüpü je? Lanshei nevai! Nanglakthü kü yangnyu shuoh-aokbenüng shahkung shuohpü vaijema, hingmei shahkungnyü homei daülangshemshepü peiaokhen vaipeih.

²²Shejao kahdoknyü kemei mangei khoklat kü küpshi nyüke shei Laihingi enyüke; hanangkü Jisu Khrista kü hinglempü homei mepa lahtepa, hayü hinglempüthü kü shuohhen.

²³Shejao hapa hinglempü peishekü jenphongü shahkungei khoklat kü küptüktü hapa hinglempü shakei mangvam thahshi nyupeih.

²⁴Hanangkü hinglempü homei jen dahshakhen mü Khrista mangyiüi nyupü thahshi shahkungnyü-ü jenei shembü vaihampeih.

²⁵Shejao shaang hapa hinglempü peiteke; hajük kü jen hapa shembü phangkü nenyu;

²⁶mehenangkü Jisu Khrista kü hinglempü homei am peü Kahvangei hapeüthü leiteke.

²⁷Am meshüki Khrista kü baptük, am laophü nyingi Khrista ow owteke.

²⁸Sheyü hajük kü Jehoda am nevaijü Greek am, aa nevaijü bümei, nyüha nevaijü baha baong hanpü meheyao neshiü; mehenangkü am peü Khrista kü hük khan.

²⁹Amphong Khristalei vaijema, amphongü lahpü aimü mükjüp yahpü Abrahamei lithü nyüke.